الموضوع: حوار من القلب للقلب - الجزء الأول

المشاركة الأصلية كتبت بواسطة aif

حازم بك ....
طالما انت بقي طلعت زميل مهنة ... نتوصى بيك في الاسئله
لو ح تختار بين الوظيفة والعمل الحر .... ح تختار اية ؟؟؟ ولية ؟؟
لو انت مش محاسب كنت نفسك تكون اية ؟
لو رجع بيك الزمن لورا...... كمت اتجوزت في نفس سنك اللي اتجوزت فيه ؟والا كنت اتأخرت شوية ؟
لو شغلك اضطرك تتنقل القاهرة .... تقدر تعيش فيها بزحمتها وضجيجها ؟؟
مش شايف ان حبك لفيروز بيتناقض مع حبك لتامر ونانسي ودياب ؟
انت بتشتغل في جهه شبه حكومية .... اية رأيك في الاداء الحكومي .... اقصد المؤسسات الحكومية ؟؟؟وهل يوجد منطقية و موضوعية في الرسوم اللي بتحصلها الحكومة علي كل حاجة .... حتى الركنة في الشارع ؟؟
كفاية كدة المرة دي

لو هاختار بين الوظيفة والعمل الحر وانا بالمصادفة باجمع بين الاثنين ده هايتوقف على الظروف الموضوعية او الآنية بمعنى انه حاليا وفى ظل ظروف السوق والانهيار الاقتصادة الوشيك وحالات الاحتكار الشديدة انا مضطر ان احتفظ بعملى الوظيفى
اما لو حيدنا هذه الاعتبارات كنت اتمنى ان اعمل حرا فأنا اعشق الحرية على كل المستويات رغم انى بالتأكيد احب عملى جدا كل انواع عملى الوظيفى منها والحر
العمل الحر ياصديقى تسطيع ان تبحر فيه كا تريد تستطيع ان تبدع فيه تخرج كل ملكاتك وامكانياتك وصدقنى الحكاية مش بس مكسب ورأس مال
ولكن للاسف ظروف السوق ولانى مسئول عن اسرة احبها واسعد جدا لسعادتهم وتلبية رغباتهم فمضطر احافظ على العمل الوظيفى بجانب عملى الخاص الى حين..
لو مش محاسب كان انفسى اكون مهندس هذا على مستوى المهنة اما لو كان السؤال كان نفسى امارس ايه فقط بمعنى اكون ايه وفقط كان نفسى اكون شاعر..
لا كنت اتجوزت بدرى شوية كمان وده لعدة اسباب اولا لانى كنت بحب قوى وكان لازم اتجوزها كى استمتع بحبى معها ثانيا لانى مارست حرية الحب ومارست الاستقلالية واستمتعت جدا بأولادى - وهم اصدقائى- فى سن مبكر.
لو اضطررت لانتقل للقاهرة هاكون سعيد جدا لانى اعشق القاهرة بكل مافيها وكل تفاصيلها بحواريها الضيقة وشوارعها ، بناسها، بمقاهيها ، القاهرة بالنسبة لى عشق خاص وعلى فكرة انا قضيت فى القاهرة ثمان سنوات متصلة من بداية دراسة الكلية وبعد التخرج لمدة ثلاث سنوات كان اول شغلى فى القاهرة وزوجتى من القاهرة وبالتالى انا لا اغيب عنها اسبوعيا فى القاهرة.
حبى لفيروز لا يتناقض مع حبى لنانسى وعمرو دياب لانى مؤمن بأنه لايمكن الوقوف عن نقطة واحدة وخاصة فى الفن والا لما كانت جاءت فيروز وكنا زمانا واقفين عند الخلعى مثلا او عبد الحى وانا ارى نانسى وعمرو مثلا على سبيل المثال نقلة جميلة فى عالم اصبح الجميل فيه نادر جدا وعلى فكرة انا ذكرت انى حتى وانا اسمع مايسمى بالجديد فتظل فيروز ومنير والحجار هم دائما الجديد بالنسبة لى
اما عن تامر فالحكاية انى قلت علشان اولادى بيحبوه فابضطر اسمعه معاهم احيانا وخاصة فى العربية رغم محاولاتى الكثيرة معاهم ولكن للاسف هم جزء مما نحياه ومضطر احترم رغباتهم.
تسألنى عن الاداء الحكومى؟ !!! وهلى يوجد اساسا اداء حكومى
هذا اداء بالمصادفة كل مايعن اليهم ويخدم مصالح طبقة محددة واشخاص محددين يتخذ بيه قرار
لايوجد اداء حكومى اصلا حتى نقيمه وفى هذا رد على باقى السؤال.

