الموضوع: نصيحة لوجه الله ,, الكورولا تستاهل التمن ده؟؟

المشاركة الأصلية كتبت بواسطة mohamed.hany

و علشان حضرتك طلبت رأي ملاك كورولا 2014 اسمحلي اقولك بالتفصيل تستاهل ولا لأ و نصحية صغيرة متسمعش كلام حد معهوش العربية لأنه ببساطة مش هيبقا عارفها ولا عارف قيمتها ولا مميزاتها و لا عيوبها و لو معاه عربية منافسة و اقل منها هيبقي دايما عاوز يبين انها افضل لاسباب اخري.

العربية ثمنها 190 الف و باكد تاني .

ايه النقط اللي بدور عليها في العربية ؟

1.الموتور و سحب العربية :
بالورقة و القلم قارن مبين قوة مواتير فلوانس و شارك و و سنترا و امبريزا و ساعتها هتتأكد ان في تفوق كبير في قوة الموتور للكورولا و لو بتقارن بالخصوص مع الفلوانس فاسمحلي ففي فرق كبير قوي في التجميع و الطلعة بتاعتها بطيئة جدا مقارنة بالكورولا , و في فيديو مصور بنفسي للكورولا و انا بجيب من 0 الي 100 في 9 ثواني بالتكييف .
https://www.youtube.com/watch?v=f6vxutw7vjw

2. وسائل الامان :
الكورولا اعلي وسائل امان في فئتها esp trc hac isofix طبعا لو قارنت مع الفلوانس و الشارك و السنترا فال esp و ال trc كافي اني احسم موقفي لأنه وسيلة امان في منتهي الخطورة و كفيلة بانقاذ حياتي و حياة اسرتي و هي مسئولة بانها تمنع تعويم العربية و ترجعها في مسارها السليم لو حصل اي انحراف و طبعا ده مش موجود في العربيات السابقة.
اتفرج علي عربية bmw اللي المفروض ثباتها لا يختلف عليه اتنين لما بيكون قافل esp العربية بتعوم ازاي عشان تعرف اهمية وسيلة الامان دي ؟
https://www.youtube.com/watch?v=rulbwac6sy4

3. استهلاك البنزين :
الكورولا افضل استهلاك بنزين في فئتها يكفي اني في الطوالي استهلاكي بيبقي ف حدود 4 لتر لكا 100 كم لك ان تتخيل الرقم .


4. الاوبشنز :
الكورولا من اعلي اوبشنز موجودة في السوق فهل حضرتك محتاج اوشنز اكتر من دي :
بالنسبة للموتور 1600cc الذي تبلغ قوته 122 حصان و عزم 154 نيوتن
ناقل حركة اوتوماتيك cvt - نظام ثبات الكترونى (vsc) +نظام فرامل abs+ba+ebd - زجاج كهرباء - سنتر لوك – تكييف يدوى - باورستيرينج كهرباء - تحكم بالنظام الصوتي من عجلة القيادة- راديو 6cdسماعات + مدخل usb+aux - نظام مانع السرقة – نظام تصفيح ضد الصدأ - ضبط مستوى الاضاءة الامامية يدوى - امكانية طى الكنبة الخلفية - نظام اضاءة نهارى (ليد) – 2ايرباج - مرايات كهرباء - مفتاح بالريموت - السعة اللترية 55 لتر - . مثبت سرعة - تكييف أوتوماتيكي dual zone - تحكم بالنظام الصوتي والتليفون من عجلة القيادة - bluetooth - راديو 6cd سماعات + مدخل usb+aux - ضبط مستوى الاضاءة الامامية أوتوماتيك - 2ايرباج -كاوتش مقاس 55/16 205 r(جنوط سبور ) - حساسات ركن امامية وخلفية خاصية الركن التلقائى park assist – فوانيس شبورة أمامية وخلفية - مرايا كهرباء قابله للطى - نظام المساعدة في المرتفعات hac - نظام تثبيت isofix - نظام ebl للتنبيه الضوئي

5. وسع الصالون :
الكورولا اوسع صالون في فئتها و ده طبعا مقارنة بالمنافسين و اقرب عربية لوسع الكورولا هي الفلوانس

