الموضوع: ناس عايزه تتجوز وناس ندمانه علي الجواز

سبب الندم على الجواز بيكون اما .. توقعات و صورة ذهنية وردية مبالغ فيها لما بعد الزواج .. شاب لم يتربى على الصبر و تحمل المسؤولية .. عدم سعي حقيقي لحسن اختار شريكة يكون فيها من التكافؤ و القناعة و الاستعداد لتحمل المصاعب .. فشل الزوج او تراخيه عن وضع حدود فاصلة بين حياته الشخصية و بين تدخل الاقارب و الاصدقاء .

المشاركة الأصلية كتبت بواسطة ahmedmiy

بسم الله الرحمن الرحيم

الحمد لله والصلاة والسلام على رسول الله نبينا محمد خير خلق الله

جمعة طيبة مباركة إن شاء الله

والله يا دكتور كنت محتار جدا أرد على حضرتك برسالة على الخاص أو بمشاركة بالموضوع والسبب ان الرد قد يحتاج للخروج قليلاً جدا عن الحياء ولكن إن شاء الله المشاركة تكون مفيده مع الحرص الشديد منى ومع الحكمة المعروفه أن اللبيب بالإشارة سيفهم القصد وإن شاء الله يكون القصد دائما لله .

شوف يا دكتور أخوك ابن بلد شويه من منطقة شعبية واختلط تقريبا بكافة المستويات فى المجتمع ..
القاعدة الواضحة والثابتة دلوقتى ان من سنين طويلة المجتمع أخلاقه فى انحدار شديد حتى وصلت الى القاع فيما عدا عدد قليل من الناس .. بس محدش يخاف إن شاء الله وكما قال رسول الله صل الله عليه وسلم .. ان الخير سيكون فى أمة محمد إلى يوم الدين إن شاء الله.

لما مثلا أصادف أكتر من سواق تاكسي فى مشوار طويل ونفتح حوار فى كذا سكة واحنا مولعين سجاير وكده وبنفضفض و أسمع قصص واقعية ملخصها إنتشار الفاحشة والاسباب زى ما كنا بنشوف فى الافلام العربي الى بوظت اخلاقنا كلنا بقصد الله يخرب بيتهم مثلا طالبه أبوها مسافر الخليج أو فقيرة تم استغلالها أو أو ... النماذج كثيرة جدا للذكور والاناث من كل الاتجاهات والمستويات.

طيب فى مجال العمل والوظائف فى الاماكن الى بتكون مختلطة صدقنى الموضوع كله بيرجع للتربية وبما ان احنا اتفقنا ان الاخلاق من سنين طويلة تنحدر فلك ان تتخيل ما وصلنا له يعنى اذا ما كنش ضمير الانسان راجل أو أنثى يخاف من الله بشده فمن السهل جدا جدا ان يقع فى الحرام ويجر معه أخرين والموضوع مش بيفرق بين متجوزين ولا لا لان الفتنة شديدة زى موجه البحر العاتية من يمر عليها لن ينجو أبدا ومع الوقت (سنين طويلة) يقع الكثير إلا من رحمه الله ورزقه الثبات والصبر.
والنقطة ديه تحديدا أنصحك بالمناقشة مع الوالد وهو ممكن جدا ينقل لك صورة من المجتمع الوظيفى وبالمناسبة ده كان مجال عملى.

طيب كنت اتكلمت على مثال مثلا فى كارفور طيب نقول مثال أخر عندك مثلا محلات مؤمن فاست فود من سنين طويلة الواحد بيتعامل معاهم لما فجأة كده تتدخل فرع تجيب سندوتش وتلاقى الكاشير بنات والمطبخ والعاملين شباب ولو الفرع مثلا مش عليه ضغط تلاقى الشباب والبنات واقفين يهزرو مع بعض بالايد اثناء الكلام والضحك سيبك من الموقف ده وخلينا ننظر للسبب إدارة المكان ده كانت مش بتشغل بنات خالص طيب ايه سبب التغيير أظن أن فيه حد جديد دخل الادارة وقرر انه يطبق فكر جديد عليه وعلى امثالة ما يستحق من الله .... والفكر الجديد ده أنه يشغل بنات علشان تكون عامل جذب يعنى سلعة رخيصة للعرض زى الاعلانات بالظبط فى التليفزيون بنتفرج على اعلانات الشامبو والاجهزة والاكل والمشروبات وكل ده الانثى هى سلعة الترويج الرخيصة فلك تجمع كل ما امامك وتقدر تحسب حجم الموجة يكون اد ايه وممكن كام واحد يغرق فيها.

