الموضوع: مساعده في حوار جواز

السلام عليكم يا شباب
انا عندي كده موضوع و حابب اخد رأيكم فيه هحكي تفاصيله باستفاضه شويه علشان اللي يديني نصيحه يبقي معاه كل الجوانب و مطلع علي كل التفاصيل
انا شاب بشتغل مهندس عندي 33 سنه من اسبوعين جتلي عروسه عندها 23 سنه عن طريق الصالونات الللي جايبها اصلا ميعرفهاش و اللي حصل ان الموضوع جه صدفه
المهم لما والدتي كلمتهم علشان نتقابل والده العروسه قالت هسأل البنت قعدت 3 ايام لحد ما ردت علينا نتقابل و لا
المهم اتقابلنا من كام يوم و كان في الانطباعات الاتيه
الناس شكلهم في اول الطبقه المتوسطه و دي مش مشكله عندي مادام المستوي الاجتماعي متقارب و هنا بقي تيجي المشكله
اختي و هي بتكلم البنت عن موضوع انها رفيعه قامت البنت قالت ليها انا باكل كتير بس بحرق كل الاكل لما اختي قالت ليها ده حاجه حلوه قامت البنت خمست في وشها و قالت ليها الله اكبر انت هتحسديني و لا ايه
عارف ان ده ممكن عند ناس كتير يبقي عادي بس مع اسرتي الطريقه دي مش متعودين عليها خالص يعني اسلوبنا كأسره مفيهوش الكلام ده
المهم لما قعدت مع البنت ملحقناش نقعد بس لفت نظري انها قالتلي انها بتشيل جواها و مش بتنسي اللي يزعلها رغم انها بتسامح بس بيفضل اللي جواها مش نسياه قولتلها يعني قلبك اسود قالتلي لا ده في الحاجات الجامده اوي و الزعل الجامد اوي بس
رأي والدتي ان ده دلاله ان البنت مش سهله
المهم و انا قاعد مع البنت برضه مكنتش ملاحظ انها مكسوفه بالعكس كانت منظلقه جدا و كانها تعرفني و لما كنت اسكت مش لاقي كلام اقوله تقوم هي متكلمه
المهم احنا مقعنداش مع بعض الا ساعه تقريبا و دي مش كفايه علشان كده طلبت اقعد تاني معاها
هي خريجه صيدله و شكلها بصراحه مش مضايقاني بالعكس شايفها شكلها بالنسبه ليا مقبول جدا
شوفت قبلها بتاع 15 واحده و تقريبا في ال 15 مشفتش الا 2 شكلهم عجبني و الباقي كانوا ضايعين تماما
المهم طلبت اني اقعد معاها تاني تقريبا بعد يوم من مقابلتنا الست قالت هستني لما ترجع من الشغل و اقعد معاها انا و والدها نسالها ردت علينا بعد يومين و ادتنا رنه علي تليفون الحاجه والدتي اه و الله رنه
و قالت مفيش مانع نتقابل
المهم كده كده احنا اتفقنا علي مقابله تانيه بس انا عايز رايكم في الموضوع ككل و اللي عايز يسأل اي سؤال علشان يعرف يديني رأيي صحيح يسأل ثانيا لما اقابلها المره الجيه ادور علي ايه علشان احكم عليهم كناس ينفعوا معانا و لا لا
و لا رايكم اصلا ان الموضوع من الاول كده مش حلو
الملاحظات الغريبه ( التأخر في الرد علينا , التخميس اللي بعتبره انا و اسرتي بلدي شويه, موضوع عدم نسيان الزعل , الرنه اللي والدتها عملتها علي تليفون ولدتي علشان نتصل بيها, جراءه البنت اللي اول مره اشوفها رغم اني شوفت 15 واحده قبلها )
مستني رأيكم و نصايحكم سلام

