تقرير استلام التو 2015 الشكل الجديد

**rasha adly** · 28-01-2015 05:18 PM

المشاركة الأصلية كتبت بواسطة pharmacist zt

لو سمحت هي فيها قفل للاطفال؟؟
وبكام السنتر والانذار والكاسيت من فضلك وياريت انواعهم وبارك الله فيك

قفل للاطفال لا
السنتر والانذار تايواني
انا معرفش اوي في الحجات دي بس الكل شكرلي فيهم وقتها وقالولي التايواني افضل من الصيني
كانوا عاملين الاتنين 370 ج

والكاسيت جايلي هدية بس معتقدش غالي اخره 100 ج الكاسيت صيني
بس انا قبل ميجيلي هدية كنت بصيت كتير على الكاسيتات
اغلب الموجود صيني ومدام كله زي بعضه فمش هتفرق كتير
اي كاسيت يؤدي الغرض مؤقتاً لحد منلاقي الافضل

**rasha adly** · 28-01-2015 05:26 PM

المشاركة الأصلية كتبت بواسطة elfooly86

حضرتك متأكدة ؟؟

ايوه متأكدة
دي عربيتي اللي بتكلم عنها
مش عربية حد وشفت عنده
وقبل متشتري اتفرج عليها في اي معرض عشان قلبك يطمن

**ahmedfor3** · 28-01-2015 10:10 PM

المشاركة الأصلية كتبت بواسطة ibrahimahmed

العربية عاملة معايا 8300 كم ... والحمد لله ادائها ثابت مفيش جديد عن الزيرو ... واستهلاك الوقود زى ما قلت قبل كده ... قل شوية صغيرين عن الاول

الف شكر على اهتمامك يا استاذ ابراهيم وربنا يباركلك فيها وعلى فكره انا روحت اتفرجت عليها عند الملك برده وبصراحه مكنتش متخيل نها تكون كده العربيه تحفه بجد علشان اللى بيقارنها بالماروتى بصراحه وبدون مبالغه
دى تتقارن بالبيكانتو

**Pharmacist zt** · 29-01-2015 01:35 PM

يا جماعة هل صحيح ان التو 3 سلندر وده يعتبر عيب خطير فيها؟؟.. ارجو الرد بشكل علمي وميكانيكي وجزاكم االله

**ibrahimahmed** · 29-01-2015 03:04 PM

المشاركة الأصلية كتبت بواسطة pharmacist zt

يا جماعة هل صحيح ان التو 3 سلندر وده يعتبر عيب خطير فيها؟؟.. ارجو الرد بشكل علمي وميكانيكي وجزاكم االله

اه فعلا الالتو 3 سلندر
وده طبعا مش عيب ولا حاجة ... هما مش هاينزلو عربية معيوبة
الحكاية كلها ان العربية صغيرة وموتورها صغير ... 800 سى سى فقط
فلا يمكن ان المصمم يعمل موتور 4 سلندر وسعته تكون 800 سى سى فقط
يعنى للتشبيه وتوصيل المعلومة ... مش ممكن ابدا الواحد يشرب شاى فى ازازة ميه معدنية .... مش هاينفع ... البنى ادم الطبيعى بيكفيه من الشاي كباية ... او مج بالكتير ... اكتر من كده ماينفعش
كذلك هى العربية صغيرة وموتورها صغير ... 800 سى سى فقط ... مفيش داعى ابدا تبقى 4 سلندر

**elkingg36** · 29-01-2015 09:07 PM

يا جماعة انا عايز اشتريها بالقسط وعايز اعرف ايه الفرق بين المعرض والتوكيل من حيث السعر ولو دفعت مقدم 30000 هدفع كام كل شهر على نظام 5سنين

**ahmedfor3** · 29-01-2015 10:42 PM

المشاركة الأصلية كتبت بواسطة pharmacist zt

يا جماعة هل صحيح ان التو 3 سلندر وده يعتبر عيب خطير فيها؟؟.. ارجو الرد بشكل علمي وميكانيكي وجزاكم االله

انا عايز اعرف يعنى ايه عيب خطير مش كل حاجه نسبه وتناسب طب عندك متسوبيشى اتراج 3 سلندر
وحجمها اكبر وطبعا الاثنين يابانى الفكره زى ما قالك الاستاذ ابراهيم مينفعش تشرب شاى فى ازازة ميه معدنيه العربيه وزنها متناسب مع الماتور

**Pharmacist zt** · 29-01-2015 10:51 PM

انا كنت هشتريها بس اخويا قاللي لا طبعا دي 3 سلندر نشوف حاجة 4 سلندر افضل وكذا واحد وافقه الرأي.. وقرات ع النت ان ده بيهلك الموتور بسرعة.. لان قدرته صغيرة.. قولت أسألكم.. وشكرا لردكم

**elkingg36** · 29-01-2015 10:54 PM

انتم ليه بترضوا على بعض بس ومفيش حد بيرد على استفساراتى انتم لا ترحبون بالا شخاص الجدد ام ماذا؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟

**ahmedfor3** · 29-01-2015 11:56 PM

المشاركة الأصلية كتبت بواسطة elkingg36

انتم ليه بترضوا على بعض بس ومفيش حد بيرد على استفساراتى انتم لا ترحبون بالا شخاص الجدد ام ماذا؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟

مرحبا بيك يا كنج بص يا باشا حضرتك عايز تدفع 30000 يعنى نصف البلغ يعنى البلغ الباقى 32000 فى 8.5%
لو على 5 سنين 60 شهر هتعمل معاك فى حدود 690 فى الشهر هى ثمنها فى المعارض من61500 الى
62000 وافضل لحضرتك المعارض لسرعة التسليم