انطباعات عن الفلوينس الفيس ليفت فى رحله للغردقه

**yasser100** · 28-04-2015 10:59 AM

جميع اعضاء قسم الرينو المحترمين و اعضاء المنتدى و ملاك الجميله الفلوينس السلام عليكم و رحمة الله .

بانقل فى موضوعى النهارده تجربتى مع الفلوينس الفيس ليفت فى سفرى الغردقه الاسبوع الماضى و برغم سفرى قبل كده للساحل الا انه السفر للغردقه بالفلوينس حاله خاصه للظروف المحيطه بالطريق ده من تيارات هواء شديده و ملفات عنيفه .

اولا : حالة الجو تيارات هواء عنيفه الاسبوع الماضى .
ثانيا : السرعات ما بين 100 كم/س الى 150 كم/س
ثالثا : السياره e3s 2014 الفئه اللى قبل الهاى لاين , حالة السياره ممتازه الحمد لله 4000 كم فقط .
رابعا : بداية الرحله الساعه 4 فجرا و الوصول الساعه 9 صباحا تقريبا 5 ساعات بالتمام الرجوع اطول تقريبا 6 ساعات و استهلاك البنزين اعلى بسبب تيارات الهواء العنيفه جدا فى الرجوع .

اهم نقطه احب ابدأ بها هي ثبات السياره فى ظروف الطريق : اى سياره مهما كان ماركتها او نوعها هاتتأثر بتيارات الهوا على الطريق ده و خصوصا الاسبوع الماضى و شوفت بلاوى للامانه على الطريق بسبب الهوا , عربيات طارت تماما من على الطريق بسبب عدم تقدير السائقين للسرعه مع الهوا العنيف و بدون ذكر ماركات و لكن ماركات لها مبيعات فى السوق جيده جدا .

نيجى للفلوينس , طبعا طريق الجيش من اول البوابات لغاية العين السخنه ممتاز و اداء ممتاز للفلوينس رائع عليه مع تثبيت السرعه باستخدام المثبت على سرعة 120 , استجمام كامل داخل السياره مع الكاسيت و بدون توتر مع غلق جميع النوافذ و استخدام فتحة السقف , و لاول مره اعرف قيمة فتحة السقف خصوصا انه مش قادر اشغل التكييف لانه الجو كان بارد الصبح و لا عارف افتح الشبابيك بسبب صوت الهوا الشديد .

الطريق من العين السخنه لغاية رأس غارب و اللعب كله بقا مع الملفات العنيفه و التريللات , اداء الفلوينس مع اتخن ملف ممتاز بسرعة 100 كم ثبات و تحكم كامل فى العربيه و باور يلم معاك الدنيا بسرعه و نجم الطريق بامانه الفرامل , تجميع و قوة اداء و هدوء و ثقه فى الفرمله .

حصل موقف انه اتجننت شويه و دخلت ملف عنيف بسرعة 150 كم و ده ساعات بيحصللى لما باكون لواحدى ههههه , لكن مع الاسره لا طبعا , المهم دخلت الملف بالسرعه دى و العربيه عامت و رمت منى فى الشمال فى الطريق القادم و لكن الغريب و اللى مش فاهمه فجأه العربيه عدلت نفسها و ازاى ما اعرفش و مش عارف تفسير لغاية دلوقتى و بدون مجهود كبير منى انه احاول الم العربيه , مش عارف بقا هل ده فى تصميم العربيه و لا ايه بالظبط .
و طبعا ما دخلتش اى ملف تانى بالسرعه دى .

اداء العربيه فى التجاوزات على طريق رايح جاى ممتاز و الموتور و الفتيس اداؤهم كان رائع فى النقطه دى و استجابه عاليه مع دواسة البنزين , ما حسيتش بخطوره او ارتباك نهائى و انا داخل فى اى تجاوز للثقه اللى العربيه بتديهالك فى قاعدتها و صالونها و كشف الطريق من الزجاج الامامى و ابعاده .

الطريق من رأس غارب و حتى قرب الغردقه حوالى 200 كم , تيارات هواء شديده جدا و خصوصا فى الرجوع , الطريق ده سرعته 110 كم بس انا كنت على سرعه معظمها 150 كم و اتمسكت مرتين رادر :( بس ربنا ستر , العربيه على السرعه دى مع الهواء العنيف بتتأثر طبعا و اى عربيه هاتتأثر لكن ما فيش احساس نهائى انك ممكن تترمى على جنب الطريق زى ما شفت عربيات تانيه و بتلم نفسها كويس جدا مع باور حساس للطريق بشكل ممتاز و لما بيحس انه العربيه هاتبدأ تترمى بيتقل جدا فى ايدك و ارجع و اقول نجم الرحله الفرامل , لم يضاهى الفلوينس فى الطريق من نفس الفئه غير الاوكتافيات و اعلى طبعا , لانه كان فيه واحد معاه اوكتافيا a7 جديده برضه زى حالاتى و كنا اغلب الطريق موازيين لبعض بسرعة 150 كم و بنفس قوة الاداء , بس للاسف هو اتمسك رادار .

