الموضوع: حوار من القلب للقلب - الجزء الأول

انا هتطوع و عايز حلقة معاكوا بس تبقى خميس و جمعة و سبت علشان اجازة اعرف اركز في الاسئلة

يا نهار أبيض .. ده كفاية الدخلة بتاعة نور دي أصعب من إمتحان إنهاردة :K15:
و انا جي من برة بفتح بفضول بقي بقول يا تري العضو رد ولا انا شيلت الليلة .. شكلي كدة هشيل الليلة .. نبدأ المعركة و كفي الله المؤمنين شر القتال :k37:

اسمح لي في البداية اقدم لك بوكيه تين شوكي ههههههههههه ارحم من الكرسي المفروش بالتين الشوكي علشان تعرف اني طيبة

طيبة جداَ .. شكلك مش هتنسي موضوع إني بدأت الحلقة قبليكي ده يا نور

اهلا بيك موتو باشا ممكن نبذة مختصرة عن بياناتك الشخصية

إسمي محمود مصطفي كمال في الكريسماس الجي أبقي 21 سنة و بدرس في رابعة إعلام و سايق سيريون حمرا

موتو باشا عرفت من بعض ردودك انك لسه طالب في الجامعه .. يا ترى ايه اسعد مرحلة دراسية مريت بيها؟؟

أسعد مرحلة دراسية مريت بيها بدون منازع كانت سنة فاضية خالص .. أصل انا قبل إعلام دخلت أدرس business بلطجة في البيت .. و لكن لأن انا معدني و عندي مدخلتش الإمتحانات بلطجة برضه .. فا علي بال ما حولت إعلام كان التحويل قفل .. فا بقت النتيجة إني بقيت صايع .. لا جامعة ولا كلية ولا شغلة ولا مشغلة .. سنة فراغ .. و السنة دي هي اللي كبرتني جامد لأني عملت فيها حاجات مكنش هينفع أعملها و انا مرتبط بجامعة و إمتحانات و مذاكرة .. يعني بقيت أنزل أقعد في الأوبرا في الكافيه اللي جنب مركز الإبداع و أستلقط فرق المسرح و أروح أتفرج عليهم و أشوف النص مكتوب إزاي و جربت أكتب نص و عجب بعض الناس و إتسرق الحمد لله .. إلي جانب إني إشتغلت في جريدة الدستور و كنت أصغر صحفي فيها (كان عندي 17 سنة و شوية) و مكنتش رايح بواسطة .. شقيت الطريق من الأول لحد ما الحمد لله وصلت لمرحلة متقدمة في الجرنال .

كان نفسك تدخل كليه غيرها؟؟

خالص .. انا من إعدادي و انا نفسي أخش إعلام .. مش حباَ في الإعلام و الرسالة و الجو ده و لكني كنت شايف تلاعب و "مسخرة" جامدة في وسائل الإعلام خاصة في الجرائد الحكومية .. إلي جانب إني بحب السينما فا كنت عايز أعرف إيه بيحصل في أوض الصحفيين و ورا كاميرا السينما و التليفزيون .

انت بتغش في الامتحاتات؟؟ طيب بتغشش ؟؟
تخيلي خالص !! خاصة من ساعة ما دخلت الكلية .. مش موضوع إني طالب مستقيم و مذاكر و مش محتاج حاجة بس مبحبش أغش .. بحل اللي عارفه و أمشي .. خاصة إن في إعلام الغش صعب لأن الإجابات بتبقي مقالية و طويلة فا مينفعش تتغش .. ساعات ممكن أغشش لو حاجة صغيرة في الخفا كدة .

رتب الاتي على حسب اولوياتك:
انا مش عايز أرتب معاهم العبادة لأن مينفعش طبعاَ أحطها إلا في المركز الأول بس لو حطتها في الأول أبقي كداب بصراحة لأن انا مقصر جامد يعني .

