الموضوع: منع تجديد ترخيص السيارات الملاكي الذي مر على تاريخ صنعها اكتر من 20 سنه

بصراحة أنا ماسك نفسي من كام يوم و مش عايز أشارك في الموضوع ده عشان مزعلش حد مني

أولاً أنا مش هشارك في الموضوع سعياً وراء مصلحة شخصية لأني و الحمد لله مش هتأثر بقانون زي ده لو فرضنا جدلاً إنه إتطبق على السيارات القديمة لأني عندي سيارة موديل 2008 بس بصراحة زعلت من طريقة تفكير بعض الناس اللي عايزين يحلوا مشاكلهم و لو بالدوس على رقاب الآخرين

و كنت أتمنى من الأخ الفاضل صاحب الموضوع أن يجد حلاً لمشكلة المرور في القاهرة بعيداً عن إيذاء الآخرين خصوصاً لو كانوا هؤلاء الآخرين هم من البسطاء (مش هنبقى أحنا و الفقر عليهم) كما كنت أود أن يضع في إعتباره البعد الإنساني و الإجتماعي لهذا الحل فلا يصح يا سيدي العزيز أني أحل مشاكلي على حساب تعذيب الآخرين

و مش معنى إني ربنا مقدرني أشتري عربية زيرو يبأة لازم الشوارع تبأة رايقة و الحياة حلوة ليا أنا و بس وفي نفس الوقت أطالب إننا نرمي في الزبالة عربية بتاعة واحد تاني باع ذهب مراته و عمل جمعية و يمكن كمان يكون استلف عشان يجيب عربية ب 15 ألف مثلاً بغرض إنه يرحم نفسه من البهدلة في المواصلات و يرحم زوجته و بناته من إنتهاك أعراضهن في المواصلات _ واحد زي ده لازم نقدره كإنسان و مش مفروض إننا نقول له روح أولع بجاز بعيد عننا و سيب لنا الطريق فاضي


يا سيدي العزيز عيش و خلي الناس تعيش مش معنى إنك تعيش إن الآخرين يموتوا

و أخيراً

الإختلاف في الرأي لا يفسد للود قضية

تقبل تحياتي

المشاركة الأصلية كتبت بواسطة enghonda

قانون جديد الفكرة في طرحه هو اننا نضرب عصفورين او اكتر بحجر واحد يعني اولا اننا نقلل من الكثافه المروريه في الشوارع ونضمن قلة اعداد العطلات الناتجه عن أعطال السيارات القديمه اللي بتعذبنا في الشوارع بالاضافه الى ان السيارات القديمه دايما بتكون مواتيرها انتهت صلاحيتها وحتى لو اتعملها عمرة مبترجعش زي الاول وبالتالي بتطلع لنا سموم ملهاش حل بتلوث الجو واللي بخلي اعلى معدلات تلوث داخل المدن موجوده عندنا في القاهره الكبرى وده نعتبره ثانيا غير كده انه هيكون الاقبال على شراء سيارات جديده هيكون كبير لدرجه هتخلي اسعار السيارات الجديده تنزل الارض وهتظهر لنا انواع وموديلات جديده منافسه زي اللي انا عن نفسي شفتها في دول الخليج .. غير كمان ان قلة الكثافة المروريه دي هتساعد في ظهور المجهودات اللي بتعمل عشان صيانة وتطوير الطرق اللي طبعا صعب انها تنفذ دلوقتي بسبب الزحام الدائم وعدم توافر طرق بديله لتحويل مسار السير ليها عشان تتم الاصلاحات اللي محتاجاها كل الشوارع والكباري ومش لاقي حتى طريق واحد ادي عليه مثال على صلاحيته... يلا ماعلينا.. المهم اكيد في بردو لو فكرنا كلنا هنلاقي في فوايد تانيه كتير وياريت منبصش من الناحيه السوده للفركه دي على اساس مثلا هنجيب جديد منين والايد قصيرة والكلام ده لأن اللي مش معاه يجيب جديد في اكيد طرق تانيه طبعا شريفه يشتري جديد سواء تقسيط او غيره بالاضافه ان وسائل المواصلات التانيه هيكون مجبره انها تتحسن وتتطور عشان تستقبل الاعداد الكبيرة اللي هجيلها وتستخدمها وهيكون المسؤلين مضطرين انهم يوجدو طرق جديده وفعاله لايجاد وسائل نقل اكثر فعاليه وبتخضع لقوانين المرور والبيئه...
ياريت تكون فكرتي وصلت للجميع وانها فعلا تكون مفيده لينا كلنا.. ولو عاوزين تأكدو من الفوائد الناتجه من تطبيق القانون ده ياريت تطلعو على احوال المرور في دول الخليج وفي اوروبا