مثبت السرعه و محدد السرعه ممتازين , فيه اماكن بتستخدم فيها المثبت للراحه و قلة التجاوزات او الملفات و اماكن تانيه بتستخدم محدد السرعه علشان العربيه ما تسرحش منك فى السرعه , لانه الموتور ده ناعم و ما فيش صوت له على السرعات و من غير ما تحس بيسحب و بتلاقى نفسك على سرعات عاليه من غير ما تحس خصوصا مع العزل الجيد جدا و الكاسيت داخل السياره .

استهلاك البنزين جيد جدا فى طريق فيه تيارات هواء , حوالى من 12-13 كم / لتر .

العفشه جيده جدا و ناعمه فى النقر اللى فى اسفلت طريق الغردقه مع ظبط الكاوتش امامى 32 و خلفى 30 , نيتروجين .

البلوتوث للموبايل ممتاز على الطرق السريعه اللى زى دى و فيها ملفات و تجاوزات شديده شويه .

الحمد لله خلصت الرحله على خير و بانقل التجربه للافاده :) و تحياتى للجميع .

**Hany Saad** · 28-04-2015 11:39 AM

المشاركة الأصلية كتبت بواسطة yasser100

المهم دخلت الملف بالسرعه دى و العربيه عامت و رمت منى فى الشمال فى الطريق القادم و لكن الغريب و اللى مش فاهمه فجأه العربيه عدلت نفسها و ازاى ما اعرفش و مش عارف تفسير لغاية دلوقتى و بدون مجهود كبير منى انه احاول الم العربيه , مش عارف بقا هل ده فى تصميم العربيه و لا ايه بالظبط .

بسم الله الرحمن الرحيم....الإجابة ESP

تحياتى

**scientist9508** · 28-04-2015 01:54 PM

بسم الله الرحمن الرحيم

أخى الفاضل ياسر

سالفآ وصفت حضرتك بأنك من أهل العلم . . و الآن يعجبنى دقة وصفك و كأننى معك فى السياره أثناء الرحله

جزاك الله خير

السلام عليكم و رحمة الله و بركاته

**Amr Gamal 01** · 28-04-2015 01:56 PM

حمد لله على السلامه يا ياسر بيه تقرير جميل من شخص اجمل الاجابه لفزوره التقرير هي(electronic brake distribution اي نظام توزيع قوه الفرامل على العجلات و الحصل مع سعدتك اغلب الظن هو السيناريو ده سعدتك دخلت على الملف على 150 فوجئت ان الملف عاصي والعربيه لعبت رد فعل تلقائي دوست فرامل عشان تلم عربيتك هنا اشتغل ال EBD عمل ايه الABD اده قوه فرمل قويه على الجنب ال انت كاسر عليه الدريكسيون لان انت مايل عليه و اده قوه فرامل اقل على الجنب التاني عشان العربيه متعرضش يعني بل الملخص ان النظام ده بيدي قوه فرامل على حسب الوزن الواقع على كل فرده العشان العربيه متخرجش عن مسارها هتيجي تقولي يعني ده يعتبر زي الESP هقول لك لا النظامين بيكملو بعض يعني لو فرضنا نفس الظروف ديه تاني ونفس الملف وكل حاجه ونفس رد فعلك مع اضافه ان الطريق كان علي رمله هنا يشتغل الesp مع الebd يعمل ايه يقلل قوه الحركه في كل فرده عن التانيه عشان العربيه متتزحلقش وتعرض يعني ال esp نظام تحكم الكتروني في اتزان العربيه عن طريق التحكم في قوة الدفع في كل عجله والebd نظام تحكم الكتروني في قوه الفرامل طبقا للوزن الواقع على كل عجله وكفا المؤمنين شر القتال

**shennoz** · 28-04-2015 01:57 PM

ملهاش علاقة بالتصميم.. ده فعلا ESP

شوف الموضوع ده موجود فيه بالظبط اللى حصل معاك

Electronic stability control - Wikipedia, the free encyclopedia

is a computerized technology that improves a vehicle's stability by detecting and reducing loss of traction When detects loss of steering control, it automatically applies the brakes to help "steer" the vehicle where the driver intends to go. Braking is automatically applied to wheels individually, such as the outer front wheel to counter oversteer or the inner rear wheel to counter understeer.

مكتوب كمان

According to Insurance Institute for Highway Safety and the U.S. National Highway Traffic Safety Administration, one-third of fatal accidents could be prevented by the use of the technology.

وربنا يسترها معانا كلنا ومهما كان الاحتياط واجب :)

**yasser100** · 28-04-2015 02:09 PM

المشاركة الأصلية كتبت بواسطة scientist9508

بسم الله الرحمن الرحيم

أخى الفاضل ياسر

سالفآ وصفت حضرتك بأنك من أهل العلم . . و الآن يعجبنى دقة وصفك و كأننى معك فى السياره أثناء الرحله

جزاك الله خير

السلام عليكم و رحمة الله و بركاته

اشكرك استاذى على تعليقك الجميل و سعيد انى قدرت انقل لحضرتك الوصف و كأنك موجود بالساره .