ما سبق كان طويل الى حد ما بس لازم يكون فى معيار ثابت لمن يريد
الفطرة الطبيعة والواقعية والحقيقة التى لا تقبل الشك عندما نقارن بين دور المراة الحقيقي ودور الرجل الحقيقي سنجد ان دور الام والزوجة هو الاهم على الاطلاق ودور الرجل يتضئال جدا امامه
المراه هى من تقوم بتربية الرجالة اساسا علشان يكونوا ناس نافعة زي حضرتك مثلا دكتور يعنى حتفيد الناس ان شاء الله
بس المسالة مش علم ودراسة وخلاص وخلينا مثلا نشوف الواقع الموجود بالنسبة للدكاترة ونفس الكلام لكل المهن

1- دكتور شاطر فى الدراسة وعنده أخلاق وضمير مهنى
2- دكتور شاطر فى الدراسة وليس عنده أخلاق ولا ضمير
3- دكتور تحصيل علمى ضعيف واخلاق وضمير مهنى
4- دكتور تحصيل علمى ضعيف وليس عنده اخلاق أو ضمير

هى ديه الانواع الموجوده وتقدر حضرتك تعرف كل واحد على حده من الانواع ديه حيكون تاثيره ايه على الناس وحيعمل فيهم ومعاهم ايه ،،،، طيب مين الى بيربى الدكتور او غيره مش الأم ومين بيكون معاه اسرة مش الزوجة

لما نتذكر أن الجنة تحت اقدام الامهات ده يخلينا نفكر فى ايه ولما نشوف ان من طبيعة الانثى التحمل الفائق لمشاق الانجاب والولاده وغيره وبعد كده مسئوليه تربية اولاد علشان تقدم منفعة للمجتمع فكل ده يخلينا نعرف دور المراة الحقيقي والعكس تماما احنا عايشينه حاليا ومجربينه وشيفين النتائج على عينك يا تاجر والى ينكر يبقي اعمي البصر والبصيرة

أخيرا ليس كل ما يتمناه المرء يدركه ولكن الله يرزق من يشاء بغير حساب والحياة الدنيا فترة اختبار صعبة جدا

ان شاء الله خليك متوكل على الله بصدق بالبحث السريع والاستقرار وده وقت البحث عن الاساسيات وبعد كده شوف الظروف حتمشي معاك أزاى ووفق نفسك مع زوجتك فى افضل الطرق الممكنة والمتاحة لبناء اسرة صالحة ومواجهة المصاعب بشكل لا يغضب الله أبدا

وشوف كده المشاركة ديه افحصها كويس وشوف النبض ودرجة الحرارة ان شاء الله يرزقك الله خير متاع الدنيا الزوجة الصالحة وان شاء الله تكون زوجتك فى الاخرة كمان علشان الست الصالحة حتكون ان شاء الله أجمل من الحور العين وشوف انت بقه الله المستعان.

