الموضوع: تجربتى مع زيت الفبريكه فى الفلوينس 2014

والله خطوة جريئة من حضرتك
ولكن الحمد الله افضل

المشاركة الأصلية كتبت بواسطة yasser100

اصدقائي الاعزاء . ليه تجربه مع زيت الفابريكه فى الفلوينس 2014 و فضلت مناقشتها للاستفاده و تبادل الاراء

انا اشتريت الفلوينس كانت عامله 15 كم و كان اول انطباع عن سحب الموتور و طلعته تقيل . و قلت العربيه لسه زيرو و ده طبيعى و بتلين .
و كان تشغيلها الصبح الاقى الموتور بينعر مش صوت موتور ابدا فى عربيه زيرو بالمكانيات دى و ﻻ بالسعر ده .
طلعتها من الثبات مش قوى و كان الاعضاء و انا منهم لما يكتبوا عن النقطه دى يقولوا اصل الاوروبى كله كده و كنت باستغرب ده الموتور و الفتيس يابانى . هو مين اللى مسئول عن
سحب العربيه غير الموتور و الفتيس ؟؟؟
خلصت اول 1000 كم سحب العربيه اختلف بس حاجه بسيطه و بدأت اشغل التكييف و الاقى العربيه بتنازع فى السحب و خصوصا فى المطالع زى الكبارى و الطرق اللى فيها اماكن عاليه
وﻻزم تكون واخد سرعتك قبلها و يا سلام بقا لو وقفت فى مطلع كوبرى و مشغل التكييف ..
قلت للتوكيل على الملاحظات دى و كشفوا عليها كمبيوتر و قالوا لى كله تمام و مافيش الهوا و السحب ده طبيعة العربيه دى و كنت متوقع طبعا الاجابه دى و ما دخلتش فى مناقشات بصراحه .
ﻻحظت ملاحظه تانيه انه الزيت لما علشان يرجع من اجزاء الموتور و يتجمع فى الكارتيره و يتقاس صح بياخد 3 او اربع ايام من ركن العربيه .
ركزت على نقطة الزيت و بخبربتى فى الناحيه الكيميائيه و اللزوجات بدات ابحث فى الموضوع و عرفت من التوكيل انهم بيستخدموا زيت توتال 5w40 و ده بالنسبه للزوجه بس الله اعلم هل دى اللزوجه بتاعة زيت الفابريكه و ﻻ ﻷ ؟ لانهم مش همه اللى بيحطوه هنا .
بحثت عن مواضيع زيت الفابريكه و ده المعلومات فيه قليله و لكن النتيجه اللى وصلتلها انه زيت صفاته التخزينيه بتكون اعلى من مواصفاته التزييتيه و طبعا ده علشان يراعى ظروف الشحن فى المراكب و الرطوبه و اختلاف المناخ ما بين الدوله المصنعه و الدول اللى هاتتباع فيها العربيه و ما يعرفوش كمان العربيه هاتتباع و هاتتركن و هيه زيرو فتره اد ايه .
و اتصلت بنيسان كتوكيل هنا و عالميا و عرفت منهم انه لزوجة الزيت المنصح به لكل الحديث من مواتيرهم 5w30 و انه زيت الفابريكه يتغير بعد 1000 كم و رينو بتقول بعد 10000 كم مش عارف ليه . بيتعاملوا مع العربيه كانها فلوينس 1 او ميجان .
اخدت قرارى بتغيير الزيت على 1400 كم و قلبت الدنيا على اى نوع زيت لزوجه 5w30 مش لاقى و بعت ايميل لشركة توتال العالميه و اتصل بى مندوب من فرعهم هنا و اعتذر لى
انه ناقص دلوقتى لانه توكيلات كتير بتسحبه للعربيات الحديثه و قال لى بس توكيل رينو بياخد 5w40 بس . قلت له عارف لان اغلب العربيات عندهم عليه ما عدا الفلوينس الجديده و الميجان 3 . المهم فى الرحاب لقيت بالصدفه مركز لموبيل و عنده موبيل 1 5w30 و اشتريته و على فكره ما تفرقش اسماء شركات الزيت معايا كتير لانه اغلبهم واحد . اتصلت بمركز فرنش موتورز فى الرحاب علشان يكون تبع التوكيل و طلبت تغيير الزيت و الفلتر و تم .
كان عندى مشاوير اعملها فى حدود 70 كم بعد التغيير و الاقى العربيه حاجه تانيه خااااالص غير اللى كنت راكبها قبل التغيير. كانها بتقول لى انا الفلوينس الحقيقيه يا باشا .
و اتفرجوا على جمال و هدوء و نعومة الموتور اليابانى و الطلعه و السحب من الثبات اتغيروا ازاى و صوت الموتور فى التشغيل الصبح . و اقيس مستوى الزيت تانى يوم مش 4 ايام و ﻻ الهوا فى المقياس .

