ملاك الجيتا الكرام ، انا مقبل على شراء السيارة وارجو المساعدة

**Joooooo** · 10-10-2014 11:47 PM

ملاك الجيتا المحترمين ، انشاء الله ناوي اشتري فولكس جيتا الايام دي موديل 2008 الي 2011 على حسب الحالة النضيفة اللي هلاقيها قدامي ، وكان عندي كذا استفسار وواثق ان اعضاء الموقع هنا اكتر ناس هيفيدوني
كنت عايز اعرف من ملاك العربيه ايه هي عيوبها بالظبط ، و الخليجي احسن ولا الوكيل ؟؟
وانا بشتري العربيه ايه الحاجات اللي اركز عليها وانا بكشف عليها
وهل العربيه واطيه على الارض ولا لأ ، لأني انا كان معايا هوندا سيفيك وكانت بتشلني في المطبات الجميله اللي عندنا دي
سحب العربيه حلو ولا لأ ، وخصوصا اني طالع من هوندا فهل هحس بفرق كبير ولا لأ
العفشه ناعمة ام ناشفه
استهلاك البنزين
اسعار قطع الغيار ، ومدى توافرها في التوكيل وخارج التوكيل

واخر واهم حاجة " الفتيس " ايه هي مشاكله ، وايه الاجزاء اللي بتبوظ فيه ، ولو باظ جزء منه او باظ كله بيتكلف كام تصليحه ، ويتكلف كام تمنه كله لو هيتغير ،، انا بسمع عن الفتيس ده بلاوي ودي اكتر حاجه مقلقاني من شراء العربيه

وفي النهاية تنصحوني اصلا اني اشتري الجيتا ولا هتتعبني ومشاكلها كتير واشوف حاجه تانية افضل ؟؟

بعتذر لو كنت طولت عليكم في استفساراتي بس انا فعلا محتاج لمساعدتكم وكلامكم هو اللي هيخليني اشتري العربيه أو اصرف نظر عنها ، وبعتذر مره اخرى على الاطاله ،،، وتقبلوا تحياتي

**mxz911** · 10-10-2014 11:57 PM

معرفش حاجه عنها غير ان الفتيس بتاعها فيه مشاكل كتير خصوصا ال dsg

**monamize4** · 11-10-2014 12:25 AM

انا مش مالك بس اقدر افيدك باذن الله عن كتير من اسألتك

المشاركة الأصلية كتبت بواسطة joooooo

ملاك الجيتا المحترمين ، إن شاء الله ناوي اشتري فولكس جيتا الايام دي موديل 2008 الي 2011 على حسب الحالة النضيفة اللي هلاقيها قدامي ،

خلى بالك ان
2008 , 2009 دى الجيتا بالفتيس ال 6 سرعات
2010 , 2011 دى الجيتا بالفتيس ال dsg و دا 7 سرعات
و طبعا الفرق كبير مابينهم

وهل العربيه واطيه على الارض ولا لأ ، لأني انا كان معايا هوندا سيفيك وكانت بتشلني في المطبات الجميله اللي عندنا دي

اه واطيه و بتحك ف المطبات و محتاجة حذر كبير

سحب العربيه حلو ولا لأ ، وخصوصا اني طالع من هوندا فهل هحس بفرق كبير ولا لأ

الموديلات ال dry dsg سحبها كويس (بفضل الفتيس ) بس مش زى السيفيك

العفشه ناعمة ام ناشفه

ناشفة اوى بالجنط ال 17

استهلاك البنزين

موديلات ال dry dsg استهلاكها للبنزين ممتاز

اسعار قطع الغيار ، ومدى توافرها في التوكيل وخارج التوكيل

مش هقدر افيدك كويس ف النقطة دى

واخر واهم حاجة " الفتيس " ايه هي مشاكله ، وايه الاجزاء اللي بتبوظ فيه ، ولو باظ جزء منه او باظ كله بيتكلف كام تصليحه ، ويتكلف كام تمنه كله لو هيتغير ،، انا بسمع عن الفتيس ده بلاوي ودي اكتر حاجه مقلقاني من شراء العربيه

هتلاقى مواضيع كتير ف المنتدى بتتكلم بالتفصيل عن الموضوع دا

وفي النهاية تنصحوني اصلا اني اشتري الجيتا ولا هتتعبني ومشاكلها كتير واشوف حاجه تانية افضل ؟؟

نصيحة اخوية ابعد عن ال dry 7-speed dsg و غنيله مهما كانت مميزاته
من تسارع افضل و استهلاك بنزين اقل من الجيتا ال 6 سرعات و خليك ف موديلات
الفتيس القديم لان محدش ناقص مشاكل ووجع دماغ و ع فكرة ماسكه سعر اكتر من موديلات ال dsg