هذا الموضوع اكثر من رائع وبما انى طبيب لى تعليق عليه
كل الاسباب المتنوعة الذى ذكرها الاخوة الفضلاء فى الحوار تصب فى هدف واحد الا وهى اذا اردت ان تتزوج فاظفر بذات الدين تربت يداك وكل ما يعانى معظم المتزوجين هذه الايام من هذه النقطة بالذات فان الاساس الدينى اصبح شبه منعدم فى الاختيار ودعونا لا نضحك على انفسنا بكلمات المجاملة اصلها انسانة متربية ومن عيلة ومتدينة ومعلش مع احترامى للجميع الشكل العام الاجتماعى والمال والجمال هو الاساس الذى تم عليه الاختيار والدين ده حاجة هامشية يعنى بتصلى وحاجة كدة نص كم على راسها من اشباه الحجاب ومشى حالك
الان وانا قاربت الخمسين من العمر ولى تجربة زواج من اكثر من 20 سنة اعتقد انها تجربة شاذة وغريبة لن تتكرر لا استطيع ان اذكرها بتفاصيل كثيرة لانها امور شخصية ولكن خلاصتها اخترت امراة متعلمة وذكية ومتدينة عن علم وعمل وفقه وليس كلام فاضى وكانت من اسرة فقيرة واهلها اناس بسطاء جدا وكانت هناك معارضة شديدة من اهلى كيف يمكن لهذا الطبيب المرموق ان يناسب مثل هؤلاء ؟ واصريت على اختيارى وحاربت الدنيا من اجله وتخلى عنى الجميع ولم يتكلف زواجى سوى الفين جنيه تصدقت بها خالتى على ولم اشترى شبكة كما يفعل القوم بل اخذت ذهب امى ورددته لها ليلة الزواج حتى لا يقال تزوج بدون شبكة ولم اشترى اى اثاث بل على عفش امى القديم وعشت اول سنوات حياتى اعانى شظف العيش وقلة المال ولكن كنت اسعد انسان على وجه الارض بهذا الملاك الممتلئ حبا وايمانا بالله ورضا بما قسم الله لنا وكنا والله العظيم فى سعادة لو علمها اهل الارض لحسدونا عليها
والحمد لله تحسنت احوالى وفتح الله على وحصلت على الماجستير والزمالة البريطانية وبدل السيارة اصبح لدى 2 و3 سيارات وبدل شقة امى المتواضعة قاربت على الانتهاء من فيلتى الخاصة وبها عيادتى وشقتى وشقة لكل ولد من ابنائى الاربعة
ولدى من المال الكثير فى البنك واصرف فى الشهر من المال مالو ذكرته لن يصدقنى احد
ولكن زوجتى وملاكى وحبى الاول والاخير هى هى لم تتغير ولم يؤثر المال على شخصيتها وحبها وزهدها فى الدنيا ففى النهاية الدنيا حقيرة لا قيمة لها وسنحاسب على كل شئ لماذا لانى اخترت ذات الدين الحقيقي عن عقيدة وفهم وسلوك
تقبلوا مرورى



جزاك الله خير على كلماتك الجميلة ولك بمثله ان شاء الله
بمناسبة رضا الوالدين انا كان والدى ووالدتى معترضين تماما ورافضين لهذا الموضوع وانا اصريت عليه وكان مبداى هو رضا الله سبحانه وتعالى المقدم على اى مخلوق ولا طاعة لمخلوق فى معصية الخالق والحقيقة انا من النوع اللى لا احب التقليد ابدا ومجاراة من حولى وانما لى راييى الخاص الذى اتمسك به
والحمد لله بعد الزواج العلاقة بين ابواى وزوجتى تحولت الى مايرام
تقبل تحياتى

سبحان الله وبحمده سبحان الله العظيم
سبحان الله العظيم وبحمده
الحمد لله

سعدت جدا بمشاركتك استاذ احمد

انا معاك جدا في ان الخلاق بقت في انحدار


انا لما كنت بنزل بنزل شيفتات في مستشفي الدمرداش كتدريب يعني كنت بشوف حاجات عمري ماكنت اتخيلها ... بتلاقي بعض الدكاتره النواب اللي تقدره تقول عليهم شمال بيتعاملوا مع الممرضات بدون اي حدود او القاب.. هزار بالايد تلاقي .. ممرضه تشتم دكتور علي سبيل الهزار تلاقي... ممرضات بيتكلما مع الدكاتره في ادق تفاصيل العلاقه الزوجيه تلاقي..وحاجات ما ينفعش تتقال هنا

بس زي ما قولت دول شمال .

. ولكن في دكاتره تانيين محترمين وحاطين حدود للتعامل

... الدنيا لسه فيها ولاد ناس محترمين برده
وكتير علي فكره بس

المشاركة الأصلية كتبت بواسطة mr_safwt

جزاك الله كل خير
انا عايز اقول لحضرتك انى قبل ما اشتغل كنت معترض على عمل المراة بنسبة 90% وبعد ما اشتغلت لقيت انى غلط لان لغيت اصل احتمال ان زوجتى تشتغل اطلاقا
حضرتك بتتكلم عن اللى بيحصل فى المطاعم ولكن انا عايز اقولك اللى بيحصل فى الشركات المالتى ناشيونال اكتر مليون مرة من اللى شفتة فى المطاعم
انا عايز اقول لحضرتك ببقى قاعد وسمع ضحك البنات كاننا فى كبارية بغض النظر عن اللبس اللى هم فاكرينة موضة اوربا واصلا فى اوربا دة لببس بنات الليل لانى شفت الستات فى اروبا فى شغلهم بيقى لبسهم محترم مليون مرة عن هنا عشان كدة حتى لو انا واثق فى زوجتى مليون فى المية انا لااقبل انها تبقى فى مكان زى دة
غير اصلا انى الفكرة من اولها مرفوضة انا مش متخيل اانى داخل البيت ومراتى لسة داخلة او داخلة وراى وطبعا الواحد بيرجع من الشغل مش شايفة ادامة
من وجه نظرى عمل المراة هو فعليا تدمير للمجتمع وهو اللى وصلنا للاخلاق اللى بقينا فيها دلوقتى