المشاركة الأصلية كتبت بواسطة MoToRiZeR

و إنتظر أسألتي يا أستاذ حازم (ضحكة شريرة)

اهلا وسهلا بيك وانا على احر من الجمر للاجابة

سيداتي انساتي سادتي الان مع حلقة جديد من برنامجنا حوار من القلب للقلب مع ضيفنا
hazem66

اسمح لي استاذ حازم ابدأ معاك الحلقة
ممكن تعرفنا بيك اكتر بنبذه مختصرة عن اهم بياناتك الشخصية
طبعا سيادتك عارف ان مفيش انسان خالي العيوب
ممكن تقولنا ايه عيوبك ؟؟ وهل بتحاول تصلحها؟؟ ولو شخص واجهك بعيوبك بتتقبل النقد ولا ردة فعلك بتكون ازاي؟؟
طيب ممكن كمان تقولنا اهم الصفات الجيدة في شخصيتك؟؟
تتمنى تعيش في محافظة تانية غير الفيوم ؟؟ وليه؟؟
حضرتك شايف ان في خل وفي تقدر تثق فيه ثقه عمياء؟؟
ممكن توجه كلمه لكل من
المدرس
الشباب
المرأة العاملة
امام مسجد
المراهقين
الاطباء


اتفضل حازم باشا عصير في الفاصل




اهلا بكم اعزائي المشاهدين بعد الفاصل



حيرت قلبى معاك وانا بدارى وخبى قلى اعمل ايه وياك والا اعمل ايه وايا قلبى بدى اشكيلك من نار حبى بدى احكيلك على الى فى قلبى وقللك عالى سهرنى واقللك عالى بكانى واصورلك ضنى روحى وعزة نفسى منعانى بص فى عنيه وشوف ايه اللى انكتب فيها

معظمنا مرت علينا اوقات كنا بنحب اغاني ام كلثوم جدا ... ياترى سيادتك كنت بتحب ام كلثوم؟؟ طيب دلوقت بتسمع لها؟
بيفكرك بحاجة مقطع الاغنية السابق؟؟
تفتكر اللي قلبه يحتار يداري ويخبي ولا يصارح؟؟
ليه بعض الرجال عزة نفسهم بتخليهم يداروا مشاعرهم ؟؟ حضرتك شايف ان التعبير عن المشاعر ممكن يقص من قدر الرجل وهيبته؟؟
طيب داريت مشاعرك قبل كدة وبعدها حسيت بالندم واتمنيت لو الايام ترجع لورا علشان تصرح بمشاعرك؟؟؟
مين المطربين القدام والجداد اللي تحب تسمع لهم؟؟

فاصل وسنعود



ايه رأيك في تعصب بعض الفئات في مصر تجاه اهالي محافظات معينه
يعني مثلا واحد يقولك انا بكره المنايفه لانهم بخلاء .. وواحد يقولك انا مجوزش بنتي لفلاح من بحري ... وواحد يقولك الصعايدة مجرمين

لو حضرتك تاجر وعندك بضاعه معينه قليله في السوق .. ممكن تحتكرها علشان تكسب اكتر

ايه رأيك في فضايح ظباط الشرطة الي ظهرت بكثرة على النت وبرامج التليفزيون في الفترة الاخيرة من ضرب وتعذيب للمشتبه بهم

