الموضوع: تقرير استلام التو 2015 الشكل الجديد

المشاركة الأصلية كتبت بواسطة ibrahimahmed

التكييف فى الالتو عبارة عن 3 بكرات وزرار مكتوب عليه a/c (ودى اختصار air conditioning ) ودراع صغير بييجى يمين وشمال
نبتدى بالبكر: اول بكرة على ايدك اليمين هتلاقى فيها 3 الوان احمر وابيض وازرق ... البكرة دى بتاعة درجة حرارة التكييف ... بمعنى انك لو ظبطتها على اللون الاحمر التكييف هايبقى ساخن وده طبعا تظبطه فى الشتا ... والازرق ده ظبط التكييف على البارد وده طبعا فى الصيف ... واللون الابيض ده درجات مابين الساقع اوى والسخن اوى ... يعنى البكرة دى زى الثيرموستات بتاعة التلاجة كده
البكرة اللى فى النص دى بتاعة شدة الهواء الخارج من فتحات التكييف ... هما اربع درجات بيديك شدة هواء مختلفة . طبعا فى الوضع الزيرو ( اللى هو علامة المروحة ) يبقى كده التكييف مش شغال اصلا ... وعشان تبدأ تشغله تحول البكرة الى اول وضع اللى هو اضعف كمية هواء وتبدأ تعاير الموضوع هل الهواء ده كافى ولا تزود كمية الهواء كمان درجة او درجتين ... انا رأيي ان درجتين كافيين اوى على العربية ... ولو انت معاك ناس ورا والدنيا حر اوى ممكن تجيبه على 3 عشان الناس اللى معاك تحس اكتر بالتكييف
البكرة التالتة اللى على الشمال دى بتاعة انت عاوز الهواء بتاع التكييف يجيلك منين ... هل من الهوايات اللى موجودة قدامك ؟ ولا عاوز الهواء يجيلك من اسفل عند رجليك ... ولا عاوزه يجى من الفتحات اللى فى التابلوه عند الازاز الامامى عشان مثلا لو الازاز بتاعك مشبر من جوه بسبب بخار الميه اللى طالع من الناس اللى قاعدة فى العربية (وده طبعا بيبقى فى الشتا )وبيبقى الموضوع مفيد جدا ... بدل ما تقعد تمسح الازاز اللى قدام بايدك عشان تعرف تشوف الطريق ... ممكن تظبط البكرة على اقصى وضع ناحية اليمين هتلاقى التكييف بيطلع الهوا من الهوايات اللى عند الازاز بس
عامة عشان ماتتوهش ... هما 5 اوضاع للبكرة اللى على اليمين هناخدهم من الشمال لليمين:
1 - الهواء من الهوايات الامامية اللى فى التابلوه فقط
2 - الهواء من الهوايات الامامية والهوايات اللى عند الرجلين
3 - الهواء من الهوايات اللى عند الرجلين فقط
4 - الهواء من الهوايات اللى عند الرجلين والهوايات اللى عند الازاز الامامى
5 - الهواء من الهوايات اللى عند الازاز الامامى فقط
كده خلصنا البكر ... فاضل الزرار والدراع
الزرار اللى مكتوب عليه a/c : ده اللى بيشغل الكمبريسور بتاع التكييف ... بمعنى انك لو ماشغلتهوش وشغلت المروحة فقط يبقى انت كده كانك مركب مروحة فى العربية ... هاتجيب هوا بس ... بس مش ساقع ... هايبقى هوا حسب درجة حرارة الجو ... لو الجو حر هتلاقى هوا سخن جدا طالعلك من الهوايات ... ولو الجو برد هتلاقى هوا بارد
يعنى الزرار ده لو مطفى يبقى انت كده معندكش تكييف ... ولو شغال يبقى انت كده مشغل التكييف
(طبعا لازم يكون شغال وفى نفس الوقت تبقى انت مشغل البكرة اللى فى النص بتاعة المروحة ... لو شغلته هو بس والمروحة مقفولة ولا كأن التكييف شغال اصلا)
كده مش فاضل غير اخر حاجة واهم حاجة لان الناس دايما بتهمل وظيفته وده بيبقى ليه تاثير مباشر على اداء التكييف ... الدراع
الدراع ده اللى هو موجود تحت البكرة اللى فى النص ... وده ليه وضعين ... يمين وشمال
الناحية الشمال ... الوضع ده زى ما هو باين فى الرسمة بيبرد الهواء من داخل العربية فقط .... مش بيجيب هوا من الخارج ... وده طبعا افضل لاداء التكييف لانه بيبرد الهواء اللى هو كان مبرده قبل كده ... فمش بيحتاج يبذل مجهود فى التبريد كتير ... هو بيبرد الهواء مرة واحدة وبعدين التبريد بعد كده بيبقى اسهل للتكييف لانه الهواء موجود داخل العربية بارد
الوضع اللى على اليمين ... ده بيجيب هواء من خارج السيار ويبرده ويطرد الهواء اللى كان جوه ... يعنى بيجدد الهواء بشكل تلقائى ... وده معناه ان التكييف هايفض يبرد فى هواء سخن جاى من برة العربية على طول ... وده طبعا بيخليه شغال باقصى طاقة على طول وده مش حلو على اداءه
كل حاجة طبعا ليها ميزة وعيب ... يعنى الوضع اللى على الشمال لو شغلته ومافتحتش الشباك لمدة 3 ساعات مثلا لو رايح اسكدندرية وماشى براحتك ... الهواء هايفضل موجود ومش هايتجدد والناس اللى فى العربية هتحس ان الهواء مش نقى وممكن تتخنق من قلة الاكسجين ... اغلب تعليمات تشغيل المركبات بخصوص التكييف بيقولو انك لو شغلت الوضع ده ماينفعش اكتر من 45 دقيقة ... لازم تقلب على الوضع التانى 5 دقائق او تفتح شباك العربية ... عشان الهواء اللى فى العربية يتجدد
بردو من فوايد الوضع اللى على اليمين : انك ممكن تفتح المروحة بس وتقفل زرار ال a/c وتخلى الدراع على الوضع اليمين
هتلاقى هوا طالعلك من الهواية وجاى من برة العربية ... ده مفيد لو انت ماشى بالليل والجو حلو بره وانت مش عاوز تفتح الشباك عشان الصوت لو انت ماشى بسرعة عالية ... ممكن تعمل الحركة دى وتستغنى عن فتح الشباك
حاجة اخيرة : الصفحة رقم 3 فى الموضوع ده فيها صور العربية ... الصورة رقم 7 فيها التكييف وكل زرايره بالتفصيل
اسف للاطالة ... تقبل تحياتى