استاذ صفوت... انا يمكن الكلام اللي هقوله ده هيبقي من وجهه نظري كشاب .. ودي برضه وجهه نظر زمايل كتير ليا.. مش عارف حضرتك هتتقبلها ولا لا .. بس انا هعرض وجهه نظري ونتحاور فيها
بس ارجو ما حدش يفهمني غلط او يفتكر اني دي وجهه نظر شاب مراهق

مش معني ان الواحد يقبل ان مراته تشتغل يبقي هيشغلها في مثل هذه الشركات

انا ذكرت قبل كده بعض الوظائف اللي من رايي غير مهينه للمراه

مدرسه... صيدلانيه .... مدرسه في حضانه.... جميع الهيئات الحكوميه واخري

انا كنت زي حضرتك بالظبط في فكره ان الست ليها بيتها بس بصراحه لما فكرت تراجعت عن الفكره

كل اللي اعرفهم حواليا بلا استثناء وزوجاتهم ربات بيوت بيعانوا من هذه المشكل

1) الزوجه فاضيه للنكد والخناق 24 ساعه في ال 24 ساعه
2) الزوجه تشعر انها لم تحقق زاتها .. شايفه زوجها مركزه بيكبر قدامها. طبعا بتفرحله بس حاسه انها اتظلمت
3)مستوي تفكيرهم ياخذ في التدني تدريجيا حتي يصل الي التفاهه فقط.. لا يتحدسون الا في الطبيخ والفوط والملايات والبطاطين
4)لا يوجد اي اهتمام بنفسهم علي الاطلاق وده بيبدا بعد الزواج بفتره قصيره جدا قد تصل الا سنتين او اقل
5)وسط اي خلاف زوجي.. الزوجه تقول لزوجها انا اللي عملتك يقوم رادد عليها يقولها انتي ميين اصلا وده بيعمل شرخ في العلاقه يستحيل اصلاحه
6)وزن الزوجه يزيد تدريجيا واهمال نفسها (بحجه انها مشغوله في البيت والاولاد) يزيد تدريجيا حتي تجعل زوجها يسب ويلعن الجواز ويبدا يبص لبره ويكره حياته

برده الزوج معزور... الفتن حوليه في كل ناحيه

انا مش ابرر له انه يعصي ربه بس بعزره لو سب ولعن في الزواج


اهتمام الزوجه بنفسها مش حراااام ومش كماليات ومش عالم فاضيه
ايه المانع ان الزوجين يعيشوا مع بعض طول عمرهم في حب وتفاهم