نفسك توجه رساله معينه لمسئول معين في مصر؟؟ على الاعتبار ان المسئول ممكن ياخد بالنصيحة


تعتقد الشعب المصري فعلا ما ينفعش معاه غير سياسة الكورباج

المشاركة الأصلية كتبت بواسطة نور القمر

ممكن تعرفنا بيك اكتر بنبذه مختصرة عن اهم بياناتك الشخصية

الاسم:حازم محمود عبدالعليم
المهنةالحكومية (الوظيفة): مدير عام الشئون المالية بالغرفة التجارية بالفيوم
العمل الخاص: صاحب ومدير الشركة العربية للتكييف
السن: 43 سنة
الحالة الاجتماعية: متزوج ولدى بنت فى اولى كلية الصيدلة وولد فى ثانية اعدادى
هواياتى: القراءة - السفر - الاستمتاع بالموسيقى والشعر
طبعا سيادتك عارف ان مفيش انسان خالي العيوب

ممكن تقولنا ايه عيوبك ؟؟ وهل بتحاول تصلحها؟؟ ولو شخص واجهك بعيوبك بتتقبل النقد ولا ردة فعلك بتكون ازاي؟؟

بالتأكيد مافيش حد خالى من العيوب ولكن اظن ان اقل الناس معرفة بعيوبهم هم اصحابها بمعنى انى آخر واحد ممكن يعرف عيوبه ولكنى هاحاول واعتقد ان من اهم عيوبى هو العصبية حينما اكون مشغول وهناك من يحاول ان يعطلنى عن عملى..
من عيوبى الجرأة فى مواجهة الاخرين احيانا اكون شخص غير دبلوماسى بالحد المطلوب.
مسالة انى باحاول اصلحها بالتاكيد بحاول بمعنى حينما اظبط نفسى متلبسا بالعصبية مثلا بحاول اراجع نفسى واهدى قليلا ومثلاحينما اكتشف انى صريح اكتر من الازم فى هذه الحالة بحاول التزم الصمت.
انا اولادى دايما بيواجهونى بمسألة العصبية وباقبل تماما بل وبحاول اعدل المسالة فورا اما مسالة الصراحة المفرطه فاصدقاء كثيرون لفتوا انتباهى لها وباعترف انى الى الان مش عارف ابطلها اما ردى فعلى عادة هو الابتسام

طيب ممكن كمان تقولنا اهم الصفات الجيدة في شخصيتك؟؟

اظن ان من اهم مايراه اولادى وزوجتى واصدقائى وكل فيما يرون هوا : هم يدعون انى امتلك حنانا مفرطا ورومانسية الى حد ما.
اما ما أراه فى نفسى رغم اختلاف البعض فيه انى لا اقبل انصاف الحلول واحب الالوان المحددة، لا احب ان اتخذ قرار - اى قرار- دون تفكير عميق وتحليل لكل ما يتعلق به

تتمنى تعيش في محافظة تانية غير الفيوم ؟؟ وليه؟؟

انا احب الفيوم جدا ليس فقط لانها بلدى انما لانى اظن انها من اجمل المدن - تسطيعين ان تعيشى بها - هناك دائما حالة من البهجة احياها فى الفيوم
اما اذا تمنيت ان اعيش فى محافظة تانية فاتمنى ان اعيش بالاسكندرية لانها اجمل ما رأت عينى من مدن - وانا لفيت كتير شوية- واعشق السفر

حضرتك شايف ان في خل وفي تقدر تثق فيه ثقه عمياء؟؟

بالتأكيد هناك خل وفى والا لما كانت للحياة معنى
الحياة لا تكتمل اساسا الا بالخل الوفى والحبيبة والحلم