إلي جانب إن أصدقاء النت عندي مفيش تقريباَ .. يعني اللي مش بنتعرف عالحقيقة بتبقي برضه المسافات بعيد و صعب نصنفه صديق إلا في بعض الحالات النادرة .. لذلك فأنا أصدقاء النت اللي بحبهم غالباَ بيتحولوا لأصدقاء واقع و بنبقي مصنفين "أصدقاء" فقط .. صلة الرحم بقي ممكن جزء منها نصنفه تبع الأصدقاء لأن فيه ناس في عيلتي صحابي بس لو بنتكلم عالزيارات للناس الكبيرة و كدة انا مقصر جامد برضه فا ممكن يكون الترتيب

الأصدقاء - الدراسة - صلة الرحم

عندك فضول تعرف شكل اصدقاءك على النت اللي ماشوفتهمش لغاية دلوقت؟؟

أه طبعاَ بس لو حد مميز و شدني أسلوبه فقط .

ايه اكتر حاجة تشد انتباهك لعضو في المنتدى؟؟

لغته ( انا بركز مع الناس اللي بتحط الهمزة فوق و تحت الألف و بتعجبني أوي رغم إني مش ضليع في اللغة جامد بس بحب العربية الصحيحة و اما حد بيكتب حرف "ز" مكان "ذ" دي بتشدني جامد ) .

و تاني حاجة توقيعه .

نفسك تهاجر؟؟ ولو اه تحب تروح فين؟؟

نفسي و مني عيني .. إلي أي مكان بتحدث الإنجليزية و تحترم فيه حقوق الإنسان و يطبقون فيه أغنية محمد منير اللي بيقول فيها "يهمني الإنسان و لو ملوش عنوان" .. الحاجات اللي بفكر فيها كندا أو دولة أوروبية بس مش أمريكا .

اوصف كل عضو بكلمة او كلمتين عى الاكثر
SٍS : حبيب قلبي .. بس برضه مستني اما يقعد عالكرسي
aif : روحه جميلة .. بجد شخصية رائعة دين و أخلاق و دين و يدخل القلب من أول لقاء .. طبعاَ مش انا اللي هتكلم عليه يعني
علا عثمان : زعيمة ladies المنتدي (كمان انا بحب أسلوب علا لأن بتاخد بالها من حاجات صغيرة كدة .. يعني مش أي حد يقول إفيه فشقة بيك يا رمضان :k38:)
fiato : يغير علي بلده (و أخ لم أراه)
حسن خليل : أجدع أبو علي

بتحب التين الشوكي ههههههههههه؟

جداَ بس من غير الشوك بلاش إفترا

ستبـــقين وحيدة
يــأكل الصمت ايـــامك الحـــزينة
ثم ستـــبكين علي قصة الحـــب الوئيدة
ستبـــقين وحيدة
انا لن اوقف عمــــري عند ماضي قـــد تركتة
عند حـــب كان وهمآ
وستــــبقين وحيدة
في تــراب المدائن المهــــجورة
وستـــبقين تحت اقـــدام يأسك
ستـــحرق الاشواق قلـــــبك
وستعيشين لامــــس ضــــاع منك
انا لــــن ارجــــع اليـــــك
انالن اصـــفح عنـــــك
ستبـــــقين وحيدة
بينما الايــــــام تسير
ويذهـــــب شبـــــابك
ثم تـــاتين من الطريق البـــــعيد
ولكـــــن
أنا غيرت عمري
بعد ان اقـــتلعت انفاســــك من صـــدري
ستبـــــقين وحيـــدة



انت معايا في الرأي ان كاتب الشعر ده قاسي القلب؟؟

لأ علي فكرة الإحساس ده من أرخم الأحاسيس وهو شكله طالع عينه أكتر منها .. انا شايف إن وجهة نظره إنه كان بيحب واحدة مش بتقدره و دايماَ مش مدية إهتمام فا هو بيقولها مفيش حد هيرضي بكدة و إنتي هتفضلي طول عمرك لوحدك لأنك متعودتيش تحبي بجد .. و مفيش حد بيحب ياخد علي دماغه فا مش هتلاقي اللي يفضل جنبك و إنتي يتاخدي بدون ما تدي و بصراحة الإحساس ده محبط جداَ ، فا ممكن نقول هو نوع من القسوة المبررة لأنها كانت نتيجة لقسوة برضه و لكن بالفعل مش بالكلام .. يعني هي بهدلته فا قام هو مديها كلام من المتنقي بقي

طيب انت ممكن في يوم من الايام تكون بقسوته لاي سبب ما؟؟

أه لو في نفس الموقف غالباَ هاخد نفس رد الفعل .