المشاركة الأصلية كتبت بواسطة engmody32

اولا اشكرك يا استاذ احمد علي وصف مشاركتي بالرائعه هي و لا رائعه و لا حاجه هي واقعيه و بناء علي تجارب شخصيه او تجارب من الاصدقاء
فعلا الموضوع عامل زي عرض السلعه و لكن لما فكرت بعمق اكتشفت ان اهل العروسه بيكون ليهم وجهه نظر
في دنيا اصبحت ماديه جدا و بلد علشان تقدر تعيش عيشه ادميه فيه محتاج فلوس كتير
يعني علشان تسكن في مكان نضيف ( كومباوند مثلا )ليه مواصلات او طرق كويسه و تودي ولادك مدارس كويسه و تاكل كويس و كده و تجيب مولد لزوم انقطاع الكهربا
محتاج فلوس كتير جدا
طيب هل الناس للي معاها الفلوس دي مش موجوده لا موجوده
يبقي انا ليه ابص للشاب المكافح اللي هيقول لبنتي الميزانيه بتاعتنا و دي منقدرش عليها و دي متنفعش و دي مش عارف ايه و الشاب ده علي الحسن الظروف هيبقي اكبر من بنتي ب 7 سنين او اكثر
و لا ابص للشاب اللي اتخرج و بقي جاهز نتيجه انه اهله ميسورين سواء من السفر لخارج مصر او انهم ربنا كارمهم جوه مصر و هيجيي لبنتي يجيب شقه في برج ايه و لا كومباوند ايه و يجيب عربيه صغيره ليها زي عربيته و يعيشها عيشه تمام التمام و نضيفه و كمان احتمال كبير يبقي في نفس عمرها فمتحسش هي انه اكبر منها
ده بالنسبه للأهل اللي نفسهم بنتهم تعيش احسن عيشه ممكنه
بالنسبه للشباب لا الشاب المرتاح شرير و مش راجل و عيل طري
و لا الشاب المتكرحت فقري و ميستاهلش انه يتجوز و لا انه يخش دنيا
من الاخر هو واحد كان رزقه انه يلاقي كل حاجه متيسره بزياده و انه يتولد بأمكانيات عاليه
و التاني مشكلته انه رزقه محدود و ان اهله ناس علي قدهم
اللي اوجد المشكله دي في العصر الحديث
هو ظهور الطبقه المرتاحه من الشباب بكثره بتفوات نسبه ارتياحهم المهادي
يعني زمان كنت تلاقي من كل 1000 واحد واحد بس ظروفه احسن من اللي في سنه
فبالتالي مكنش عامل خلل و الناس بتختار من العرسان ال 999 اللي ظروفهم شبه بعض فتبدء تبص علي الدين و الاخلاق و العيله بزياده شويه
لما الطبقه المرتاحه زادت و نسبه اعتماد الابناء علي الاهل زادت في التجهيز و المساعده في الجواز بقي الناس تحب تناسب الناس المرتاحه حتي لو اقل تدينا و خلقا من الناس المتكرحته
اصل البنت مش هتاكل دين و لا هتشرب اخلاق و لا لما هتطلب حاجه هتشتريها بطيبه جوزها
المشكله الاساسيه ظهرت في عدم التكافؤ يا استاذي تخيل كده انك اديت واحد في سباق جري فرصه انه يسبق زمايله ب بدقيقه قبل ما تضرب صفاره بدء السباق اكيد هيتغلب عليهم و هيكسب
اللي يخلي الواحد يستغرب فعلا هو كميه الناس اللي اعرفها اللي عماله تفكر و عيالها لسه في ابتدائي ازاي هيجيب لأبنه شقه علشان يجوزه فيها و هيحوش ليه اد ايه علشان مصاريف الجواز
متخيل حضرتك الفكر بقي عامل ازاي
في الاخر انا شايف ان كله رزق و زي ما كلنا عارفين و مؤمنين لا حيله في الرزق و لا شفاعه في الموت

يا بشمهندس كلام حضرتك سليم جدا ... الاهل حاليا مش بيجوزوا بناتهم الا لواحد جاهز

بس برضه في قيود وحدود ... بمعني انه لو جه لحضرتك واحد يخطب بنتك .. وعنده الفيلا والعربيه والرصيد البنكي ومستوي اجتماعي عالي بس لقيته واد فرفور او تابع لوالدته في كل تصرفاته وقراراته
اكييد هترفض

طب برضه لو جالك واحد مرتاح ماديا بس من بيئه مفتوحه وكل حاجه ايزي عادي بيس وعلطول علي القهاوي وعاطل بدون شغل (بيصرف من فلوس بابي) ومعالته .. لا بيصلي ولا بحافظ علي حدوده في التعامل ..اكيد برضك هترفضه

طب لو محترم راجل.. بار بوالديه.. في منصب محترم .. ومؤهل محترم .. وشقه مقبوله او متوسطه .. واهله حبوا انهم يساعدوه في الزواج.. اظن ان ده مش عيب خاصه لو ليه مستقبل باين

من الاخر زمااان... علي الاقل هتكلم عن تحربه والدي.. والدي خريج هندسه واتجوز بامكانيات محدوده جدا جدا جدا استحاله اي عيله في وقتنا هذا تقبل اي شاب دلوقتي بالمكانيات المحدوده دي اللي والدي اتجوز بيها... بس علي الاقل كان في ايامهم تعيين ومرتب ثابت


لكن الان لا في تعيين ولا في ملامح للمستقبل


بس برضه لو واحد مستريح وراح يخطب واحده وحس ان في طمع او استغلال او ضغط علي البنت بحجه ان دي فرصه مش هتتعوض .. يبقي فركش ومع السلامه