الموضوع: مخصص للرد على أسئلة الأعضاء في مجال التوظيف و سوق العمل

طيب.. إعتذار مرة أخرى عن التأخير و عودة للرد على الأسئلة.

بالنسبة للأسئلة من نوعية احكي لي موقف عن كذا ده ينقسم لنوعين:
النوع الأول و هو المواقف الافتراضية أول ال hypothetical و دي اللي ممكن الانترفيور يسألك فيه عن موقف معين هو بيفترضه و يسألك هاتتصرف فيه ازاي. النوع ده من الأسئلة صعب تحضر له إجابة مسبقة، إنما المفروض برضه تكون مستعد بشكل ما، يمكن ده ييجي بكتر حضور الانترفيوهات.

النوع التاني و هو الموقف السلوكي أو ال behavioral و ده اللي بيطلب منك الانترفيور انك تذكر له موقف اتعرضت له بالفعل من خلال شغلك تبين من خلاله انك عندك قائد فريق ناجح.. أو إنك عندك دبلوماسية في التعامل مع الآخرين او عندك سرعة و حسن تصرف في المواقف الحرجة. ده بأه لازم تكون محضر له مسبقا و جاهز كده بكام موقف حصل بالفعل أثناء شغلك و ده ليه تكنيك اسمه STAR
Situation
Task
Action
Result

لازم لازم لازم لما تقول أي موقف تثبت من خلاله صفة أو مهارة فيك لازم تستعمل التكنيك ده، لازم تبدأ بالSituation يعني تحكي الموقف اللي المفروض انه كان متأزم ساعة ما حصل و بعدين تبدأ تقول ال Task اللي كان عليك عشان تحله و بعدين تقول ال Action اللي انت عملته عشان تحل الموضوع او تخرج من الأزمة و بعدين تختم بال Result اللي لازم تكون نتيجة إيجابية، يعني لازم الموقف ينتهي بنجاح ليك في حل الموقف ده أو الخروج من الأزمة دي أو تحقيق مكاسب كويسة بعد ما انتهى، يعني الموقف لازم يحكي Success story

أخيرا جاوبت على السؤال. أحييك على مثابرتك و صبرك

المشاركة الأصلية كتبت بواسطة Mar!am

هو ممكن اكتب ان عندي عربية في السي في
يعني دي ضرورة ، لاني احيانا مش بكتب مكان سكني لان الناس بتحسه بعيد مع انه عادي
ولا دا يبقي مش Professional

في الحالة دي ممكن تكتبي انك عندك عربية مافيش مشكلة.

المشاركة الأصلية كتبت بواسطة hossaam

موضوع جميل يا استاذة علا
وشكرا على وقتك ومجهودك

انا بس كنت حابب اشارك في كام نقطة كده بسرعة بخبرتي المتواضعة في المقابلات
على اساس اني عملت كم كبير منها في مصر وخارج مصر
سواء كمتقدم لعمل candidate وكذلك interviewer

وهاخص بالكلام الاخوة المهندسين لاني في هذا المجال..

أولا: بالنسبة للاخوة اللي بتسأل على موضوع اللغة الانجليزية

- بص..بصراحة (وده رأي شخصي وعن تجربة) من غير
مستوى متقدم يعني very good ..صدقني هيبقى عندك مشكلة انك تلاقي مكان كويس اوي ..
واذا لقيت وظيفة ما وظل مستواك ضعيف..
فانسى انك تتقدم وتعلى في الشركة.
خصوصا في الشركات الاجنبية او
اللي ليها تعاملات مع clients اجانب
وده طبعا بقه هو الغالب هذه الايام ..

وبعدين كل المراسلات والتقاريرغالبا دلوقتي في اي شركة بالانجليزي (انا هنا مش قصدي التقارير الفنية)
لان معظم المفردات التقنية درسناها بالانجليزي فدي ما فيهاش مشكلة..
انا اقصد التقارير الشاملة اللي فيها وصف لانشطة او احداث..او تقارير بترفعها للادارة ..

ناهيك عن ان الانجليزي هيساعدك اصلا اثناء العمل على الاطلاع اكتر والاستفادة من
الانترنت والمجلات الاجنبية وده هيصب اكيد في مستوى اداءك في الشركة..

ده مبدئيا..

ويتبع..ان شاء الله ايه اللي ممكن تعمله عشان تحسن اللغة
طبعا بعد اذن الاستاذة صاحبة هذا الموضوع المتميز

صح 100%

جزاك الله خيرا على اللإفادة و في انتظار المزيد و خصوصا حتة طرق تحسين مستوى اللغة الإنجليزية، بالتأكيد فيه كتير يهمهم يعرفوا الكلام ده.

المشاركة الأصلية كتبت بواسطة Mohammed_Adel_Amin

السلام عليكم ورحمة الله
جزاكي الله خير يا علا على الموضوع الجميل وعلى مساعدتك للناس ..
انا عايز اطلب من حضرتك طلب بسيط .. انا عايز اي مثال ل C.v. يكون لمهندس مدني علشان اعرف طريقة عمله ازاي لأني مش عارف حتى ابدأ بإيه !! وبعدها ممكن اعمله وابعثه لحضرتك على الخاص تراجعيه .. ولكي جزيل الشكر .

حاضر، بس انت ابعت لي ايميل فاضي حتى على olao@paulinedarcy.com
و انا ان شاء الله هابعت لك اللي انت عايزه، بس قوللي عايز نموذج سي في لحد خبرة كام سنة؟