الموضوع: حد عمل شهاده ((( قناة السويس ))) من البنك الاهلى المصرى

المشاركة الأصلية كتبت بواسطة م. حاتم السباعي

لي ملحوظة بسيطة كده علي موضوع المساهمة في المشروع القومي والحس الوطني وما الي ذلك

الشهادات بفائدة اعلي من غيرها فأين هو الحس الوطني في ذلك

يعني تعالو نتخيل معا ان الدولة قالت للمواطنين سلفونا لعمل مشروع القناه الجديدة زي موضوع صندوق تحيا مصر كده

فأذا بالناس ودن من طين وودن من عجين اﻻ البعض ذهب بالفعل وتبرع هنا فقط نقول فعلا هذا حس وطني وتضحية من اجل الوطن

تعالو نتخيل ان الدولة اعلنت انها ستصدر شهادات بفائدة 7 % فقط بحيث يساهم كل مواطن في المشروع

هل كان سيقوم هؤﻻء المواطنون بسحب مدخراتهم من البنوك وشراء شهادات بعائد اقل من عائد الودائع في باقي الشهادات العادية بلاتينية وارجنتينية وبرازيلية

ولو فعلو ذلك فهنا فقط نقول لهم تعظيم سلام انتم بالفعل لديكم حس وطني عن غيركم

طيب لما الفائدة 12% يعني اعلي فائدة موجودة وتتعداها كمان يعني تجارة بحته ايه بقي لازمة الكلام بتاع الحس الوطني والمساهمة وغير المساهمة اذا كان مساهمة يبقي كان من باب اولي وضع الفلوس وتحويل العائد الي صندوق تحيا مصر مثلا

او اصدار الشهادات بقيمة اقل من غيرها للمساهمة في المشروع ﻻننا جميعا نعلم ان الفلوس اللي هتدفع بها الفوائد من هيئة قناة السويس يعني من فلوس الشعب اللي هو اصلا منتظرها في ميزانية لدولة كل عام
سيتم اقتطاع جزء من هذا الدخل لصرف قيمة الفوائد يعني سنة كاملة اذا تم اﻻفتتاح بعد عام كما قالو سيتم دفع الفوائد من عائد قناة السويس الحالية

فارجو ان نهدأ قليلا وﻻ نقول الحس الوطني والموضوع كله تجارة بحته ومكسب وخسارة

تحياتي للجميع

استاااااااااااااااااااااا ذ

السوال هنا: هل لو كانت الفوايد اقل او نفس قيمتها فالبنوك الاخري كان التوافد والتزاحم بالمنظر ده ؟؟؟؟
معتقدش. اذن فالدافع مادي بحت ليس وطنية كما يدعي البعض ( ومن حق صاحب المال يشوف مصلحته ومين هيديله فوايد اكتر ويخليه معاه ).

فقط نسمي الاشياء بمسمياتها ولا نعظم شيء ونعطيه اكبر من حجمه.

اهرى يا مهرى و انا مش على مهلى. . . ده شعار الناس تجاه الموضوع
يعنى ايه؟ يعنى فى وسط الحوارات البيزنطية اللى من نوعية الكلام اللى فى الموضوع ده. . . حصيلة انهاردة بس 8% من اجمالى المبلغ المطلوب يعنى اكتر من 5 مليار جنيه من اصل 60 مليار و بالمعدل ده الليلة كلها هتخلص فى اسبوعين. . . هذه واحدة

و خذوا ثانية. . . الشهادات دى بنسبة الفايدة دى مش اول مرة تنزل السوق بل من سنة بالظبط كانت شهادات ال 3 سنين ايا كان مسماها حسب البنك المصدر كانت فايدتها 12.5% يعنى اعلى كمان من شهادات القناة. . . يبقى التسارع المرة دى ايه سببه؟ وطنى ده و لا مش وطنى يا متعلمين يا بتوع المدارس :-)