**Joooooo** · 11-10-2014 12:47 AM

المشاركة الأصلية كتبت بواسطة monamize4

انا مش مالك بس اقدر افيدك باذن الله عن كتير من اسألتك

يعني كده موديلات 2009 وما قبلها مفهاش اي مشاكل خالص في الفتيس ؟؟ بس انا اعرف واحد معاه 2008 وغير الفتيس برده !!
وموديلات ال 6 سرعات سحبها وحش ؟ زي الاوكتافيا مثلا ولا افضل شويه ؟
وبصراحة المواضيع اللي في المنتدى هنا اللي بتتكلم على الفتيس مقدرتش ارسى بيها على بر ، ناس بتقول الفتيس فيه مشاكل وكله يبعد عنه وناس بتقول مشاكله اتعالجت وناس بتقول مشاكله بقت سهل تصليحها وبتكلفه مش كبيره ،،
وانا بصراحه تهت من كل الاراء دي ومش عارف استقر على رأي واخد قرار في الموضوع ، وخصوصا اني كنت بستخدم ياباني ( هوندا سيفيك ٢٠٠٧ و مازدا ٣ ٢٠٠٨ ) ومكانتش بتواجهني المشاكل دي خالص ،
وفي رأيك ايه افضل عربيه في رنج ال 130 الف ؟
وشكرا على ردك واهتمامك

**monamize4** · 11-10-2014 01:06 AM

المشاركة الأصلية كتبت بواسطة Joooooo

يعني كده موديلات 2009 وما قبلها مفهاش اي مشاكل خالص في الفتيس ؟؟ بس انا اعرف واحد معاه 2008 وغير الفتيس برده !!

فى عربيات فعلا ف الفتيس ال 6 سرعات ظهر فيها مشاكل لكن بنسبة قليلة
و احتمال تكون بسبب سوء الاستخدام و الاهمال ف تغير الزيت

وموديلات ال 6 سرعات سحبها وحش ؟ زي الاوكتافيا مثلا ولا افضل شويه ؟

ممكن تقول زى الاوكتافيا

وبصراحة المواضيع اللي في المنتدى هنا اللي بتتكلم على الفتيس مقدرتش ارسى بيها على بر ، ناس بتقول الفتيس فيه مشاكل وكله يبعد عنه وناس بتقول مشاكله اتعالجت وناس بتقول مشاكله بقت سهل تصليحها وبتكلفه مش كبيره ،،
وانا بصراحه تهت من كل الاراء دي ومش عارف استقر على رأي واخد قرار في الموضوع ،

مشاكل ال DSG موجودة لحد الان و مرهقه جدا ماديا و نفسيا و مع احترامى للجميع ,,
اللى يقولك اشترى DSG و ماتقلقش ,, مش هينفعك بعدين لو حصل لاقدر الله حاجة

وخصوصا اني كنت بستخدم ياباني ( هوندا سيفيك ٢٠٠٧ و مازدا ٣ ٢٠٠٨ ) ومكانتش بتواجهني المشاكل دي خالص ،

اليابانى اعتماديته عالية عكس الاوروبى و بالذات الفولكس اللى مابتستحملش بهدله

وفي رأيك ايه افضل عربيه في رنج ال 130 الف ؟

جديد و لا مستعمل ? و ايه احتياجاتك من العربية ?

وشكرا على ردك واهتمامك

العفو ياباشا

**jojojojo** · 11-10-2014 01:34 AM

نصيحة مني هات حاجة زيرو ب130 الف زي مثلا الانسر ايه اكس الفئة الاولي عربية ياباني وعدلوه كل العيوب وشكل جديد وامكانيات ممتازة الالماني سواقة بس عايز امكانيات كبيرة عشان قطع غيارة غالية جدا غير بعض العيوب في بعض العربيات زي فيتس الجيتا وتكاليف التصليح او التغير عالية جدا فنصيحة مني هات حاجة زيرو وريح دماغك

**Joooooo** · 11-10-2014 03:37 AM

لا مستعمله ، مش عايز زيرو عشان بغير كل فتره صغيره فمش عايز اخسر كتير

واحتياجاتي في العربيه الثبات والفرامل والاعتماديه وشكل حلو طبعا :)

**Joooooo** · 11-10-2014 03:46 AM

المشاركة الأصلية كتبت بواسطة hany63

ارجع للسيفيك تاني احسن وخليك في مو ٢٠٠٩ او ٢٠١٠
مش هتحك معاك زي الاولانيه

والله مش عارف انا السيفيك كانت خنقاني اوي في موضوع الوطي على الارض ده ، يركب في العربية واحد ورا تسلم على كل المطبات ،، وفيها كذا عيب
قاعده الموتور بتبوظ بسرعه
البطاحات بتبوظ بسرعه جدا
بتستهلك تيل جامد بيخلص بسرعه ومينفعش عليها اي حاجه غير الاصلي والاصلي ب 700 جنيه