الموضوع: لو بقى معاك فلوس !!!

المشاركة الأصلية كتبت بواسطة mahmoud naguib

mecha أستاذي الفاضل كلامك هجومي وحاد جدا ولآ أقبل به بحال !!

أستاذ أحمد كمال كلامك كله أنا مقتنع بيه ونفسي أعمله بس مش عارف !!
يعني نفسي أبقى قنوع وآخد السلم واحدة واحدة بس مش عارف أطبق ده فى حياتي !!
ياريت لو تعرفني ازاي !؟

أستاذ 4fun14 انت ذكرت المال والصحة والحب وأحب أضيف عليهم الإيمان بالله وده أهم عنصر واللي منه بتيجي الإجابة على استنتاجك بمواطني السويد !

أنا معنديش حاجتين المال والحب بس عندي إيمان بالله وصحتي كويسة الحمد لله ودول أهم عندي من أي حاجة تانية !!

اخي الكريم , انا لا اتجرأ و اوجه رايي السابق الي احد بشخصه .مجرد رأي عام واستنتاج للحال بسبب زمن الانفتاح .عفوا لسوء التفاهم وشكرا

المشاركة الأصلية كتبت بواسطة eslamrace

ا/محمود انا متفق معاك ان الموضوع ظاهره كده ودى الصوره العامه للوضع بس خللى بالك من الجمله اللى قولتهالك فى الموضوع اللى فات ان كل حاجه بتختارها بتضحى بحاجات تانيه كتير ازاى خلينى اقولك

مبدأيا لو معاك فلوس "بعيدا عن الفلوس السهله "ورث او شئ شمال عمرك محتعيش بالصوره اللى انت بتقولها فبالفعل حيبقى عندك تليفزيون 4kوفيلا فى كومباوند بس مش حتتفرج على التليفزيون ولا حتقعد فى الفيلا الفيلا حتكون للنوم وساعتها مش حتكون فارقه انت بتنام فين والتليفزيون من الديكور بالظبط اكنه مش بتاعك والعربيه المرسيدس عمرك محتستمتع بركوبها لان دماغك مش حتبقى فيها ولا فى الطريق داغك فى شغلك اللى انت خايف تخسره بعد متعبت فيه ومراتك واولادك حتقابلهم فى الاجازات فقط لا غير وعمرك محتبقى دماغك فاضيه كده علشان تشوف ولادك وهم بيلعبوا حتبقى مستنى تليفون يقولك اخبار شغلك ايه ومشاكل الشغل اخبارها ايه وانسي فكره انك تعمل شوبينج انت بتلبس اى حاجه موجوده عندك لان مظهرك مش حيبقي اول اولوياتك فى حاجات حتبقى اهم .
طيب هى العيشه دى حلوه اقولك حلوه للى حابب يعيشها واختار انه يتنازل عن راحه دماغه فى نظير انه يخلينا نبصله بالنظره اللى انت ذكرتها فى الموضوع

بص بقى للشخص اللى اختار انه يتنازل عن العيشه اللى فى الفقره اللى فاتت فى مقابل حاجات تانيه حتقوللى زى ايه اقولك هو اختار انه يشتغل 8 ساعات ويروح بيته اللى هو شاريه بالقسط يلاقى زوجه وشويه عيال يقضى معاهم باقى نهاره وعنده اختيار انه يخرج يروح سيتى ستارز "مش حيشترى " بس خارج مع اسره فى جو من المرح وممكن يشترى حاجه ساقعه "اخينا اللى فوق مبيشربهاش علشان هو بيشرب قهوه بس علشان يعرف يركز " وضامن انه فى اخر الشهر حيقبض مرتب ثابت بغض النظر الشركه ولعت صاحبها خسر موظف زميله سرق ولا فى دماغه حاجه وكل صيف بياخد اجازه غصب عن عين صاحب الشركه "اخونا فى الجزء الاول" ويطلع يأجر شاليه فى السخنه او فى الساحل وينسي كل همومه فى فتره اجازته ولو زنقت اوى معاه يقفل موبايله وتولع الدنيا "هو فى اجازه " ولما بيحب يشترى بنطلون جديد ممكن يفضل يلف اسبوعين اسبوع مع اسرته واسبوع مع اصحابه ويشترى احلى بنطلون عجبه فى السوق فى مقابل انه بيضحى بانه يغير شقته او موبايله او يسكن فى كومباوند وهكذا

بص مش كل حاجه بنشوفها ظاهرها لطيف يبقى باطنها لطيف او العكس الموضوع ببساطه ان الغنى ميقدرش يطلع فى التلفزيون يقولك هو تعبان من ايه لانه مش طالع فى التليفزيون يشتكى ولا صاحبك فى الشغل حيقولك انه حياته فيها حاجات حلوه لانه برضه لو قالك كده حيبقى غريب عن المحيط بتاعه فانت بيوصلك صوره عن نموذجين بس صوره مش كامله للاسف