خدوا بقى القاضية. . . انا كنت فى البنك النهاردة من 8.5 صباحا. . . لقيت واحد داخل عمال يتخانق. . . انا هنا من الفجر يا عالم. . . قعدوا يهدوا فيه و قعدوه عند موظفة هادية انا كمان بحب اتعامل معاها. . . شاورتلها قالتلى استنانى بعد الحاج. . . و لما قرب الحاج الغضبان يخلص قعدت امامه فى مكتب الموظفة اللى كانت بتخلص فى حاجته. . . اللى هى ايه. . . شهادتين فى القناة واحدة بألف و واحدة ب 100 جنيه. . . لفت نظرى مبلغ ال 100 جنيه و مقدرتش اسكت و قلتله. . . بس ال 100 جنيه دى يا حاج مش هتفيدك شهادتها حاجة. . . دى هتاخد فايدتها اللى هى كلها 60 جنيه فى اخر ال 5 سنين. . . قالى كلمة اذهلتنى و معرفتش بعدها انطق غير انى اقوله الله يبارك لك يا حاج. . . قالى يابنى بس انا عايز اشارك و هو ده اللى معايا. . . و انتهى الكلام. . . و انتهت رسالة واحد مصرى عادى غلبان لأى مشكك. . . و عشان خاطر الراجل ده بالذات و كل اللى زيه هتتعمل القناة. . . و لازم تتعمل. . . بالعند فى كل المشككين. . . و خلينا احنا لارج و مش هنقولهم موتوا بغيظكم زى ما هم كانوا بيعملوا لما كانوا فاكرينها دايمة لهم. . . سبحان من له الملك يعز من يشاء و يذل من يشاء

المشاركة الأصلية كتبت بواسطة باسم يوسف

الناس واقفه طوابير علي البنوك و لا طوابير العيش و التموين

تحس انهم اول مره يشوفو شهادات استثماريه او ما شابه

و تلاقي واحد يقولك انا بساهم في اقتصاد مصر

طب لو حصل ثوره و لا اي بلاء ازرق و المشروع وقف ؟

لو كانت الشهادات بدون فوائد او بفوائد ضعيفه ؟

كنت هتقول بساهم في اقتصاد مصر ؟

انا مش عارف الثقه دي الناس جايباها منين ؟

يمكن انا اللي فيا حاجه غلط و مش فاهم

روح اشتري الشهادات دي لما المشروع يبقي متواجد علي ارض الواقع و تشوف السفن رايحه جايه بعينك

او علي الاقل لما يكون في دراسه جدوي منطقيه للمشروع

مش يتقال حفر علي الناشف و في سنه واحده و تروح تشتري الشهادات

الناس ملهااااااااش دعوه بالمشروع يبقى موجود او لا دى مش سهم قناه السويس دى شهاده استثمار بنكيه مضمونه من البنك اصل و ارباح حضرتك مشترتش شهادات قبل كده ؟؟ لو اشتريت هتبقى عارف يعنى ايه هيا هيا بالظبط بس مع عائد اعلى الحكومه ملتزمه زى الشهادات بالظبط انها هتدفع الارباح و راسل المال اصلا الشهادات العاديه فلوسها برضه بتروح للدوله على شكل سندات حكوميه الدوله بتبيعها للبنوك و تديهم فايده اعلى شويه من الى بيدوها للناس و دى نفس الكلام بالظبط شهاده اصدرها البنك المركزى مش شركه قناه السويس يتاخدها من البنوك الحكوميه مش من جوه شركه و لا تتداول فى البورصه

و هما قاصدين يعملو كده قاصدين ينزلو شهادات مش اسهم عشان كده عشان عارفين كويس ان الناس بتحب تحط فلوسها فى البنوك الحكوميه المضمونه و تاخد شهادات مضمونه و علو سعر الفايده لنفس الكلام عشان الناس تشترى دى بالظبط و بكده يبقو استفادو الفلوس و الشكل العام ان الناس هتموت على بناء قناه السويس الجديده اما لو كان نزل اسهم كان هو نغسه عارف ان الناس هتقول اشترى لما اشوف المشروع فيه مكسب ولا لا لان الاسهم فيها المكسب او الخساره

و انا متفق تمما مع كل الى بيقول الناس بتشترى عشان ال 12 فى الميه و لانها شهاده مش سهم و مفيش اى مخاطره لكن هما حبو يعملو الشكل العام و نجحو فيه كل العالم شايف طوابير نفسها تشترك فى قناه السويس :)

تعديل بسيط. . . الحصيلة النهائية للنهاردة هى 6 مليار بالتمام و الكمال حسب اخر تصريحات لهشام رامز محافظ البنك المركزى يعنى 10% من اجمالى المبلغ يعنى بالمعدل ده الليلة كلها هنخلص فى 10 ايام فقط لا غير. . . و اهرى يا مهرى :-)