الموضوع: مشكلة مقابلاني ف شغلي الحالي ومحتار أسيبه ولآ لآ !؟؟

بسم الله الرحمن الرحيم
الحمد لله والصلاة والسلام على رسول الله نبينا محمد خير خلق الله

يا استاذ محمود الله يبارك فيك ويكرمك انت وكل الناس الى شاركت فى الموضوع ده
المشكلة الرئيسية مش فى الاراء ومدى صحتها من عدمه المشكلة فى الواقع الى مش عارفين نتعامل فيه .

خلينا الاول نتفق على مبدأ وبعد كده نفكر أو نستشير بعض وكده حيكون السؤال كالاتى

انسان متخرج من كليه او مؤهل متوسط أو حتى مش متعلم وعايز يمشى بشكل طبيعى يحاول يتجوز علشان يحفظ نفسه ويحفظ غيره من الناس الى حاوليه فى المجتمع يعنى اقل احتياج من غير ما يشترى شقة على اعتبار ان الاهل بداو يفهموا المشكلة وحيساعدوا الشباب ويجوزهم معاهم فى البيت وهما كده كده بيصرفوا عليهم ،،،، يبقى عل الاقل انه يكون عنده مصدر دخل يصرف على بيته ( أو الأوده الى حيسكن فيها مع زوجته فى بيتهم أو بيت زوجته) ،،

السؤال الأول : هل الهدف جمع الفلوس أو الهدف عدم عمل حاجة حرام وجمع الفلوس برده

السؤال الثانى : هل عدم وجود شغل متوفر فى مجال دراستى أو اى مجال أخر ده يخلينى اقبل انى اشتغل حاجة حرام أو ابيع نفسي علشان الفلوس

السؤال الثالث : طيب ايه هى الحاجات الحرام وايه نوعية الشغل الحلال

اكيد بالفطرة كده الحلال واضح والحرام واضح والاشغال الى بتحتاج فتوى من شيخ عالم مخلص لله فى الفتوى بتكون مش كتير والاجابات فيها واضحة

يعنى مثلا لما يكون فى ايات واضحة جدا فى القران الكريم وفسرها علماء من مئات السنين بتقول للناس المؤمنين بالله بالغيب وعندهم نيه يسمعوا كلامه عز وجل ان الربا حرام وان الناس الى بتتعامل بالربا .. الله عز وجل سوف يحاربهم .. نيجى بعد كده ونقول الربا عادى وكويس ونتعامل بيه وكل ده وحالنا سيئ جدا ومش منتبهين للسبب .

ومثال اخر مثلا حد معاه فلوس يعمل مشروع وفى كذا اختيار مثلا يفتح كافيه يقدم فيه مشروبات وشيشة و الشكل العادى بتاع الكافيه طيب دلوقتى قبل ما يفتح المشروع مش لازم يفكر هو المشروع ده حيفيد الناس ولا حيضرهم ولا بس يفكر هو حيكسب كام

واذا فكر هو حيكسب كام يبقي بلاش خالص فكرة الكافيه وممكن يعمل حاجات كتير بتكسب فلوس اكتر بكتير مثلا شركات جواز وتوفيق بين الناس وديه معروفه انها مكاتب مشبوهة أو تجارة مخدرات أو عمل اعلانات وهمية والنصب على الناس فى اى مجال

طيب حتقول ايه جاب الكافيه ل الحاجات التانية الوحشة ديه ده اخف ضرر بكتير كلام مضبوط بس الاتنين اذى وضرر للغير علشان تكسب فلوس

وقيس على كده اى حاجة

شوف يا حبيبنا استاذ محمود انت من فترة طويلة بتعمل مواضيع علشان تشارك الناس برايهم وكل الناس عارفه مشكلتك لان هى بالضبط مشكلتهم ف متزعلش من حد أكيد كل الناس بتحاول تساعد بعض وهى مقدره الواقع وعايشه كويس

اخيرا علشان الموضوع كبير وفى نقاش واسع أنصحك يا استاذنا أنك تسيب الشغل فى التامين لانه حسب ما سمعنا من زمان أنه حرام هو والبنوك زى كل حاجة واضحة الدعارة والمخدرات والتدخين وغيره وغيره وممكن تفضل تعد وتدور لغاية ما تكتشف انك مش لاقى حاجة تعملها وهى ديه الحقيقة وانا شخصيا سبت الشغل من فترة كبيرة وقعدت فى البيت بمزاجى لما لاقيت ان المسالة وصلت ان اى حاجة مطلوب فيها تبيع دينك وتبيع نفسك وشرفك وكل حاجة

وناس كتير حتقول طيب وده حل انت كده غلطان والاجابة حتكون كل واحد ظروفه غير التانى أنا عندى 36 سنة ومش متجوز والواقع واضح فانا أخترت انى اعمل كده وانتظر لما فلوسي حتخلص حاموت بس فى مقابل أنى مش حاعمل حاجة من كل ما رايته
وده أفضل من انى أكسب فلوس وما العلم انى ممكن بسهولة جدا أعمل اى حاجة اذا قررت كده لان المجال مفتوح ومش عايز غير شويه تفتيح عقل ..ههه

وده افضل كمان من انى اتجوز واكون اسرة واصرف عليهم فلوس حرام وطبعا النتيجة من الاسرة ديه حتكون معروفة جدا

وممكن يا استاذ محمود تفكر فى الهجرة لاستراليا أو نيوزيلاندا بما انك شاطر فى اللغة ولسه سنك صغير ومتخرج جديد

إن شاء الله ربنا يكرمك ويوفقك واحنا كمان معاك وكل الناس الطيبة المحترمة

وخالص الحب للمنتدي الحبيب الى بصراحة مش عارف بحبوا ليه وكل ما حاول أبعد عنه مش بقدر بس التفسير الوحيد أكيد بحبوا علشان الناس الى ساكنه فيه

سبحان الله وبحمده سبحان الله العظيم

لا حول ولا قوة إلا بالله العَلى العظيم

الحمد لله