-الموضوع دا فعلا مهم جدا
وانا شايف ان الاول اللى لازم يتعدموا هم الميكروباصات الرمسيس القديمة اللى اكصدامها ل10 لينيا دا لو حك بس فى اكصدام فيبر جديد تلاقيه فرقع واتفتفت واللى تلاقيهم دائما هم سبب المشاكل وتلاقى الملاكى ايا كان بيحدث منه مشاكل تفاديا اصلا لمشاكل الميكروباصات ديه
والله انا من خبرة سواقتى فى الشارع المصرى لسنوات عديدة لاحظت ان السيارت القديمة لا تسبب مشاكل فى الشارع المصرى الا قليلا جدا يعنى لو عربية نص نص على قدها تلاقيها يا عينى واخدة جنب وماشيه على مهلها
طبعا لو الامور ماشية بهدوء هتلاقى العربيات دية لاتمثل مشكلة ولكن نحن فعلا فى احتياج لتقليل الكثافة المرورية وانا شايف ان دا احسن حل بس لازم الناس ديه تتعوض

-أعتقد ان بتطبيق القانون دا أسعار السيارات هتنزل ودا بالنسبة لى اكيد لانه سيحدث انتعاش لسوق السيارات والناس ديه لازم تتعوض بردوا

-بس بصراحة لو فعلا تم تنفيذ هذا القانون الناس هتتقبله ازاى؟؟؟ افتكر هيحصل كدا

بيدى لا بيد عمــــــــــــــــر

المشاركة الأصلية كتبت بواسطة shankosi

بصوا يا جماعة، بالذمة دي عربية تتكهن:



دي موديل 1987

لما دي خلاص متتركبش أمال ايه اللي يتركب؟

ديه بالذات لازم تتكهّن
وتروح هديه لعظمة السلطان طووويل العمر يطول عمره ويحميه من مين يعاديه
قول ان شا الله

الله معنا

المشاركة الأصلية كتبت بواسطة the_terrible

تخريف x تخريف ..
يعنى انا ادفع 40000 جنيه فى عربيه موديل 98 مثلا وارمى العربيه كمان 10 سنين !!!!
ولو جيت ابيع العربيه محدش هيرضي يشتريها طبعااا
كل واحد هيقولك انا اشترى عربيه ناقص لها 6 او 7 سنين وتترمى !!!
حاله الشعب المصري متسمحش بكده نهائي ...
ولاحظ انك لازم تدخر فلوس لاولادك هما كمان ..لانك لما تشترى سيارة جديده واولادك يكبروا هتكون السيارة اتمنع ترخيصها .. ساعتها بقي هتجيب سيارة تانيه ليك ولا تجيب لابنك ولا هتعمل ايه !!!!!
تخـــاريـــف والله ..

la2 mesh 7atetremi wala 7aga

momken fekra tania
yemna3o tar7`esha da7`el el kahera masalan aw yb2a men 7a2ak tbee3 aw tera7`as ai mo7afza tania feha kathafa mororia 2a2al..

wel kol yb2a kasban

المشاركة الأصلية كتبت بواسطة enghonda

ثانيا غير كده انه هيكون الاقبال على شراء سيارات جديده هيكون كبير لدرجه هتخلي اسعار السيارات الجديده تنزل الارض وهتظهر لنا انواع وموديلات جديده منافسه زي اللي انا عن نفسي شفتها في دول الخليج ..

