الموضوع: ملاك الجيتا الكرام ، انا مقبل على شراء السيارة وارجو المساعدة

المشاركة الأصلية كتبت بواسطة mohamedjetta

موتور الجيتا مش هيعجبك نهائي لو انت بتاع شد
انا والدي يمتلك جيتا فتيس dsg 2011 و سحبها حلو بالنسبه للي مش بيحبو الشد بس مع الكيك داون خرافه بس كده مع الوقت هتقول باي باي يا فتيس ويا موتور
ولما انا اشتريت النترا فيه فرق بينهم السحب جامد و بتلحقك من مواقف كتير وبتبقي دايس تلت تربع الدواسه = دوسه كامله بتاعت جيتا
وانا لما اجي اركب الجيتا بحس انها ضعيفه وبقعد احرق عليها ونسيت اقولك مشكلة الحك اللعينه نفس السيفك وهتذلك في كل مطب عشوائي و مره من المرات طلعنا في مطب عشوائي بس عالي و العربيه خبطت من تحت جامد جدا
لو كاره موضوع الحك جيب حاجه ياباني او كوري

انا موضوع الوطي ده قرفني في الهوندا بصراحه ولو الجيتا نفس الموضوع ده يبقى ملهاش لازمه كده ،،
وفعلا موضوع السحب ده في فرق كبير اوي مابين الجيتا والاوكتافيا وما بين ياباني او كوري ، انا لسه كنت سايق فانتازيا من كام يوم حاسس ان العربيه مش بتمشي حاسس ان طلعة العربيه بالكيك داون زي طلعة السيفيك العاديه ! وغير كده لما جربت الفانتازيا محستش بالثبات اللي الناس بتتكلم عنه حسيتها بتتنطط خصوصا اني جربتها على الدائري وطبعا الفواصل اللي فيه بقى عامله شغل ،،
انا عارف ان الحل الوحيد للمطبات اللي عندنا دي هي الاوكتافيا وبدور برده عليها مع الجيتا بس مش لاقي حاجه نضيفه بسعر كويس

المشاركة الأصلية كتبت بواسطة mohamedjetta

فتيس ست سرعات بيبوظ لو متغيرش الزيت في معاده

يعني هو مشكلته في ميعاد تغيير الزيت فقط ؟؟ وده اللي ممكن يبوظ الفتيس خالص ولا بيتعمله صيانه ويتظبط ؟
مع العلم ان في ناس شوفتها معاها الفتيس الست سرعات ده وغيرته بالكامل

المشاركة الأصلية كتبت بواسطة mohamedjetta

الفانتزيا دي اكبر سلحفاه بس عاوزه مسايسه و الجيتا واطيه اوي وانا شايف يا ترجع لسيفك يا اما تجيب فانتزيا واستحمل اي حد يجي كل شويه يعديك في ثانيه
وعلي فكره انا مره مروق الاوكتافيا الجديده a7 1600 بالالنترا ههههههه الراجل كان هيعيط

هههههههههه تصدق قفلتني من العربيه ،، بقى من بعد ماكان معايا سيفيك وكنت بشد مع اي عربيه اقوم لما اجي اجدد اجيب عربيه كل العربيات بتطلع منها ، يعني هو الواحد عشان يجيب عربيه تريحه من مطبات البلد دي العربيه تبقى زي البطه مبتجريش ،، طب وبعدين طيب انا دماغي وجعتني من الحوار ده وشكلي هخش على الكوري بقى وانا كنت طول عمري بتريق عليه وهيبقى شكلي وحش اوي لو جبته بصراحه

المشاركة الأصلية كتبت بواسطة yasser100

ما نصحكش بالجيتا و ﻻ حتى من 2009 .

الفتيس 6 سرعات مش dsg بس فيه مشاكل برضه . لسه واحد صاحبى قبل العيد بيومين طار الميكاترونكس بتاعها من غير سبب . العربيه موديل 2010 . عامله 40000 كم بس و لا هو بتاع شد و ﻻ حرق وصيانتها كانت فى التوكيل . الفتيس تمنه 45 الف و وحدة الميكاترونكس ب 20000 جنيه و ضمانها خلص .

العربيه واطيه جدا فى المطبات و كنا بننزل منها علشان يعرف ياخد المطب بالعرض .

العفشه ناشفه جدا مع الجنوط ال 17 .

تكييفها عادى مش تلاجه يعنى .

الثبات ممتاز و البريستيج ممتاز .

هو مش المفروض من موديل 2010 ده الفتيس ال dsg ال ٧ سرعات ؟؟
مش ممكن تكون عربية صاحبك ال ٧ سرعات ؟
اصل كل اللي الناس بتقوله من ٢٠١٠ الفتيس ال dsg ال ٧ سرعات

وبالنسبه لموضوع الوطي ده نفس اللي كان بيحصل معايا في السيفك كانوا صحابي بينزلوا عشان اعدي مطبات معينه
والعفشه لو بجنط ١٦ هتبقى كويسة طيب ولا انت مجربتهاش ؟
وشكرا على الرد والتوضيح ياباشا