الموضوع: حوار من القلب للقلب - الجزء الأول

المشاركة الأصلية كتبت بواسطة نور القمر

ايه يا جماعه هو كلام شنوري طلع صح وبعد كلامه محدش بيلاقي حاجة يكتبها
واضح ان ده قدري يا نور اني اتكلم ومحدش يرد عليا
اي نعم هوبيخلص على كل الكلام بس مايمنعش ندور له على شوية اسأله تاني
شكلها حتبقي اطول حلقه في تاريخ حوار من القلب وبالمره اعمل عيد ميلادي معاكم هنا
ماهو انا موراييش غيركم

شنوري انت بتاكل كل حاجة اصغر منك
لا انا قولت اي حاجه مش كل حاجه ودي تفرق كتير لو كل حاجه حبقي زي المكنسه اللي بالكهربا انما اي دي بتخضع للاختيار وعموما انا بقول بسم الله وباكل
ممكن تقولنا بتاكل كام وجبة في اليوم
امبارح مثلا ودا العادي بتاعي اكلت مولتوا وبسكوت بالشيكولاته الساعه 10 بالليل
واتغديت الساعه 2 بالليل ودا العادي بتاعي
-احيانا ببعت اجيب اكل وانا في المحل واحيانا اكتر بنسي اكل فعلا بنسي بكل معاني الكلمه اني ممكن علي الساعه 11 او 12 بالليل افتكر اني ما اكلتش حاجه طول النهار
ودا بيحصلي لما يكون عندي شغل محتاج تركيز جامد
ووممكن تقولنا تقريبا مكونات كل وجبه ايه وكمياتها
اقل من العادي باكل لمجرد اني جعان وببطل اكل لما اشبع
الا بقي لو الجو والصحبه تفتح النفس ففيها باكل لحد ما ايدي توجعني مش لحد ما بطني توجعني
شنوري بتحب الاكل البيتي اكتر ولا التيك اواي
انا بعشق الاكل البيتي وبحب التيك اواي برضه بس بحس انه مفيهوش بركه
شنوري ايه اكتر اكله بتحبها
لحد وقت قريب مكنتش باكل اغلب الخضروات كان اخري اكل الملوخيه والباميه والقلقاس وقعدت سنين ما اكلش غيرهم انما ربنا هداني علي كبر وبدات اعيش حياه طبيعيه
-بعشق الاكل الحراق باكل الفلفل ده بشكل غير ادمي وملهوش تاثيرات سلبيه علشان محدش مخه يروح لبعيد
-ومش باكل الاكل غير وهو مغلي نار لدرجه ان اختي علقت عليا مره وقالت لوالدتي هاتيله البوتاجاز اللي بيكون في الافراح وحاطين عليه الاكل وهما بيقدموه
نيجي بقي للاكل اللي بعشقه (اللحوم-الاسماك-الكوارع ومايتبعها من اكسسوارات )
شنوري انت ممكن تدخل المطبخ وحاول تعمل اكلات بنفسك؟؟ وياترى النتيجة كام على عشرة؟؟
انا مبدخلش معارك خسرانه يا افندم ههههههههه
بس كانت ماما بتعمل عمره وقعدت اسبوعين لوحدي في البيت
كنت مقضيها تيك اواي
ومره فتحت الفريزر لقيت سدق فعملت مكالمه للدعم الفني بتاعي وقتها وجيبت طريقه عمل السدق وفضلت اهري نفسي سدق لدرجه اني حسيت ان القطط حتجري ورايا في الشارع
طبعا البيض بانواعه
بعدها ربنا كرم بصينيه بشاميل
لحد ما الوالده رجعت بالسلامه وبدات استرجع صحتي ههههههههههه
بس انا بعرف اعمل الرز والمكرونه والفراخ وحاجات تانيه كتير نظريا مجربتهاش عملي مستني لما اجربها عند حد من اصحابي علشان ماما حتزعل اوي لو حرقت المطبخ بتاعنا
شنوري اكلت كام حتة لحمة في مقابلة المنتدى وكام ربع فرخة
حتتين وربعين وانا بستمتع بالربعين لقينا فيهم دم فحاولنا نشويهم تاني ونكمل اكل وبس
كمان المقابله كان فيها فراخ ولحمه ومكرونه وبطاطس ومخلل وسلاطات وهريسه وفاكهه
فكان فيه حاجات كتير الواحد يكمل بيها اكل بعد ما قام جعان
اللي حيقولي ما انت بتاكل كتير حفقوله راجع الجزء بتاع الحاله النفسيه والجو والصحبه