حسب قاعدة العرض والطلب
فإنه في حالة زيادة الطلب ترتفع الأسعار وليس العكس

المشاركة الأصلية كتبت بواسطة enghonda

غير كمان ان قلة الكثافة المروريه دي هتساعد في ظهور المجهودات اللي بتعمل عشان صيانة وتطوير الطرق اللي طبعا صعب انها تنفذ دلوقتي بسبب الزحام الدائم وعدم توافر طرق بديله لتحويل مسار السير ليها عشان تتم الاصلاحات اللي محتاجاها كل الشوارع والكباري ومش لاقي حتى طريق واحد ادي عليه مثال على صلاحيته

كيف ستساعد على ظهرو مجهودات غير موجودة بالمرة
لا يوجد في مصر مسؤول عن صيانة الطرق
هناك حفر في طرق رئيسية منذ خمس سنوات مثلاً .. من المسؤول عنها ؟ وهل إصلاح الحفرة يحتاج لتفريغ القاهرة ؟

الأهم أن تتواجد الإرادة للصيانة والتطوير وبعد كده هناك ألف طريقة للعمل بعيداً عن الزحام

المشاركة الأصلية كتبت بواسطة enghonda

المهم اكيد في بردو لو فكرنا كلنا هنلاقي في فوايد تانيه كتير وياريت منبصش من الناحيه السوده للفركه دي على اساس مثلا هنجيب جديد منين والايد قصيرة والكلام ده لأن اللي مش معاه يجيب جديد في اكيد طرق تانيه طبعا شريفه يشتري جديد سواء تقسيط او غيره بالاضافه ان وسائل المواصلات التانيه هيكون مجبره انها تتحسن وتتطور عشان تستقبل الاعداد الكبيرة اللي هجيلها وتستخدمها وهيكون المسؤلين مضطرين انهم يوجدو طرق جديده وفعاله لايجاد وسائل نقل اكثر فعاليه وبتخضع لقوانين المرور والبيئه...

للأسف حاولت أبحث عن ناحية أخرى غير الناحية السوداء لأبص (لأنظر) من خلالها فلم أجد

من أين يكون للحكومة الحق في التعدي على الملكية الخاصة لأحد وهي مصونة من الله سبحانه وتعالى أولاً وأخيراً

بل الأسوء هو عدم المساواة حتى في الظلم والتفرقة بين الغني والفقير وسلب سيارة الفقير وإفساح الطريق للغني !!!!

ومن الذي يجبر الفقير على ترك سيارته الخاصة وركوب المواصلات بأي حق ؟؟؟

وعلى ذكر المواصلات التي لا يوجد منها نوع محترم في بلدنا

أما الأمل في أنه بعد سلب سيارة الفقير وبهدلته ستقوم الدولة بتغيير أحوال البهدلة أقصد المواصلات فهي أحلام وردية
فلو كان عندهم النية لأشفقوا على حال خمسين مليون مواطن يركبون المواصلات الآن
أو على الأقل قل لي سبب لتعطيل الحكومة لعداد التاكسي ماهو العائد من ورائه ومن المستفيد الآن من تعطيله ومشاكله ؟؟؟

المشاركة الأصلية كتبت بواسطة enghonda

ياريت تكون فكرتي وصلت للجميع وانها فعلا تكون مفيده لينا كلنا.. ولو عاوزين تأكدو من الفوائد الناتجه من تطبيق القانون ده ياريت تطلعو على احوال المرور في دول الخليج وفي اوروبا

للأسف الفكرة قاصرة إعتدت على حق الضعيف ليرتاح الغني
وسلبت أملاك الفقير ليستمتع الغني وحده

عندما تكون هناك إرادة من المرور لتسييل المرور فهم فوراً يفرغون البلد وتجد الألوية تقف في الإشارات وتجد العميد يحرك الطريق
ولكن إذا أرادوا تقفيلها فإنهم يقفلونها جيداً


وفي النهاية الكل يفكر في حل مشكلته على حساب الآخر


والمتهم يقف للفرجة وعنما يكون هناك موكب يمر بالقاهرة تجد المتهم جعل القاهرة له جنة خالية

السيارات الملاكي ملكية خاصة ولا يمكن تحديد توقيت وتاريخ لعدم ترخصيها وبعدين صاحب الملاكي القديمة بيحرص علي أصلاحها غير أصحاب السيارات الاجرة وبعدين الشوارع مش حاتفضي ولا حاجة دي حاتتملأ سيارات جديدة وأصحاب التوكيلات حا يغلوا أسعار السيارات الجديدة أضعاف مضاعفة

فى عربيات قديمه ومحترمه جدا ولسه ماشيه احسن من موديلات كتير بعدها
المفروض اللجنه بتاعت الفحص فى المرور هي اللى تحكم بحق ربنا، مش بالواسطه والجنيه والكارنيه
انا بعيني شوفت ميكروباص بيرخص وبيطلع دخان ابيض