6. التوكيل :
افضل توكيل في مصر بدون شك بشهادة الجميع و يكفي انه لما الناس اشتكت في الدفعات الاولي ان العربية منخفضة و بتحك التوكيل اتصرف بسرعة و علي العربية بتغيير العفشة كها للعفشة الرياضية اللي بتنزل في النسخة الخليجية بتغيير 4 مساعدين و 4 سوست و بطاحات و كوبلن ببلاش و التكلفة كانت في حدود 12000 جنيه انا مش متخيل ان في اي توكيل في مصر هيعمل كدة خصوصا انها مشكلة بسيطة و ليست عيب صناعة مثلا زي موتور بيبوظ و لا فتيس بيضرب زي في بعض الماركات الاخري

7. اعادة البيع :
بدون جدال او نقاش افضل سعر اعادة بيع و كمان اسرع بيع يعني مش هتقعد تدلل علي العربية زي الماركات التانية او تفاجاء ان النوكيل عمل خصم علي العربية زي الفلوانس مثلا اللي التوكيل بيعمل عليها خصم 5000 جنيه و تستلم فوري اما الكورولا تلاقيها بالحجز شهور و لو هتستلم من معرض تلاقيها زايدة 5000 اكيد الكلام ده ليه معني و مدلول . هل تتخيل في يوم من الايام ان الكورولا يتعمل عليها خصم ؟ ده التوكيل مش ملاحق ايه اللي يخليه يدلل عليها في البيع و يقلل السعر ؟ طيب انا لو جبت عربية ب 170 الف و التوكيل نزل عرض ب 165 الف لما اجي بيعها هخسر فيها اكتر ما هي خسرانة !!!!

8. الاعطال :
عمرك شفت كورولا فيها عطل ؟ او جابت موتور ؟ او جابت فتيس ؟ تكيفها باظ ؟ او او او ؟ اكد لأ طبعا ب هتلاقي الكلا ده كتير مؤخرا مع المنافسين زي الفلوانس مثلا في بعض الحالات غيرت مواتير و لكن مسمعتش عن حالة واحدة فقط في الكورولا حصل فيها كدة.

9. الخامات :
عمرك شفت كورولا فتيسها او دركسيونها جلدهم شقق ؟ طيب سمعت عن كورولا زراير التكييف او الكاسيت قشروا ؟ او سمعت ان مقبض الباب بتاعها اتخلع ؟ انا مسمعتش خالص بس سمعت في ماركات تانية زي الفلوانس .

10. التكييف :
تكييف العربية ميختلفش عليه اتنين و عز الصيف مش بقدر اقلل الحرارة عن 21 من قوته ماشاء الله.

و ده مش تقليل من اي عربية دي مميزات العربية و اعتقد رد كافي و شافي ليه هي اغلي منهم و ليه الناس دايما بتحتار مبين فلوانس و النترا و سيراتو و سنترا و كروز و شارك لانهم قريبين في السعر و مبين كورولا و سكودا a7 و استرا و فوكاس اكيد لو حضرتك قارنت كل عربية سعرها بيبدأ من كام هتعرف ليه يعني مثلا الفلوانس و الالنترا و الكروز و الشارك بيبدائو من 150 تقريبا اما الاسترا و الكورولا و السكودا و الفوكاس بيبدائو من 170 او 180 فكر كدة ممكن يكون فرق السعر في ايه و الردود هتلاقيها فوق في كلامي
بعد كل النقاط دي ايه رأيك تستحق ؟

تحياتى بجد انا كنت محتاج رد عملى بالتفاصيل بس لو تسمحى انا فعلا فيه سؤال محيرنى جدااااا - هوه الفتيس ال cvt ده مش هوه اللى فى الفلوانس وهوه اللى فى السنترا ؟؟ ولا لأ

المشاركة الأصلية كتبت بواسطة hegazio

مظبوط يا تامر .. و انا هنا ما باردش عشان عربيتي 2013 .. انا باحكي عن موقفي بينها و بين فلوينس 2011 كانت معايا قبلها .. كورولا 2014 اتغيرت .. و برضه فلوينس فيس2 اتغيرت

انا باتكلم عشان ركبت عربيتين كورولا 2014 .. واحدة يوم و واحدة اسبوع
و العربية كويسة .. لكن السؤال مش كويسة ولا وحشة .. السؤال : تستاهل التمن ده ؟؟