شنوري انا ملاحظة ان في اعضاء كتير بيناغشوك... تعتقد ليه
علشان انا غلبان وفحالي وماشي جنب الحيط فهما بيفتروا عليا
ليه دكتورسامي مصمم انك اسمك شنهوري
ماهو لو هو بس مكنتش سكتت انما دي ناس كتير شنهوري وشنيوري وشرنوبي وشنتوري وطالما حييجوا في الاخر يدفعوا فلوس فمش حتفرق حرف
وفيه ناس بتحاول تستظرف بالنها تنطقه غلط من باب السخريه فيكون ردي عليهم انهم لو مش عارفين ينطقوه فانا اسمي محمد ممكن ينادوني بيه
شنوري ممكن كلمة موجزة عن كل عضو فيما لا يقل عن 5 سطور
دكتور سامي ربنا ينوله اللي في باله وتيجي بالسلامه هو خبز الريموت والخطوه الجايه انه حيخبز العربيه وكان نفسي اشوفك اوي يا دكتور في المقابله بس الظروف كانت اقوي مننا
- شاركي-زميل رحله التجميع الي بائت بالفشل لعدهم توافر قطع الغيار المناسبه
مشائتش الظروف اني اشوفه او اتكلم معاه كتير بس في اول فرصه مش حتاخر ولازم اقعد معاه
- نادر-من يوم ما زقني وانا عاوز اشوفه برضه واكيد يوم ما اقابل شاركي لازم يحضر
- احمد سو بقوله انا مكانك اهوه بتسال وبسببك دخلت في حوار من القلب للقلب
-ولل3 مع بعض احب اقولهم اني اتشرف بوجودي معاهم في مكان واحد حتي لو كان مكان غير واقعي وبجد بجد بجد انا مش حفوت فرصه ممكن اسعد فيها بصحبتكم

- احمد ابراهيم -الحكمه وخفه الدم وكنت مبسوط جدا بوجودي معاه في عيد ميلاد المنتدي
- بسكوتة -تحسي انها شقيه كل ما افتح موضوع في المنتدي الاقيها جواه ههههههههه
بس صعبانه عليا اليومين دول كل شويه عمالين يشنقوها في لعبه المشنقه زي ما تكون حرامي وكل شويه بيمسكوه
- نور العمر نووووووووووووور العمر غيرت اهداف حياتي ونويت لما ربنا يكرمني وابقي ملياردير اشتري كل العربيات ال 127 اللي في البلد واحرقهم قدامها
- مسلمة -محصليش شرف الوجود معاها في موضوع واحد بس بتابع ردودها ومشاء الله عليها مثال للطيبه والتدين
- وانا كمان بلاش رايي فيكي دلوقتي وانا محطوط في الامتحان ده
بس انتي عارفه اني بعتبرك اخت اصغر ليا وربنا يخليكي للمنتدي بمواضيعك المتميزه اللي فيه
-كلمه لكل اللي حضرتك ذكرتيهم ولناس كتير هنا
انتم فعلا غيرتم حياتي بقيت بتكلم عنكم مع ناس متعرفكمش كشخصيات مش كاسماء
حسستوني ان فيه ناس محترمه في بلدنا
حستوني ان فيه ناس ممكن تحبني من غير ما يكون ليهم هدف او مصلحه
لو ليا اخوات تانيين مكنتش ححبهم اكتر من حبي ليكم ولا حقضي معاهم الوقت اللي بقضيه معاكم
ربنا يخليكم ليا ويزيدكم من نعمته عليكم ويباركلي في نعمه معرفتكم

شنوري لو الادراة طلبت منك تكون مشرف على قسم في المنتدى هتختار انهي قسم؟؟
اي قسم يكون محتاج تنظيم بعيدا عن الاقسام التقنيه زي الاجتماعي او العام او البيع والشرا او المنقولات وربنا يعينني
ياترى ممكن تدي حد من اصدقاءك ايقاف؟؟
ممكن انبهه اول مره لو غلطته مش كبيره انما لو الموضوع لازم فيه ايقاف
فالحق مفيهوش اصحاب لو انا غلطت حوقف نفسي
شنوري لو بقيت ادمن في المنتدى هتغير ايه فيه؟؟ وهتختار مين يكون مشرف الاجتماعي ؟؟مسكتوا القط مفتاح الكرار يعني
انا كنت شايف العضوات في مناقشه مع الدعم الفني بيطلبوا اضافه قسم للمطبخ
فانا ممكن احط قسم للتجميل علشان نشم شويه برفانات متكونش رجالي وسط ريحه المواتير المفوته واتيال الفرامل اللي طالعه من الورشه جزا الله القائمين عليها كل خير
وحلغي قسم الاخبار المنقوله لانه بيفكرني بواحد بيقرا خبر من الجرنال لواحد صاحبه مع انه ماسك نفسس الجرنال في ايده
وطبعا معاليكي تمسكي اشراف الاجتماعي بما انك ملكه متوجه ومتالقه علي عرش مواضيعه