الموضوع: ما هو أفضل زيت تخليقى ؟؟؟؟؟؟؟

المشاركة الأصلية كتبت بواسطة عصير قصب

انا فهمت الموضوع عن طريق الشرح ده
لو حابب حضرتك تقرأه



مواتير زمان الكاربيراتير كان الخلوص بين البستم والشميز واسع والزيت المعدني المعمول من البترول ده تقيل جدا لزوجته
20w-50 بيملى الخلوص بين البستم والشميز

الزيت التخليقى معمول للعربيات الحديثة الانجكشن ﻷن الخلوص بين البستم والشميز لايذكر

وبالتالي عاوزة زيت في اول التشغيل لزوجته زي الميه علشان يعرف يتوغل في كل أجزاء الموتور في ثانية

عكس المعدني بينتشر بعد 4 دقايق حسب ما قريت ﻷنه تقيل في أول التشغيل وبينهار مع السخونية

والتخليقي كل مابيسخن لزوجته بتزيد بدون إنهيار غير جزيئات الحماية اللي فيه


وبما إنه خفيف فالبستم مابيعانيش في دفع الزيت الخفيف فسرعة العربية بتزيد عن التاني وتوفير البنزين بيزيد وحرارة الموتور بتستقر

وده لزوجته 5w-30 كما هو مكتوب في كتالوج عربياتنا

بنحطه عندناه لغاية 150000 كيلو

وبعدها بنضطر نحط نص تخليقي ونص معدني لزوجته أعلى من التخليقي وأخف من المعدني وده ﻷن الخلوص وسع من اﻹستهلاك فبنحط زيت أتقل

لغاية 250000 كيلو وده لزوجته
10w-40 بيتغير مابين 5000 و 7000 كيلو

بعدها الخلوص وسع أكتر فبنضطر نحط المعدني ﻷنه أتقل وهايملى الفروق عن اﻷخف ولان الموتور بيعتبر في مرحلة الشيخوخة وممكن يبتدي يرزع كرنك وده بيمشي 3000 كيلو ولزوجته 20w-50

أما ال 5w-30 بيتغير من 12000 ل 15000

وفي لزوجة للمناطق الباردة قوي في الشتا والحارة جدا في الصيف وده تخليقي بلزوجة 5w-40 وده بيمشي من 7000 ل 10000 كيلو حسب السفر واﻷحمال

زي ما قال الأستاذ Mecha

الشرح ده عبارة عن لخبطة كل الحاجات في بعض..


الوضع الصحيح كالتالي:


الزيوت زماااااااااااان .. من ييجي 60 سنة وأكتر.. كانت زي أي مادة زيتية عادية.. بتتأثر بالحرارة

يعني لما الجو يبرد تلاقي الزيت جمد

ولما الجو يسخن الزيت يبقى سائل

ولما الجو يبقى حر خالص... الزيت يبقى زي المية


علشان كده.. كان فيه زيوت مخصوصة للصيف .. وزيوت تانية مخصوصة للشتا

الزيوت دي إسمها زيوت "أحادية اللزوجة"..
وعادة .. درجة اللزوجة بتاعتها بيعبروا عنها بحاجة زي كده: "SAE 40" أو "SAE 30"


مع تقدم الوقت.. وتقدم صناعة البلاستيك والبوليمرات في العالم.. ظهر نوع جديد من الزيوت

إسمها الزيوت "متعددة اللزوجة" أو Multigrade Oil

والغرض منها إننا ما نغيرش الزيت بين الصيف والشتا... هو نوع واحد لكل الأجواء.

إيه فكرتها؟؟؟

نجيب زيت خفيف... لما الجو يبقى بارد هيكون تقيل شوية.. بس لسه ما جمدش

فلما العربية تبدأ تشتغل.. الزيت هيوصل للأماكن اللي المفروض تتزيت كإننا مستخدمين زيت تقيل سخن .


طيب.. بعد شوية.. الزيت هيسخن.. المفروض يبدأ يخف ويبقى زي المية بقى..


لأ خالص..

الفكرة هنا إن الزيت ده عليه "إضافات" من البلاستيك أو البوليمرات.. بيسموها "محسنات مؤشر اللزوجة" .. ودي مهمتها إنها تحافظ على لزوجة الزيت من "الانهيار" زي ما بيقولوا.

في الحالة دي... لما بنقيس لزوجة الزيت ده وهو سخن ... بتبقى لزوجته مشابهة لزيت تقيل أحادي اللزوجة وهو سخن.


فبقينا بنعبر عن اللزوجة برقمين..

واحد للزوجة الخفيفة والزيت بارد... والتاني للزوجة التقيلة والزيت سخن

زي كده: SAE 20W-50 , SAE 10W-30


طيب الـW دي معناها إيه

قالوا إن دي اختصار لكلمة Winter أو الشتاء... على أساس إن اللزوجة دي هي اللي كانت الناس بتستخدمها في الشتا أيام الزيوت أحادية اللزوجة


الشكل ده بيوضح باختصار الفرق بين الزيوت أحادية اللزوجة ومتعددة اللزوجة





أهم معلومة في الكلام ده... إن موضوع الزيوت متعددة اللزوجة ده بقاله حوالي 60 سنة.. من قبل ما الزيوت التخليقية تظهر كفكرة أساسا.


_____________

نيجي بقى لجزئية التآكل وزيادة لزوجة الزيت مع تقدم العمر..


أنا متفق مبدئيا إن الخلوصات بتوسع مع الاستخدام نتيجة التآكل

بس مختلف مع حتة إني استخدم زيوت معدنية لإنها أتقل وبس


لأ... مش علشان أتقل وبس


إنما علشان الموتور في الوضع ده هيكون بدأ ياكل زيت.. بمعنى إن الزيت هيبدأ يتسرب للسلندرات ويتحرق مع البنزين..

فهيبقى غباء بصراحة إني أحط زيت غالي وبعد شوية ما ألاقيهوش لإنه عمال ينقص ويتحرق ويخرج من الشكمان.


عموما... أنا مقتنع إن حالة الموتور هي اللي بتحكم... مش عداد الكيلومترات

وياما ناس عمرت مواتيرها بعد 20 ألف... وياما ناس تانية ما عملتش عمرة حتى بعد الـ500 ألف.. وموتورها لسه كويس.



...