تحياتى لحضرتك

**yasser100** · 28-04-2015 02:13 PM

المشاركة الأصلية كتبت بواسطة Amr Gamal 01

حمد لله على السلامه يا ياسر بيه تقرير جميل من شخص اجمل الاجابه لفزوره التقرير هي(electronic brake distribution اي نظام توزيع قوه الفرامل على العجلات و الحصل مع سعدتك اغلب الظن هو السيناريو ده سعدتك دخلت على الملف على 150 فوجئت ان الملف عاصي والعربيه لعبت رد فعل تلقائي دوست فرامل عشان تلم عربيتك هنا اشتغل ال EBD عمل ايه الABD اده قوه فرمل قويه على الجنب ال انت كاسر عليه الدريكسيون لان انت مايل عليه و اده قوه فرامل اقل على الجنب التاني عشان العربيه متعرضش يعني بل الملخص ان النظام ده بيدي قوه فرامل على حسب الوزن الواقع على كل فرده العشان العربيه متخرجش عن مسارها هتيجي تقولي يعني ده يعتبر زي الESP هقول لك لا النظامين بيكملو بعض يعني لو فرضنا نفس الظروف ديه تاني ونفس الملف وكل حاجه ونفس رد فعلك مع اضافه ان الطريق كان علي رمله هنا يشتغل الesp مع الebd يعمل ايه يقلل قوه الحركه في كل فرده عن التانيه عشان العربيه متتزحلقش وتعرض يعني ال esp نظام تحكم الكتروني في اتزان العربيه عن طريق التحكم في قوة الدفع في كل عجله والebd نظام تحكم الكتروني في قوه الفرامل طبقا للوزن الواقع على كل عجله وكفا المؤمنين شر القتال

كده تمام تحليل حضرتك الفنى , لانه ده اللى حصل معايا و الاسفلت ما كانش عليه رمل و لا حاجه , كل اللى حصل فقد اتزان مع سرعه عاليه فى ملف شديد و دوست فعلا دوسه خفيفه على الفرامل لقيت العربيه اتعدلت معايا بسرعه فى نفس الاتجاه و استغربت لانه انا ما عنديش esp لكن موجود فى نظام الفرامل عندى abs , abd , ebd و مش فاهم قوى طريقة عمل ال ebd , لكن كده انا فهمت ايه اللى حصل , ارجع و اقول الفرامل كانت نجم الرحله :) , شكرا لتوضيح حضرتك .

**yasser100** · 28-04-2015 02:19 PM

المشاركة الأصلية كتبت بواسطة shennoz

ملهاش علاقة بالتصميم.. ده فعلا ESP

شوف الموضوع ده موجود فيه بالظبط اللى حصل معاك

Electronic stability control - Wikipedia, the free encyclopedia

مكتوب كمان

وربنا يسترها معانا كلنا ومهما كان الاحتياط واجب :)

ما عنديش esp فى العربيه و لقيتها اتعدلت لما دوست فرمله خفيفه لانه طبعا الفرمله الشديده فى الموقف ده كارثه . علشان كده استغربت من اللى حصل و ما عرفتش تفسير .

شكرا لتشريفك الموضوع .

**Hany Saad** · 28-04-2015 02:53 PM

المشاركة الأصلية كتبت بواسطة yasser100

و الله يا باشا ما اعرف سبب لغاية دلوقتى هههه , و بصراحه محاولتش اكررها لانها مرعبه فعلا , بس لو حد بيفهم فى التصميم ممكن يفيدنا

أولاً حمدلله على السلامة و يا ريت متجربش الفلوانس فى المواقف الصعبة دى تانى.....هى حلوة و كل حاجة بس زى ما بيقولوا متجربش أقصى حدودها

بالنسبة لإيه اللى حصل هو درس عملى فى عامود الألتواء أو Anti-Roll bar اللى لم العربية معاك و ده ليه دعوة كبيرة بالتصميم الهندسى و توزيع مركز الثقل

مرة أخرى بلاش تجرب العربية عند أقصى حدودها و ربنا يستر على الجميع

تحياتى

-

الموضوع: انطباعات عن الفلوينس الفيس ليفت فى رحله للغردقه

LinkBack

أدوات الموضوع

عرض

انطباعات عن الفلوينس الفيس ليفت فى رحله للغردقه - انشر الموضوع فى :

-

-

-

-

-

المواضيع المتشابهه

الفلوينس و الفروق بين الريموت كونترول في الفيس ليفت و الشكل القديم

درج تابلوه الفلوينس الفيس ليفت " مكيف "

الفلوينس الشكل القديم و الفيس ليفت ( تقرير مصور )

ايه رأيكو في الفلوينس فيس ليفت لون اسود (صور)

مشكله في الفلوينس فيس ليفت !

الكلمات الدلالية لهذا الموضوع

المفضلات

المفضلات

ضوابط المشاركة