الموضوع: هل يجوز كتابة شيك على الزوج بدلا من قائمة المنقولات الزوجية ؟؟؟

المشاركة الأصلية كتبت بواسطة msobhy

انا هارد على حضرتك بطريقه ملخبطه شويه
عندنا اى عريس علشان يتقبل لازم يكون عنده شقه تمليك مش ايجار - حتى لو كانت اوضه وصاله
حكاية ان عريس بنتى او اختى ياخدها ويسافر ده مرفوض تماما - لكن هانفترض ان الظروف حكمت مش هاكدب واقول اننا هانمشيها ودى - لكن اقسم بالله تحت اى بند وتحت اى مسمى مش هاحول الموضوع لبيع وشراء
سيدى الفاضل عن تجارب مريره - الاهل لما بيجروا على تأمين بنتهم فى الاغلب الموضوع بيخلص بدرى بإنفصال.
.
.
أمن أختك أو بنتك زى ما حضرتك عايز لكن خلى بالك اللى بيخاف من العفريت ...........

ببساطه
أنا شايف إنك عندك خلط بين التأمين والحقوق

=

فرق كبير بين التأمين لمجرد التأمين

وإن ده حق شرعي

=

الغريب إنك شايف إن شرط الشقة الملك حق ليك

وشايف الشروط الأخرى للناس الآخرين تأمين

-

يعني بتدي نفسك الحق وتسمي حقوق الآخرين تأمين

=

كده بالخلط ده إنت مش هتقبل غير اللي بيعملوا زيكوا بالظبط

-

وفقط

وده مش صح

إحنا عايشين في مجتمع كبير مرن متنوع

ـ

المشاركة الأصلية كتبت بواسطة msobhy

حضرتك ولا خلط ولا حاجه
احنا بنشترط ان الشقه تكون تمليك وبدون اى مواصفاتبس تبقى فى مكان شبه محترم - حضرتك عارف ليه.... لأن محدش ضامن الدنيا - ممكن اللى يتجوز بنتنا تحصله اى مشاكل ماديه ساعتها اقفل بيتك عليك وعلى بنتنا ومحدش ليه عندك حاجه - تاكل زلط تاكل طوب في النهايه بيتك مقفول عليك
بخصوص التناقض برضو احنا بنقولها صراحتا لأى شخص يتقدم لعائلتنا اللى في مقدرتك اعمل
والله العظيم وبدون اى مبالغه - اغنى واحد في عائلتنا بنته لسه متجوزه - تقريبا هو اللى فرش البيت بالكامل وفيه قايمه اتكتبت وكانت اى كلام ومؤخر البنت كان 10.000 جنيه فقط
قريبى ده لسه شارى الفيلا بتاعت ريهام سعيد - يعنى فعلا راجل مقتدر - في رأى حضرتك ده راجل مجنون ولا اهبل
احنا لما بنأمن ..... بنأمن زوج بنتنا لأنه طول ما هو كويس - بنتنا اكيد هاتبقى كويسه
حضرتك عايز تاخد شيك على زوج بنتك أو اختك .... يمكن الموضوع ده عادى بالنسبه لناس لكن بالنسبه ليه انا حاسس ان الموضوع بيع وشراء وتخوين من البدايه
أنا باعتذر لحضرتك جدا لو قلت اى حاجه ضايقت حضرتك اثناء نقاشنا

يا باشا أنا عمري ما بزعل من أي نقاش
والنقاش في الموضوع ده بالذات يتسع لألف رأي
=
وعشان منوصلش لحلقة ندور فيها
=
إنت عندك شرط هو وجود شقة ملك
تمام
رغم إن الإيجار موجود جديد أو قديم
بس مش أمان قوي
فإنت بتقول بتأمن جوز بنتك أو أختك (( نفس كلامك أهه ))
كويس
وتأمين زوج بنتك هو بالتبيعة تأمين لبنتك أو أختك
يبقى إنت بتأمن أختك بشرط الشقة الملك
=
لفينا لفينا ورجعنا لنقطة البداية إنك بتأمن أختك عن طريق تأمين جوزها
ودنك منين يا جحا
=
طيب بتأمن الراجل ده ليه
عشان واخد أختي
يعني بأمن أختي
لو الراجل ده مخدش أختي ميلزمنيش
يبقى كلمة أختى عامل مشترك مع كلمة تأمين
=
سهلة كده يا ريس
=
سميه تأمين سميه حقوق
مش هتفرق معايا
كله معنى واحد
=
لكن كلمة حقوق أفضل
لأن فعلاً ربنا أوجد الحقوق دي للمرأة وهي الطرف الضعيف وجعل تلك الحقوق شرعاً وديناً
المهر حق للمرأة
شقة الزوجية المجهزة حق للمرأة
=
=
كلامك معناه برضه لو إفترضنا جدلاً إنك صاحب الموضوع ده
إنك هتقول للعريس ده ألف سلامه
مدام معندكش شقة ملك ورينا عرض اكتافك
حتى لو كان أهل خلق ودين وكفأ لكنه لم يتمم الشروط
وعلى فكره ده تصرف منك لا عيب ولا حرام
أنا برضه عندي شروط زيك
وكل واحد بيضع الشروط طالما موصلش لمرحلة عضل المرأة أو التساهل والاستخفاف بحقها
=
صاحب الموضوع كان أيسر في النقطة دي لما لقى راجل يستاهل بنته
قاله وماله معندكش حاجه في مصر الوقتي
إتجوزوا وسافروا
بس قدم حاجه بديل للمهر أو قدم مهر
=
نقطة الشيك أنا بقول للمرة التالتة هيا حاجه مش مستحبة في رأيي الخاص ولا هعملها ولا عملتها
لكن مش عيب ولا حرام ولا نقدر نقول لصاحب الموضوع لأ
حقه بدون جدال
زي ما حقك شرط الشقة الملك
إنت بتقول بأمن زوج أختي
وهو برضه بيقول بأمن زوج أختي
=
بس هو غلبان شوية لأنه لو زوج بنته بالطريقة دي
ولو حصل أي ظرف من الظروف لزوج البنت مقدرش يوفي
في الغالب الأب مش هيقدر يعمله حاجه
وهيضطر يدفع من جيبه مع جوز بنته عشان يوجد لبنته شقه لو حصل ظرف لا قدر الله
وعلى فكرة بضه
هو عارف كده كويس بس بيقدم حسن الظن والتوفيق
لكن هو من داخله مجهز نفسه لأي ظرف يحصل سيء هو اللي هيشيل بنته
=
البنات سواء أخوات أو أبناء
أمانة كبيرة وصعبة قوي بتفضل معلقة في رقبة الواحد حتى يلقى الله

ـ