الموضوع: اخيرااا فلوانس 2015 + توضيح لكل محتار

المشاركة الأصلية كتبت بواسطة dr.mostafaa

ربنا يباركلك يا أيمن باشا، وبإذن الله بكرة هاتكون الأمور أسهل، فكرتنى بأيام ما كنت بارخص السيراتو فى 2011 ، بس كان معايا مندوب عشان يخلص الإجراءات، وكل اللى عمله المندوب إنى طبعا إديتله فلوس ليه وخلاص، وياريت بقى ينجز، أبدا ممشينى وراه إدى لده يا دكتور، معلش ده أهم حاجة ، دى مش عارف أيه، طب أنا استفدت أيه منك، ولا حاجة، ده حتى قعدنا فى المرور من 7 الصبح ل 1 الظهر، لا وكمان جه الآخر عند بتاع اللوحات وقاللى الراجل ده رخم فياريت تروحله لأنه لو شفنى هايضايق، قلتله ماشى ، فرحتله أنا، وكانت المفاجأة طلع راجل معرفة، وزعل جامد إنى ما روحتلوش على طول وهو كان خلص كل شىء، قلتله معلش أنا مش عارف إنك موجود هنا فى المرور وكمان أنا معايا مندوب، وبمجرد إنه شاف المندوب ولاقيته راح داخل فيه شمال بطريقة غريبة ، وإوعى ياض تكون أخدت من الدكتور فلوس، الواد سكت خالص، فقلتله لأ ما أخدش، وهو طبعا أخد ليه بس 300 جنيه، غير اللى فرقه على حبايبه.
الخلاصة إن الواحد يخلص حاجته بنفسه، لا مندوب ولا غيره
ربنا ييسرلك الحال يا أيمن باشا وتخلص المرور بكرة عشان تفضى بقى للعروسة وتنطلق

تحياتى لحضرتك

الف شكر ليك يا دكتور والله انا فعلا عملت كده مستنتش المندوب ونزلت بنفسى انهاردا خلصت كل الإجراءات من 8.30 لحد 12.30 كنت مستلم الرخصه الحمد لله واتكلفت 50 جنيه بس اديتها لواحد زقلى الورق بتاعى للكمبيوتر بسرعه شويه علشان اخلص في نفس اليوم
والحمد لله خلصت بس فعلا انا لوحدى كنت اسرع من المندوب

ويارب ابدأ فعلا اوفوق للعروسه :)

الحمد لله انا خلصت انهاردا تانى خطوه من الترخيص و هي انى رحت الصبح معايا ورقى ( ورق العربيه كامل + شهاده التأمين الاجبارى + ورق الفحص + إيصال الطفايه + نموذج 351 + طابع شرطه + 3 صوره بطاقه

دى كل الأوراق المطلوبه اخدتها وقدمتها على الشباك بعدها عملى ورقه بالضريبه الى المفروض تندفع و اوعى تنسى تمضي الورقه دى من المراجع قبل ما تطلع الخزنه وانا كنت عامل الرخصه 3 سنين دفعت مبلغ 715 ج بالظبط

اخدت وصل الخزنه سلمته لنفس الشباك اى سلمت فيه الملف بتاعى وقالى اعدى عليه بكره الساعه 11

بس انا مستحملتش الصراحه انى اخد يوم تانى في نفس الموال دفعت لوحد هناك 50 ج ماشه الورق بتاعى لحد الكمبيوتر بسرعه شويه

المهم الورقه خلص والرخصه طلعت الحمد لله بس مستلمتهاش في ساعتها

ادالى وصل بأستيلام اللوحات المعدنيه بالرقم الجديد

رجعت على الفحص و هناك لقيت واحد بيكتب النمر و بيعملها الدمغه و اخد إيصال الاستيلام وعملى عليه بصمه سريعه وادانى النمر ودفعت 30 ج

اخدت النمر و الايصال الى رحت بيه أصلا بعد ما عملى بصمه النمره عليه ورجعت تانى المرور

طلعت اثبت ان الرقم دا بتاعى في مكتب الوحات بس الى في المرور و اخد منى نسخه من الوصل و النسخه التانيه ختمها وقالى انزل استلم الرخصه

ونزلت والحمد لله استلمتها و كان يوم ابن تييييييت اوى لانى حسيت اننا لسه قدمنا كتييييير اوى اوى على ما ينصلح حال البلد :)
ا
انا هحاول اعمل الموضوع دا منفصل بره

أتمنى انى أكون قدرت افيد أي حد بيرخص جديد وربنا يوفقكم :)

اخوكم ايمن عامر