الله ينور عليك هههههههههه انا فعلا سؤالى عن الفلوس مش العربية وانا بقول تانى انها عربية ممتازة بس هل تستاهل فرق السعر ده ؟؟ او لو قلت سؤالى بالمشقلب ,,, لو انا اشتريت فلوانس ب 175 ألف مثلا هابقى خسرت ايه انى ما دفعتش 190 الف وركبت كورولا؟؟؟

المشاركة الأصلية كتبت بواسطة hegazio

مظبوط يا تامر .. و انا هنا ما باردش عشان عربيتي 2013 .. انا باحكي عن موقفي بينها و بين فلوينس 2011 كانت معايا قبلها .. كورولا 2014 اتغيرت .. و برضه فلوينس فيس2 اتغيرت

انا باتكلم عشان ركبت عربيتين كورولا 2014 .. واحدة يوم و واحدة اسبوع
و العربية كويسة .. لكن السؤال مش كويسة ولا وحشة .. السؤال : تستاهل التمن ده ؟؟

الله ينور عليك ههههههههه هوه ده سؤالى والله العظيم ,, انا عارف ومتأكد انها عربية ممتازة بس انا بسأل عن الفلوس ,, ليه هى اغلى ؟ هى تستاهل فرق سعر حوالى 20 او 25 ألف بينها وبين الفلوانس والأمبريزا والسنترا

المشاركة الأصلية كتبت بواسطة borio1704

أنا هحاول أكون حيادي بقدر الإمكان..

خلينا نشوف الأول إيه الأسباب اللي تخلي تويوتا ترفع سعرها بالطريقة دي؟؟


أولا... لا خلاف على إن تويوتا معروفة في كل أنحاء الدنيا بحاجتين أساسيين في عربياتها:

1- الجودة
2- الاعتمادية


بشكل عام .. الجودة كلمة عايمة وكبيرة.. بس كلمة جودة المقصودة هنا معناها قلة العيوب اللي بتحصل في العربية في أول سنة بعد الشراء..

يعني كل حاجة متركبة صح .. كل حاجة شغالة تمام..

حد جاب سيرة نوع الخامات والفخامة؟؟ لأ
حد جاب سيرة الشكل الجميل؟؟ لأ
حد جاب سيرة الأوبشنز؟؟؟ لأ بردو
حد جاب سيرة أداء العربية والثبات؟؟؟ لأ خالص


هي دي كده جودة؟؟؟

أيوه... لأن العميل اللي اشتراها رضي بيها كده .. والمنتج حقق المطلوب منه.


طيب...

إيه موضوع الاعتمادية؟؟؟

الاعتمادية دي موضوعها كبير في الحقيقة..

الاعتمادية دي معناها الهندسي هو : المدة الزمنية الفاصلة بين عطلين.

ومعناها التسويقي هو درجة ثقتك واعتمادك على المنتج إنه هيأدي المطلوب منه بدون ما أفقد وقت أو أشغل نفسي بصيانته

يعني.. لما تركب عربيتك الصبح.. ما تبقاش خايف إن العربية تعمل معاك دقة نقص في عز ما انت محتاجها.


مشكلتنا في مصر إن الاعتمادية أهميتها قليلة مقارنة بالخصائص التانية اللي بنقارن بيها العربيات..


ليه؟؟؟

علشان حاجتين أساسيين:

1- إننا متربيين على إن العربيات الـ128 واللادا بتروح كل شوية للميكانيكي.. يعني لما العربية تعطل مش مشكلة.. عادي يعني..

طبيعة المجتمع مش بتدي أهمية كبيرة للوقت.. فمش مشكلة لما أضيع وقتي وأروح مشواري متأخر بسبب العربية العطلانة.


2- أسعار الصيانة في مصر رخيصة جدا مقارنة بالدول المتقدمة أو حتى في الدول العربية المجاورة.

كفاية إني أقوللك إن علشان ألحم كاوتش مخروم هنا في السعودية بأدفع 50 ريال (100 جنيه).. وعلشان أعمل أي شغل عادي من أبو 100 جنيه في مصر .. هنا بعمله بـ200 ريال على الأقل..

ولو لقيت ميكانيكي فاهم وشغله نضيف.. أضرب المبلغ ده × 1.5 أو 2.


