الموضوع: اية اكتر شئ لسة عايش جواك من ذكريات ايام الطفولة

وطب واللي محضرش الكلام ده يعمل ايه ؟؟ :)

انا فاكر والدي كان بياخدني السينما يوم الجمعة الساعة 10 الصبح . كانت بتعرض افلام كارتون تحت رعاية الشمعدان. و كانوا بين الافلام ييوقفوا العرض و يعملوا مسابقات و يوزعوا جوائز من شيكولاتة الشمعدان. اللي زي ما بتحبه بيحبك كمان و كمان

واضح انك من مواليد السبعينات .. نوستالجيا

المشاركة الأصلية كتبت بواسطة الفجر

انا حاجات كتيرة أيام طفولة مش قادر انساها

ضيف على اللي أنت حكيته برنامج سينما الأطفال كل يوم جمعة صباحاً تقديم عفاف الهلاوي وبابا ماجد
وكمان فوازير نيللي وشريهان وسموره و(يحي الفخراني وهالة فؤاد وصابرين ) ، والفيلم العربي بتاع يوم الأحد عصراً بعد برنامج ميكي ماووس وتعريف البطل ومواقفه وحياته ، وكمان مسلسل الساعة السابعة والربع العربي على القناة الأولى ( ونيس ، ليالي الحلمية ، آرابيسك ، ... ) وحديث الروح ، ونشرة التاسعة ، وبعد النشرة على القناة الثانية المسلسل الأجنبي ( فالكون كريست ، زاى بولد أند زاي بيتوفل ، ... )
وكمان غير دا كله ( والأهم ) اللمة على الغداء ... كانت حضور مواعيد والدي من العمل الساعة 3 يتغدى وينام شوية ويصحى على الساعة الخامسة ويقعد قاعدة العصاري في البلكونة ويشغل أم كلثوم مع كوباية الشاي ، والفاكهة أو الكيك .
وبمناسبة رمضان : تجمع بنات العمارة ويروحوا يصلوا الفجر سوا .
وتنافس سيدات العمارة بعمل أحسن كحك وغربية وبيتي فور ، وخبزهم في أقرب فرن .
الله عليها أيام .