ممكن توجه كلمه لكل من
المدرس
الشباب
المرأة العاملة
امام مسجد
المراهقين
الاطباء

المدرس: اعانه الله على وزارته وسوء التخطيط ، المدرسون هم اقل الناس شأنا -للاسف الشديد- فى بلد لايعنى للعلم
الشباب: هناك فى الحياة اشياء كثيرة مهمه وجميلة ، اشياء تستحق ان نراها ونمارسها اجميل واهم كثيرا من موبايل آخر موديل او نغمة جميلة او بنطلون ساقط ... واللستة طويلة
المرأة العاملة: حجر الزاويةفى كل بيت مصرى - عاملة ، وأم ، وزوجة وحبيبة .. حاجات كتير قوىواجمل مافيها انها لا تشتكى
امام مسجد: ارجوك ارجوك اقرأ شوية قبل الصعود الى المنبر
المراهقون:اولادى - بحبهم جدا واتمنى يمروا على هذه المرحلة دون خسائر
الاطباء: ليس الهدف الوحيد فى هذا العالم هو كنز الاموال، كنتم ملائكة الرحمة.

حيرت قلبى معاك وانا بدارى وخبى قلى اعمل ايه وياك والا اعمل ايه وايا قلبى بدى اشكيلك من نار حبى بدى احكيلك على الى فى قلبى وقللك عالى سهرنى واقللك عالى بكانى واصورلك ضنى روحى وعزة نفسى منعانى بص فى عنيه وشوف ايه اللى انكتب فيها

معظمنا مرت علينا اوقات كنا بنحب اغاني ام كلثوم جدا ... ياترى سيادتك كنت بتحب ام كلثوم؟؟ طيب دلوقت بتسمع لها؟
بيفكرك بحاجة مقطع الاغنية السابق؟؟
تفتكر اللي قلبه يحتار يداري ويخبي ولا يصارح؟؟
ليه بعض الرجال عزة نفسهم بتخليهم يداروا مشاعرهم ؟؟ حضرتك شايف ان التعبير عن المشاعر ممكن يقص من قدر الرجل وهيبته؟؟
طيب داريت مشاعرك قبل كدة وبعدها حسيت بالندم واتمنيت لو الايام ترجع لورا علشان تصرح بمشاعرك؟؟؟
مين المطربين القدام والجداد اللي تحب تسمع لهم؟؟

ام كلثوم هى الست ام كلثوم اكيد بحبها وسمعتها كل مراهقتى وصباى واحلام حبى المتكررولازلت اسمعها من حين لآخر وخصوصا فى السفر ليلا بالعربية
الاغنية دى بالتحديد انا مش عارف ليه انتى اختارتيها وكأنك سألتينى فجأة ايه احب اغانى ام كلثوم ليك كنت هاقولك حيرت قلبى معاك، اما بتفكرنى؟ طبعا بتفكرنى بأجمل فترة فى حياتى - انا كنت وانا طالب فى الجامعة - جامعة القاهرة احب اسافر من الفيوم للقاهرة ليلا وعلى مدار 5 سنوات لانى عدت سنة فى الكلية كنت مابسمعش غيرها فى العربية طول مانا مسافر- بتفكرنى بارق حب عيشته او نقدر نقول اول حب واللى انتهى كالعادة بجملة خلينا اصحاب احسن
انا مع الوضوح والمباشرة وخصوصا فى المشاعر
انا بحب - مثلا - يبقى باحب - الحب اجمل من ان نخجل منه او نداريه
فيه فعلا رجالة متصورين ان عزة نفسهم تخليهم يداروا حبهم وباالتأكيد انا اراهم هم الخاسرون ، الحب جميل واجمل مافيه ان نحياه.
الحب لاينقص من قدر اى شخص رجل او امرأة
الحب - ان كان حبا - يعطى صاحبه رونقا جميلا - الحب يعلى من شأن صاحبه
عمرى ماداريت مشاعرى حتى آخر لحظةوخصوصا مشاعر الحب
انا الى الان بعد زواج 18 سنة باقول لزوجتى يوميا انى سعيد وممتن لها لانى احببتها واولادى عارفين كده وعايشين معانا ده.
المطربين القدام - وانا مش فاهم يعنى ايه قدام- انما على اعتبار الزمن فقط اقدر اقول من عشاق فيروز - منير- الحجار بشكل عام وفى كل الاوقات
وام كلثوم وعبدالحليم حسب الحالة المزاجية
عبدالوهاب وفايزة ونجاة فى اوقات السلطنة
اما الجداد فاقدر اقول : فيروز ومنير والحجار وممكن ازودلهم اليسا - عمرو دياب - نانسى عجرم
وتامر حسنى علشان خاطر ريم وحسام (اولادى)