طبعا... الموضوع له علاقة كبيرة جدا بمستوى الدخل وطبيعة الاقتصاد في الدولة.

طيب.. نفهم من كده إن "مصنعية" صيانة العربية بره مصر غالية.. ده غير قطع الغيار..

يبقى لو أنا عايز أوفر... أجيب عربية ما تقرفنيش كل شوية بأعطالها ومشاكلها..


ده غير إنك بتبقى دافع فلوس في العربية وما بتستفيدش منها..

أكتر ناس يحسوا بالموضوع ده هما أصحاب العربيات الإيجار والتاكسي.. لأن العربية لما بتقف معناها مفيش فلوس بتدخل جيبك.. بالعكس.. إنت اللي عمال تصرف.


من هنا .. الناس بره مصر بتعمل حساب الاعتمادية في اختيار العربية... خصوصا لو كنت من الناس العادية اللي بتقبض مرتب يدوب بيعيشك كويس.. زي ما هما متعودين في أوروبا وأمريكا.



طيب.. محدش سأل نفسه.. هو ليه سعر إعادة البيع بتاع تويوتا عموما بيبقى عالي؟؟؟

أجاوبك وأقوللك.. سعر إعادة البيع هو ترجمة لمستوى اعتمادية السيارة!!!

إزاي؟؟

يعني حضرتك لما تيجي تشتري عربية مستعملة.. أغلب الناس هيقولولك اشتري عربية نضيفة؟؟ يعني استخدامها كويس ومفيهاش حاجة عطلانة.. علشان ما تصرفش عليها بعد ما تشتريها.

وده بالضبط الوضع اللي بتبقى عليه أغلب سيارات تويوتا... هتشتريها وتسوقها علطول... بدون ما تعدي على ميكانيكي يصلحلك العطل اللي ظهر فيها بعد أسبوع أو شهر من شراءها...
ده غير إن ممكن يكون فيها عيب.. بس العربية لسه ماشية وهتوصلك مطرح ما انت عايز.

إنما لو اشتريت عربية سعرها واقع.. أكيد فيها مشاكل.. ويمكن كمان تتعب على ما تلاقي قطع غيارها.


خلي بالك من حاجة مهمة..

موضوع الفخامة والأداء والأوبشنز موجود في عربيات تويوتا بردو... بس للأسف مش واضح في العربيات الصغيرة.. إنما في العربيات الكبيرة زي الكامري والأفالون واللاندكروزر .. ولكن بحدود.

عايز تويوتا فيها كل اللي نفسك فيه... اشتري "لكزس".. بس ادفع .. لإن مفيش حاجة ببلاش

عموما.. دي سياسة أنا بعتبرها فيها بعض النقص.. لإن تويوتا زمان قبل لكزس كان فيها كل حاجة.. بس أعتقد إن ممكن السياسة دي تتغير بعض الشيء لما مبيعات تويوتا تقل شوية.


مش هتكلم عن رينو.. لإني ممكن أكون متحامل شوية.

بس أنا بتكلم هنا عن خبرة من امتلاك إحدى سيارات تويوتا في الماضي (تويوتا كريسيدا 1982).. وأيضا إحدى سيارات رينو (كليو 1991).



في الآخر... التويوتا تستاهل سعرها؟؟؟

أيوه تستاهل.



...

تحياتى يا فندم واشكرك على ردك

المشاركة الأصلية كتبت بواسطة ashouhdy

200الف يركبوك الماني بجد ...

لو زيرو يبقي الكورولا بالرغم ان سعرها عااالى جدا عليها بس كويسة

لو انا منك ... حدفع ال 200الف مقدم واقسط 40 الف واركب الاسطورة أوبل انسيجنيا

او اجيب استرا اعلى فئة

او اشوف بيجو508 كسر زيرو

عشان حاجة واحدة لما تركب العربية تحس بقيمة الفلوس المدفوعة وللاسف الكورولا فيها كل حاجة بس احساس الفلوس المدفوعة فيها مش موجود

معاك حق طبعا بس كده هاخرج عن الميزانية وبصراحة ماشفتش حد بيشكر فى منصور كتوكيل بصرف النظر طبعا عن الأوبل نفسها كعربية محترمة