علشان كده اللى مش مبسوط فى العالم هو اللى مش عايز يختار هو عايز يبقى ايه وسايب نفسه للظروف فغالبا بيبقى النموذج اللى هو مش حابه يعنى بيبقى موظف وعنده اسره بس مش قادر يحس انه سعيد باللى عنده علشان هو مختاروش او غنى ومش عارف يستمتع باللى عنده علشان برضه هو ماختارش ده فبيبتدى يبص للاخر على انه النموذج الاحسن
الوضع هو انك لو حتختار حتعيش مبسوط وراضى بتضحياتك انما لو حتكمل مع القطيع"واسف على التشبيه" مش حتكون مبسوط ولا راضى او حتكون راضى بس مش سعيد
الموضوع مقدمات ونتائج خليك عارف النتائج وعلى اساسها اختار المقدمات حتبقي مبسوط .

ودايما اعرف ان محدش مرتاح ولا الغنى ولا الفقير والمتجوز ولا العازب ولا المصري ولا الاجنبي انما فى سعداء فى كل التصنيفات دى والسعاده بتاعتهم انهم اختاروا

وبرضه حقولك ان فى فكره فى الكتاب اللى ذكرته فى الموضوع اللى فات لو وصلت لها واخترت الاختيار الاول حتعرف تعمل اللى انت عايزه
انا بعتلك الرساله .
تحياتى .

والله الله ينور عليك.يا ريت صاحب الموضوع وكل واحد شايف ان الفلوس بس هيه راحه البال يقرا الكلام بتاعك.الله ينور انا حاسس انى انا الى كتب الكلام ده وعن تجربه لكل كلمه فى كلامك

المشاركة الأصلية كتبت بواسطة mahmoud naguib

mecha وهو حضرتك عايش ف استراليا وبتقيس وضعك على وضع مصر واللي فيها !!
مقارنة ظالمة بالمرة !!
لو حضرتك مصري وسافرت على كبر هتفهم قصدي بس ممكن تكون مسافر من صغرك أو مولود أصلا هناك !!
وف الحالتين مصر بلد اللامعقول أي حاجة صح ف الدنيا كلها هتلاقيها غلط ف مصر !!
ياريت متتكلمش ع الناس ومتنتقدهمش واتكلم عن الحكومات الظالمة والفاسدة اللي بتحكم الدولة !

انا اتولدت في مصر وعايش في مصر وكنت حالتي ضنك والحمد لله الحالة اتحسنت ماديا وبقلك كل كلام الاستاذ صح
واضيف لكلام الاستاذ اننا شعب كسول مش بتاع شغل وعايز يوصل بالساهل زي ما بيشوف في الافلام من غير تعب .
كل حاجة تجبوها علي الحكومة , اخلاق الناس اللي زفت
الحكومة تعمل صناديق زبالة تتسرق تاني يوم
الحكومة تشيل الدعم اللي خارب الموازنة علشان ترفع من مستوي الخدمات الاخري زي الصحة تقولوا الحكومة حرامية وبتيجي علي الغلبان
الحكومة تعمل اماكن لمرور المشاه برضوا تمشوا من تحت الكباري
الحكومة توسع الشوارع علشان يتسع لعربيات اكبر تركنوا صف تاني وتالت
الحكومة مهما تعمل مفيش فايدة
الشعب لازم اخلاقه تتغير
وطول ما الناس بترمي اخطائها وفشلها الحكومة عمر البلد ما حتتغير
اصنع من الظروف الصعبة نجاح مش تقول لا الحكومة السبب في فشلي

بالظبط..كل واحد يقول ابدأ بنفسك والعيب في الناس ولازم تغير نفسها الأول بعرف انه يا اما مش عارف حاجه ياما من مصلحته استمرار الحال ده.
مفيش بلد حالها اتصلح عشان الناس غيرت من نفسها..زى ماهو مفيش بلد حالها اتنيل و الحكومه محترمه وحاطه قوانين كويسه
بس كل واحد لازم يتفذلك شوية ويعملنا نظريات جديده ما انزل الله بها من سلطان

الى اهم من الفلوس هى جتلك ازاى و هتعمل بيها ايه
انا دخلى ععالى على المقاييس المصرية بس تعيس فى حياتى و الفلوس مش مخليانى مبسوط
اضطريت اسافر علشان الظروف فى مصر زفت من 4 سنين و مع الراتب الكويس لسه حاسس بالظلم
عموما لو هبتدى من الصفر فعلا عمرك ما هتنبسط حتى لو بقيت مليونير