ثانياً : صيانة العفشة و ضبط الزوايا
روحت لبتاع العفشة قالى الاسكاترا عاوزه حشو مع العلم انى كنت مغير اسكاترا من 30 ألف كيلو متر وكنت جايب اغلى نوع ألمانى موجود بـ 350 جنيه من 4 سنين
نزلت تانى لبتوع قطع الغيار جبت فبرة اسكاترا وبستم للاسكاتر بحوالى 15 جنيه
وجبت علبة شحم و 4 أفيز بلاستيك
وتوكلنا على الله فكوا الاسكاتر وبدأو يحشوها وركبوها تانى
العفشجى اخد 45 جنيه مصنعيه + 5 جنيه للصبى
طبعا الدريكسيون بقى متماسك بس تقل عن الأول وضع الدريكسيون اختلف والعربية بقت بتحدف شمال
فقولت اضبط زوايا بالمرة وقولتله يضبطلى وضع طارة الدريكسيون من عنده
روحت لبتاع زوايا واتوصلت على الجهاز وقالى تمام
وضبط الزوايا اتكلف 30 جنيه
اطلع اجرب ألاقيها بتحدف بردو فقولت هبقى اعدى عليه تانى بعدين
بعد يومين لأما نزلت تحت العربية لتتغيير الزيت فوجئت ان كاوتش الاسكترا الجديد فرده منه مبرومه بطريقة غريبه ومقطوعه
رجعت لبتاع العفشه مرة يقولى تلاقى نوعها وحش
ومره يقولى ده عيب من بتاع ضبط الزوايا مريحهاش وهوه بيعدل وضع الدريسكيون
كالعاده اى مشكلة بتوه
جبت كاوتش اسكترا تانى نوع تركى وشكله أنظف والمفاجأة ان ارخص من النوع الأول جبته بـ 15 جنيه
ورجعت ركبته تانى عند العفشجى
وديه صورته
تانى يوم لاقيت الدريكسيون فيه نقرة قولت يادى النيلة هو الحشو متعملش صح ولا ايه !!
رجعت تانى للعفشجى قالى ده طبيعى والدريكسيون خف معاك
قالى الحشو محتاج بس يتزنق عليه ونزل تحت العربية كان بيفك ويربط مسامير صغيره
لحد ما النقره راحت والحمد لله
واستكمالاً لمسلسل التلطيش اللى بيحصل معايا ... والدى عريبته عطلت وطلب عربيتى قولتله خد بالك منها علشان العربية بتلكك اليومين دول قالى متخفش .. قولتله ربنا يستر
المهم الجو بارد جدا والعربية فى الفترة ديه عمرها ما وصلت لدرجة الحرارة اللى بتشتغل عندها المروحة
والدى اخدها وسخنت وفيشه المروحة كانت معلقة ومأخدش باله الا لما بخار المياه طلع من الكبوت !!!
مع ان معاه فليشيا اللى هيا استاذه فى السخونيه
المهم حصل خير وكشفت على الزيت والمياه وضبطت الفيشه بتاعت المروحة وعدت على خير
ماشى بعدها مرهق وتعبان ومقلق من العربية وبقول ياترى ايه اللى هيحصل هوب
دخلت فى عربية اوبترا على سرعه 10 كم/س والحمد لله على كل حال
اللى زعلنى انى أول مرة اضر حد بدون قصد حصل عنده شرخ بسيط فى الاكصدام الخلفى
نزلت اعتذرتله وقوقلته انا تحت امرك فى اى تصليح
قالى خلاص حصل خير ومشيت وانا متعكنن وزهقان
واشتريت فانوس اشارة بـ 15 جنيه تركى
روحت تانى لبتاع الزوايا علشان كاوتش الاسكترا اللى اتغير اكيد هيبوظ ضبط الزوايا وعلشان الحدفة الشمال البسيطة
حطها تانى على الجهاز وظبطها وبقت تمام الحمد لله
المفضلات