الموضوع: قررت اجيب نيو لوجان و ابيع الكليو...محتاج نصايح

المشاركة الأصلية كتبت بواسطة Hany Saad

أشكر الأعضاء المحترمين كلهم على هذه المشاركة المثمرة سواء بالنقض او المدح لأن كله هدفه الإفادة
أنا هفكر معاكم بصوت عالى شوية لو سمحتولى
أنا يهمنى فى العربية الجديدة الأتى:
- الشكل لأن للأسف شكل اللوجان القديم مش مميز على عكس شكل النيو لوجان بتوحى على طول بتصميم جديد و عصرى و نفس شكل الشبك الجديد المعتمد من رينو مع البادج الكبير المميز فى الوسط، طبعاً المدام مش قابلة خالص الشكل القديم لكنها معجبة بشكل النيو لوجان
- الميزانية المرصودة للسيارة 100 ألف جنيه
- أنا راجل بتاع تصليح توكيل و قطع غيار أصلية و فاتورٍة و دماغ مرتاحة، طيب إيه السيارات المتاحة فى نفس هذه الشريحة السعرية: فرنا و أفيو و لانوس و طبعاً مفيش أى وجه مقارنة ما بينهم و ما بين النيو لوجان سواء كعربية او شكل او أوبشن او توكيل بتعامل معاه من 2001.....إذاً نوع العربية محسوم بالنسبة لى
- أنا عايش فى مصر و ده سعر العربيات فيها حتى لو المفروض يكون سعر النيولوجان نصف هذا السعر، للأسف ده واقع يجب أن نتعايش معاه، و فى ضوء هذا الواقع تتفوق النيولوجان سعراً و إمكانيات ده إذا كنت عايز أشترى و أركب السنة دى، إيه ممكن يحصل بعد كده ده فى علم الله سبحانه و تعالى
- العربية دى عربية إقتصادية و تستهدف الدول النامية زى مصر و البرازيل و الهند و روسيا، لو بصتلها على هذا الأساس هتنبسط منها جداً إنما لو قارنتها بالفلوانس اللى معايا هزعل منها قوى و أنا بصراحة بقارنها بفئتها و شايف أنها أحسن قيمة مقابل المال فى ضؤ السيارات المتاحة الأقل من 100 ألف جنيه
- عملية التغيير هتفدنى بالأتى: الإرتقاء بالموديل 15 سنة للأمام و ده معناه كل الأجزاء حديثه و لها عمر أفتراضى أطول، عربية أوسع من الخلف، تكييف أقوى بكتير من الكليو و ضمان 3 سنوات مش هتدفع فيهم غير الصيانات الدورية و توفير تمن قطع الغيار و الصيانات للكليو فى تمن شراء النيولوجان و دول اكتر حاجات تهمنى، أما ثباتها فوق ال 130 فده شىء لا يهمنى لأن العربية مخصصة لمشاوير داخل البلد و فى السفر تستخدم الفلوانس كبديل أثبت و أأمن.
- أنا هدرس العربية و هفصصها بشكل جيد جداً قريباً قبل الإقدام على الشراء و هشاركم بإنطباعاتى، عملية تعويج الكابوت إذا حدثت من ارتطام الهواء بالسيارة على سرعات تعتبر عيب أما التعويج نتيجة أن حد قعد عليه او داس عليه او خلافه فده لا يعيبه لانه غير مصمم لكده و لا يتم اختباره لتحمل شخص يجلس فوقه او شىء ثقيل يرتطم به من أعلى.....يعنى لما صندوق يقع من فوق على عربية فرنا و نفس الصندوق يقع على عربية نيولوجان و الاقى الأضرار فى النيولوجان أكثر، ده لا يعنى أبداً أنها عربية أوحش....لأن الكبوت مش من مواصفاته انه يتحمل صدمات رأسية، و يبقى فرق التصميم بين السيارتين هو المقياس و ليس الجودة ( طول مساحة الكبوت و أماكن الأعصاب فيه و خلافه.....)
- فيه غلطات تقفيل ده أكيد و فيه عيوب تصميم برده وارد و لكن أشياء لا تغير قرارك بالشراء و انت و شطارتك مع التوكيل تكتشف الحاجات دى فى فترة الضمان و تغيرها لو امكن و تكون مبسوط من العربية
- العربية اللوجان/النيولوجان عامله زى طابع البوسطه فى سعرها، و ماسكه سعر بيع ممتاز....كمكنه و فتيس هما بتوع الميجان i و دول مفيهمش غلطة، كعفشة و إرتفاع ممتاز....بأكد اللوجان أحسن عربية بسعرها

أخيراً عايز حد يأكد لى هل اول فئة مانيوال فيها فرامل abs و لا لأ؟
و مساعدات بالنسبة للألوان المتاحة

تحياتى

كلام حضرتك تمام وفعلا اللوجان حتى لو فيها عيوب هيه الأفضل فى العربيات فى نفس الفئه السعريه و ال Abs بتبدأ فى الفئه التالته مانيول انا معايا التانيه وبصراحه العربيه حلوه جدا وما شفتش فيها اى مشاكل الحمد لله حتى لو ظهر مشكله التوكيل بيتعامل معاها ودا اهم شئ

حضرتك لميت مشاركات الأعضاء كلهم في كلمتين ..وواضح إن حضرتك لميت الدنيا كلها بخصوص اللوجان .إن كان كده ..طبعا قرار حضرتك يرجعلك