تقرير اقل ما يوصف او يتقال عنه انه تقرير رائع وانا عن نفسي استفدت منه كتير فشكرا ليك بجد ...

المشاركة الأصلية كتبت بواسطة midoamro

ركبته فين وكلفك كاااام

ايوة فعلا ركبته فين وبكام وازااي وحجات كتير اووي لان موضوع الازاز الكهرباء شاغل ناس كتير وناس يقولوا ينفع وناس يقولوا لاء عشان هيحصل قطع في دفيرة الكهرباء غير كدا التوكيل مش بيركبه وجهاز الرفع اصلا مش عندهم...
تحياتي

المشاركة الأصلية كتبت بواسطة mnon_mahmoud

تقرير اقل ما يوصف او يتقال عنه انه تقرير رائع وانا عن نفسي استفدت منه كتير فشكرا ليك بجد ...

بس كنت عاوزة استفسر عن حاجه ...
-----------------------------------------
هو التكييف بيشتغل لو العربيه واقفه ولا لازم الموتور يكون شغااال؟

المشاركة الأصلية كتبت بواسطة elkingg36

الف الف شكر وجزاك الله خيرا فعلا وصف شامل والف شكر مرة تانيه

العفو على ايه ده واجب ... كلنا هنا عشان نستفيد
اى خدمة انا تحت امرك

المشاركة الأصلية كتبت بواسطة mnon_mahmoud

بس كنت عاوزة استفسر عن حاجه ...
-----------------------------------------
هو التكييف بيشتغل لو العربيه واقفه ولا لازم الموتور يكون شغااال؟

لا شكر على واجب ... لازم كلنا نساعد باى معلومة مفيدة
بخصوص التكييف مع الموتور .... لازم تكون العربية دايرة عشان التكييف يشتغل
انما المروحة فقط ممكن تشتغل والموتور واقف ... انتى محتاجة بس تفتحى كونتاكت ( اول وضع لمفتاح العربية اللى بيخلى اللمب اللى فى التابلوة تنور) هتلاقى المروحة بس اشتغلت ... ولما تدورى العربية هتلاقى التكييف اشتغل

مشكور جدا على ردك بس انا عندى استفسار تانى انا بعد انقل على الاول بلاقى العربية بتمشى لوحدها سواء ضاغط على الدبرياج او من غير ما اضغط ومن غير ما رجلى تلمس البنزين مش عاف دة سببة اية يريت حد يفدنى ضرورى

المشاركة الأصلية كتبت بواسطة ibrahimahmed

لا شكر على واجب ... لازم كلنا نساعد باى معلومة مفيدة
بخصوص التكييف مع الموتور .... لازم تكون العربية دايرة عشان التكييف يشتغل
انما المروحة فقط ممكن تشتغل والموتور واقف ... انتى محتاجة بس تفتحى كونتاكت ( اول وضع لمفتاح العربية اللى بيخلى اللمب اللى فى التابلوة تنور) هتلاقى المروحة بس اشتغلت ... ولما تدورى العربية هتلاقى التكييف اشتغل

شكرا ليك...

المشاركة الأصلية كتبت بواسطة a_b77710

مشكور جدا على ردك بس انا عندى استفسار تانى انا بعد انقل على الاول بلاقى العربية بتمشى لوحدها سواء ضاغط على الدبرياج او من غير ما اضغط ومن غير ما رجلى تلمس البنزين مش عاف دة سببة اية يريت حد يفدنى ضرورى

حاول تتاكد ان مفيش حاجه لامسه دواسه البنزين او ضاغطها عليها زي دواسه الارضيه وممكن يكون سلك الاكسراتير حاول بس تتاكد من ان مفيش حاجه ضاغطه علي دواسه البنزين او لامساها...