تفتكر ممكن اللي حب يقتلع انفاس من احبه من صدره؟؟ ولا بيوهم نفسه بكدة

يقتلع أنفاس دي صعبة أوي ده تعبير مجازي يعني بس اللي بيبقي في الموقف ده بيبقي جواه كمية ثورة مهولة جداَ في اما بيطلعها في شكل كلام بيبقي كلام دموي جداَ .. فا هو بيوهم نفسه بكدة و لكن هو في الواقع لا يستطيع إقتلاع أنفاس قطة .. لأن ثورته دي أصلاَ كان أساسها عدم تقدير حبه .. يعني هو في الأساس محب .

ممكن الحب يتحول لكراهيه ؟؟ ولا زي ما بيقولوا اللي يحب عمره ما يكره؟؟

ممكن جدا .. ممكن الطرف الأخر يتصرف تصرفات تحسس اللي قدامه إنه كان موهوم بيه و إن إختياره كان غلط .. و لو التصرفات دي بشعة ممكن يكرهه فعلاَ .

الحب شيء اتخلق مع كل انسان واللي عمره ما حب اكيد انسان غير طبيعي
لما تكون اب ان شاء الله هتعمل ايه لو عرفت ان بنتك بتحب زميلها في الكليه او قريبها مع اعتبار انك عارف انه انسان محترم ومهذب ومحل ثقه .. لكن لسه ظروفه المادية مش مساعداه انه يخطب؟؟

هكون cool جداَ لو عرفت منها لأن ده لو يعني شئ فا يعني تقدير و ثقة و حب لشخصي و دي حاجة أفرح بيها .. و هحاول كل شئ يبقي تحت عيني لحمايتها و لكن من غير ما أخنقهم برضه .. و شئ مرحب بيه جداَ .. أصل أكيد أي بنت لازم هتتعرف بولد و تحبه و ترتبط بيه و ده شئ جميل مدام في إطار من الأخلاق و الإحترام و لو انا فاكر غير كدة يبقي بضحك علي نفسي .. و طبعاَ ده أحسن من اما يبقي كله من ورايا ، و هصبر عالولد لحد ما ظرفه تتحسن طالما هم شايفين إنهم هيكملوا مع بعض ( وجهة نظر متفائلة طبعاَ لأني غالباَ قريب هكون مكان الولد مش الأب فا بمني نفسي يعني :D )

لو بتحب واحدة كويسه ومن اسره محترمة ومفيهاش اي عيوب .. غير ان من عادات عيلتها مهر كبير وشبكة غاليه ومش ممكن يتنازلوا عنها وظروفك المادية على الاد .. هتنحت في الصخر زي ا بيقولوا وتنفذ طلباتهم ولا هتشوف غيرها ؟؟

سؤال صعب .. بس يا تري لو انا رضيت أنحت في الصخر .. هما هيستنوا عليا ؟ :D .. معتقدش لأن العيلة اللي بتفكر كدة هتقول لأ من الأول و ده لسة قدامه كتير مرفوض .. فا الموضوع متوقف عليها بقي تعمل شوية محاولات إنتحارية في البيت لإقناعهم و لو عرفت ننحت في المية حتي .

ايه رأيك في الشباب اللي بيعاكس ؟؟ وياترى انت منهم؟؟

شباب "ٍسيس" .. و انا مش منهم لأني لا أطمح إني أعرف واحدة من الشارع عن طريق معاكسة .