ايه رأيك في تعصب بعض الفئات في مصر تجاه اهالي محافظات معينه
يعني مثلا واحد يقولك انا بكره المنايفه لانهم بخلاء .. وواحد يقولك انا مجوزش بنتي لفلاح من بحري ... وواحد يقولك الصعايدة مجرمين

نوع من العنصرية وعدم فهم، كل محافظة - كل منطقة - كل متر فى الدنيا كلها مش بس فى مصر لها طابع وطعم وروح خاصة جدا

لو حضرتك تاجر وعندك بضاعه معينه قليله في السوق .. ممكن تحتكرها علشان تكسب اكتر

انا بالفعل تاجر واحيانا بيحصل اللى حضرتك بتقولى عليه ان صنف معين من التكيف مثلا ينقص فى السوق اثناء الموسم وهاكون كداب لو قلت انى هاعمل عليها اوكازيون انما كمان مش باحتكرها بمعنى انى مابنكرهاش وباقول انها عندى ولكن اكيد سعرها بيرفع شوية

ايه رأيك في فضايح ظباط الشرطة الي ظهرت بكثرة على النت وبرامج التليفزيون في الفترة الاخيرة من ضرب وتعذيب للمشتبه بهم

مش جديدة الفضايح - الجديد بس هو وسائل الانتشار زى النت والفضائيات انما طول عمرنا عسكر وشعب وطول عمر العسكر من ايام دولة المماليك اصحاب فضائح

نفسك توجه رساله معينه لمسئول معين في مصر؟؟ على الاعتبار ان المسئول ممكن ياخد بالنصيحة

زى ماتكونى بتسالينى نفسك يطلعلك خاتم سليمان على اعتبار ان العفريت هايطلعلك
انتى حضرتك بتتخيلى المستحيل
اى مسئول فى مصر ممكن ياخد بالنصيحة؟
ومع ذلك المشكلة ان قائمة النصائح الممكنة اطول من ان تكتب فى مجلدات
انا متصور ان اذا كان المسئول ممكن ياخد بالنصيحة فانا انصحة ان يستقيل من منصبه

تعتقد الشعب المصري فعلا ما ينفعش معاه غير سياسة الكورباج

الشعب المصرى هو الشعب الوحيد الى لايصلح معاه سياسة الكورباج
المشكلة اننا بطلنا نقرا تاريخ
التاريخ بيثبت ان الشعب المصرى دائما ما تأتى عليه لحظة ويخرج المارد من القمقم
الشعب المصرى كل مشكلته ان صبور اكتر من اللازم ولكن ما اذا نفذ صبره
وتفتحت بصيرته فعلى الحكام وعلى الظلم السلام

اشكرك جدا يانور ويارب اكون رديت بوضوح

هذه فكرة ممتاذة .. ولك كل الشكر والاحترام والتقدير

اولا انا باشكرك يانور على الاستضافة
واشكرك كمان على العصير
انا حبيت بس اقول انى موجود بس ادينى نص ساعة من دلوقت وابدأ الاجابات والرد

المشاركة الأصلية كتبت بواسطة M.Mokhtar

انا لسه شايف الموضوع ده وفعلا موضوع اكتر من رائع
احيكى يا نووور على الموضوع الجميل ده

وفى ناس كتير حلوه انتى استضافتيهم بس انا ملحقتش :(

المهم انا متابع من دلوقت واستنوا اسألتى بقى :)

اهلا بيك بشمهندس
معلش بأة مفيش نصيب تشارك في الحلقات اللي فاتت
ان شاء الله في حلقات جاية هتكون مفاجأة للكل

نورت الموضوع بمشاركتك الجميلة