المشاركة الأصلية كتبت بواسطة volociximab

و عليكم السلام و رحمة الله
انت الحكم///لو هي دى البنت الى مستنيها هترتبط بيها و لو من عشة فراخ
انا خايف المشكلة تكون من ناحيتك...بمعنى انك متشدد فى مسألة الشكل١٥ واحده مش عجبوك و فى نفس الوقت زهقت و مصدقت لقيت واحدة عجبتك شكلا فقررت تتغاضى
يجب ان تعلم انت عاوز ايه
مفيش بنت عشر من عشره شكل و دين و مستوى اجتماعى
لو لقيتها تسعه من عشره دين هتبقى سبعة شكل
و العكس
فانت بتختار النقطة الاساسية عندك تكون مميزه فيها و الجوانب الاخرى يجب ان تقبل بدرجة اقل
خلى بالك ايضا انك ممكن تكون من مصر الجديدة و تتجوز واحدة من الارياف و اهلها فقراء و مستوى اقل بكثير و ساعة خلافك مع بنتهم يعاملوك باحترام و ممكن يقفوا معاك ضد بنتهم و ناس تانية يجرسوك و يفضحوك و يشرشحولك
المستوى الاجتماعى و التربية مختلفة عن الفلوس
شوف اهلها شكلهم ايه و طريقة تصرفهم
شوفهم بيقدروا الراجل و لا القرش
شوف الدين
و على كل حال لما تدخل فى الموضوع سيتبين لك دول ذهب ام نحاس
مش مرتاح اخرج و متبلعش الزلط عشان سنك او زهقت لانك هتيجي فى لحظة و تنفجر لانك دخلت الموضوع اصلا و انت مش مقتنع بس ساعة انفجارك هتهد بيت و ممكن تشرد اولاد فمتجبرش نفسك على حاجة

بص حضرتك انا مش باصص للفلوس اصلا لأني برضه ابن ناس عاديين بس الفرق ان اهلي اسلوبهم محترم زياده عن اللزوم يعني ربايه صعبه و ممنوع الفاظ و ده عيب و ده غلط فبالتالي اهلي محتاجين ناس يبقوا علي نفس الاسلوب و طريقه الكلام علشان ميبقاش في استهجان و مشاكل علي حاجه زي دي
ثانيا ال 15 واحده يا باشا 2 منهم بس اللي كانوا ينفع اصلا تبص في وشهم و الله زي ما بقول لحضرتك الباقي اصلا صعب تبص في وشهم
البنت اللي انا بشوفها حاليا مش ملكه جمال و كمان سمرا و عينها سودا و شعرها اسود
يعني في مقايس الناس اللي بتدور علي عرايس متعتبرش حاجه حلوه لان كتير يقولك عايزها بيضا و عينها ملونه و شعرها مش عارف ايه
بس وشها بالنسبه ليا مريح
احتمال اني زهقت موجود و مش هجدب عليك بس شكل البنت بالنسبه ليا مش بطال
بس مكدبش عليك مش عايز ادخل بيت و اخرج تاني و اسبب لواحده جرح و في ابقي اتحسب عليا و عليها خطوبه علي الفاضي و الناس مش هتسبها في حالها
اللي انا نفسي اعرفه ازاي اقدر اجمع معلومات كافيه علشان اخد عليها قرار بناء علي كلامها

المشاركة الأصلية كتبت بواسطة طارق _عبد السلام

معاك فرصه تانيه اتكلم فى امور عاديه وانت بتقول هى بتتكلم سيبها تتكلم وخليك مستمع ووقليل الكلام دا شىء كويس هيكشف لك كلام كتير

حكايه التأخر فى الرد طبيعى بيتقلوا شويه مفيش مشكله علشان مايبانوش انهم عايزينك لكن لانهم وافقوا خلاص..عندهم قبول

اما موضوع الرنه والتخميس والكلام ده ..... انتظر على الحكم بعد المقابله التانيه واهم شىء شوف راحتك النفسيه ان دى هتكون زوجتك والمستقبليه وهتكمل معاك حياتك الموضوع بسيط

استخير وتوكل على الله................... وشوف الفرصه التانيه مينفعش تحكم بكل الامور دى فى ساعه فيه فتره خطوبه هتظهر لك كل شىء تقريبا

انا مش عارف اخد الموضوع ببساطه مش عارف ليه
الموضوع اختيار طول العمر و اسره و حياه و ا طفال و غيره
بس مشكلتي اني مش عارف الناس دي ده اولا
ثانيا اللي بيحصل ده ممكن يبقي ليه مليون تفسير
الدخول في خطوبه مش حاجه سهله و بعدين انها تتفك لان انا اللي مرضهوش لأختي مرضهوش لحد و انا محبش حد يدخل بيتنا و يخطب اختي مثلا علي سبيل التجربه و يا صابت يا خابت و يسيبها
مش عارف يمكن اكون مزودها في الحرص بس انا محبش اسبب اذي زي ده بسببي
و ا نا بشوف تفكير الشباب اللي يرفض يفكر حتي يرتبط بواحده سبق ليها الخطوبه او قرايه الفتحه
رأي حضرتك المواضيع اللي افتحها معاها ايه علشان اعرف اقرر