ردة فعلك ايه النفسية والعملية لو اتعاكست ؟؟؟

عادي مش هتبقي أزمة هرد و أهزر لأن لازم أكلم كل واحد بلغته و عقليته .. و اللي هتعمل كدة تبقي واحدة لاسعة أساسي فا هتفاهم معاها بلغتها لحد ما الموقف يعدي .

لو ربنا فتحها عليك وبقيت عسكري مرور هتعمل ايه

مش هعمل أي حاجة .. العسكري ضعيف .. و اللي عايز يعمل و يغير لازم يكون عنده شكل من أشكال القوة .

ايه رأيك في تخريد التاكسيات القديمة واستبدالها بموديلات حديثة

طبعاَ شئ كويس جداَ لأن مش معني إن معنديش عربية إني لازم أركب عربيات مبهدلة و مهكعة .. من حقي أركب تاكسي محترم و مكيف خاصة مع إفترا تعريفة بتوع التاكسي .

نفسك تعيش في محافظة غير القاهرة

إسكندرية ! بس أروح حتة تانية في الصيف .

اختار اعضاء من المنتدى وعينهم وزراء مع توضيع وزارة كل عضو وترشيح رئيس للوزاء
تتمنى وزارات معينه تتلغي .. ووزرارات جديدة يتم انشائها؟؟

رئيس الوزراء ممكن يكون سبعاوي باشا
و أرشح مينا vw_driver سابقا وزير الصناعة
توت باشا وزارة الداخلية
أحمد سامي باشا وزارة الصحة
نهي وزارة الخارجية
نور وزارة الإعلام
ميزة وزارة الإقتصاد
حسام حسن باشا لازم يمسك أمن الدولة .
علا وزارة القوي العاملة .

طبعا هلغي وزارة مجلسي الشعب و الشوري و وزارة الداخلية هقسمها بس يبقي برضه الكبير بتاعها توت باشا .. و هعمل وزارة للشيكولاتة شعارها "شكولاتاية لكل مواطن" يمسكها شيكو باشا

ايه رأيك لو العرب اتحدوا وبقينا دولة واحدة وحررنا فلسطين والعراق؟؟

أحلام وردية طبعاَ .. انا رأيي إن فلسطين اليهود خلاص صعب أو مستحيل يطلعوا منها و أكتر حاجة هتحصل إنها هتبقي دولة يهيودية فلسطينية و الأرض تتقسم بس برضه عرق الحق في الفلسطينين و عرق شعب الله المختار في اليهود مش هينام و هتفضل الحرب علي طول .

المشكلة إن فيه حروب صغيرة من تحت الترابيزة بين العرب و دي أخطر من حروب الإستعمار لأنها حتي توغلت في الشعوب نفسها .. يعني إحنا دايماَ نقول الحكومات بينها و بين بعضها و إحنا ملناش دعوة .. إنما الموضوع دلوقت إن فيه شعوب عربية معينة بتكره شعوب عربية أخري و عندها حساسية منها و الداء ده في مصر بالطبع ، و أصبح عندنا حساسية من بعض الدول العربية خاصة الخليجية و شايفبن إنهم مستعبدينا و هما شايفين إن المصري ده خدام تشتريه بالفلوس .. طبعاَ مش الكل ..

فا صعب موضوع دولة واحدة ده و إلا هتبقي دولة مش مستقرة .

طيب ساعتها هاترشح مين من حكام الدول العربية يكون رئيس دولة العرب الجديدة؟؟

الحقيقة ولا حد .. الساحة العربية سمك لبن تمر هندي

نفسك تغير ايه في مصر

حاجات كتير .. بس أهم حاجة هي عدم النظام و الفهلوة و إنعدام العدل .. يعني الضابط لو فيه تنتوفة فيميه في عربيته رخصته تتسحب .. و في المقابل أغير الروتين بتاع المصالح الحكومية عشان الناس متتبهدلش و هي بتخلص ورقها أي كان أو بتجيب رخصها .. و لو ده حصل هيلغي بالتالي الرشوة .

طبعاَ في الأحلام .. مصر عايزة يتغيرها software كامل .

هو كله شوك كدة !!؟؟