طيب مش عارف ليه التوكيل مصمم على التغيير بعد 10000 كم . برغم انه اتخن عربيه شوفتها بعد 5000 بس و معظمهم على 1000 ؟
لزوجة زيت الفابركه العاليه دى قد تكون مضره . العربيات الحديثه خلوص البساتم فيها قليله و بتحتاج لزوجه معقوله علشان تعمل تزييت صح .
ليه التوكيل حتى مش بيستعمل اللزوجه المنصح بها 5w30 و على فكره فى الكتالوج مش مكتوبه نهائي .
لزوجة زيت الفابريكه ده معديه حتى ال 5w40 قد تكون 50 او 60 .

تحياتى و انتظر منقشاتكم :)

ياسر باشا تسلم إيدك على الشغل الجامد ده، طب الوقت لو مثلا عايز أغير الزيت على 1500 ك فى التوكيل وقولتلهم عايز أغير الزيت الوقت ومش هاستنى ل 10 آلاف وهاجيب زيت 5w 30 هايوافقوا؟؟؟
فى كمان حاجة هو الزيت الموبيل ون اللى حضرتك غيرته ده كام لتر؟؟ يعنى مثلا 4 ؟ طب لو 4 ، بتكمل بقى وللا أيه ، لأن العربية بتاخد 4.3 بتغيير الفلتر، والجركن اللى غيرته ده لون أيه ؟؟؟

المشاركة الأصلية كتبت بواسطة yasser100

شوف يا ريس . التوكيل ما فبيش عنده اى مانع فنى انك تغير بعد ال 1000 كم و ده انا شخصيا اتصلت بهم و حولونى على مهندس و قال ما فيش اى مشكله انك تغيره بعد ال 1000 بس هايكون على حسابك بالكامل . قلت له ما فيش مشكله عندى انه يكون على حسابى المهم ما يكنش فيه سبب فنى انه ﻻزم اوصل ب ا 10000 كم . قال ﻻ ما فيش اسباب فنيه .

التوكيل بيستخدم توتال 5w40 . و الموتور بياخد 4.3 لتر بالظبط بالفلتر . انا ما حاولتش معاهم بصراحه انه اخد نوع تانى بس فيه ملاك اخدوا انواع تانيه و التوكيل وافق لهم . انا اتعاملت مع مركز صيانه معتمد و الفلتر الاصلى برضه من عندهم . خللى بالك فلتر الفيس ليفت مختلف تماما عن الفلوينس اللى قبلها و مكتوب عليه نيسان و سعره 130 . التانى سعره 60 و حجمه اصغر .

انا استخدمت موبيل فورميولا 5w30 لون الاستيكر اخضر مش هاتلاقيه بسهوله و عموما اللزوجه دى مش سهل تلاقيها شويه لانه اغلب التوكيلات سحباها للسيارات الحديثه . توتال فيها 5w30 اسمه توتال انيو بس ما بينزلش مصر و اعتقد انه التوكيل هايغير للزوجه دى قريب لانها شغاله كويس جدا مع موتور الفيس ليفت فرق كبير بصراحه .

هاتشترى جركن 4 لتر و جركن تانى لتر واحد . هاتحط منه 300 مللى و ها تحتفظ بالباقى . لو اتصلت بالتوكيل اطلب انك تكلم مهندس كبير شويه فى الصيانه بيكون اكتر تفهما للمواضيع و قول له انا عايز استخدم الزيت الفلانى و التغيير و الفلتر عندكم .

بالتوفيق

متشكر جدا يا باشا

تحياتى لحضرتك