تجربة سيئة في شراء منتج من سوق دوت كوم

**أبو آسر** · 12-07-2015 06:08 PM

السلام عليكم
يوم 5-7 الماضي اشتريت "ماكينة حلاقة الرأس من فيليبس QC 5580/13" من موقع سوق دوت كوم وكان عليها عرض بدل 777 ج أصبح 448 جنيه وكان عرض مغري بصراحة وكان موجود 3 قطع اشتريت واحدة ومفروض اتبقى 2
عملت طلب الشراء أول مرة بالكريديت كارد وبعد ما أتممت عملية الشراء فتحتلي صفحة "page cannot displayed" فدخلت على مشترياتي في الموقع ملقيتش الأوردر ، استنيت رسالة على الموبايل إن مبلغ كذا اتخصم من بطاقتك من موقع سوق مفيش رسايل ، قلت يبقى العملية لم تتم بنجاح
كررت العملية تاني فتمت بنجاح والأوردر اتضاف في الموقع وجاتلي رسالة على الموبايل وبعدها مفيش دقايق جاتلي رسالة تانية بنفس المبلغ اتخصم مرة تانية !
كلمت البنك وطلبت إلغاء الأوردر الأول وبعت لسوق برده وقدمت شكوى قالولي مبلغ واحد اللي اتخصم عندنا ارجع للبنك فكلمت البنك تاني قالي أنا قدمتلك طلب وهياخد من يومين ل10 أيام قلت مش مشكلة أبقى أتابع معاهم
الأوردر بقى من يوم 5 ليوم 11 اللي هو امبارح الحالة بتاعته (لم يتم الشحن) مش عايزة تتغير وبعت أكتر من شكوى محدش عبرني مع إن مكتوب إن السلعة سيتم تجهيزها للشحن خلال 3 أيام
المفاجأة بقى
النهاردة دخلت على الموقع فوجئت إن الأوردر اتلغى تماما !! والمبلغ الأول عملوله refund للكريديت بتاعي والمبلغ التاني لسة موجود في حسابي في الموقع عندهم
طبعا اتعصبت ازاي يكنسلوا أوردر بدون إذني خاصة إنهم رفعوا السعر خلوه 666 جنيه !
اتصلت بيهم ردت عليا الموظفة شرحتلها المشكلة قالتلي أيوة يا فندم أصل ال item ده out of stock !!!!!!
قلتلها ازاي الكلام ده وأنا لما اشتريت كان موجود 3 قطع وازاي أصلا تبلغوني إنه out of stock بعد 7 أيام من الشراء !! طبعا معرفتش ترد ومعلش وحاولنا نوصل لحضرتك ونبلغك وممكن تكون وانت بتشتريه في نفس اللحظة عملاء تانيين اشتروه على أساس إن اللحظة اللي أنا اشتريت فيها كان معايا 3 غيري بيشتروا نفس المنتج اللي أصلا قعد كذا يوم على ما عدد القطع بدأ يقل من 2 لواحدة والتلاتة اللي كانوا بيشتروا وصلهم المنتج وأنا ابن البطة السودا اللي على حظي العاثر كنت آخر واحد في الأربعة اللي اشتروا ال3 قطع !!
الخلاصة إن التجربة سيئة جدا وشغل نصب يعملك عرض وهمي على سلعة مش موجودة عنده وتشتري وتقعد منتظر وفي الآخر يكنسل الطلب رغما عن أنفك وشغل عك زي ما متعودين يعني

**أبو آسر** · 12-07-2015 06:45 PM

المشاركة الأصلية كتبت بواسطة mk3

اكيد دى حاله خاصه لانى اتعاملت مع سوق ومشكلتهم الوحيده تأخر الشحن

حتى لو حالة خاصة هي دي مشكلة بسيطة يعني ؟
في موقع محترم تشتري منه حاجة ويقولك موجود 3 قطع وبعد ما تشتري ب7 أيام كاملين يكنسل الأوردر ويقولك أصله out of stock ؟!
لو موقع محترم فعلا كان يوفرلي المنتج بنفس التمن اللي اشتريت بيه حتى لو هيخسر فيه لكن يكنسل الأوردر بكل برود وبعد ما سحب تمنه مرتين ويقولي معلش !!

**mmtronic** · 12-07-2015 07:08 PM

المشاركة الأصلية كتبت بواسطة mk3

اكيد دى حاله خاصه لانى اتعاملت مع سوق ومشكلتهم الوحيده تأخر الشحن

لا مش حاله خاصه - حصلت معايا و نفس الحوار بس الفرق انى كنت طالب السلعه Cash on Delivery و لغو الاردر لعدم توافر السلعه بعد ما دوخونى اسبوعين و بعدها باسبوع تانى لقيتهم جيبينلى السلعه و كانت اول و اخر مرة اتعامل معاه

من الاخر موقع سوق زباله و القائمين على ادارته زباله و خدمع العملاء زباله و تحس انه عبارة عن شويه هواه و بيلعبو

انا دايما انصح الناس تبعد عن الموقع الزباله دة

الاحسن منه و انضف عن تجربه كذا مرة هوة موقع جوميا او موقع نفسك

**أبو آسر** · 12-07-2015 08:01 PM

المشاركة الأصلية كتبت بواسطة Secret-Man

انا افتكر مره من سنه 2009 اشتريت HTC HD2 موبايل كبير زى النوت كده دلوقتى من موقع امازون فى امريكا

والله الى بقوله ده حصل صحبى خده باظ منه لوحده مش عارف سوفتوير ولا هاردوير مكنتش عارف احدد وكاتب كلام ان السيستم Dump ومش عايز يتحرك

بعت لامازون سكرين شوت لكل حاجه بالجهاز والسريال والفاتوره بعدها ب 5 ايام جالى جهاز جديد بالكرتونه اخوه ومطلبوش منى حتى ابعت القديم

ده الفرق بين الفكر العربى واحترام العميل فى دول الغرب

ناس بتدور على السبوبه وناس تدور على راحه العميل على حساب اى حاجه

حصلي نفس الموقف في أمازون برده في usb 3.0 hub من شركة anker
اشتريته وبعته على عنوان صديق ليا كان في أمريكا ونازل مصر وبعد ما نزل خدته منه وشغلته فمكنش شغال بسرعة usb 3.0 المعروفة
عملت تقييم سلبي على أمازون واستعوضت ربنا وقلت أشغله usb 2.0 عادي وخلاص
لقيت الشركة باعتالي احنا آسفين جدا وياريت حضرتك ترجعهولنا وهنستبدله بواحد تاني مجانا
رديت قلتلهم شكرا لكن مش هينفع أرجعه لأنه اتشحن مصر
قالولي مفيش مشكلة هنعملك refund للمبلغ كامل وخليه عندك !!
استحرمت قلتلهم لأ مش هينفع هو شغال وأنا هستفيد بيه ومش هقبل الفلوس
قالولي خلاص هنبعتلك واحد تاني مجانا وخلي القديم عندك !!!
تخيل فضلوا يحايلوا فيا ازاي علشان ابقى راضي لمجرد إني عملت تقييم سلبي
وفعلا بعتولي واحد تاني جديد على عنوان صديقي وأصبح عندي اتنين بدل واحد

بس سيبك انت مصر حضارة 7000 سنة برده

**Karim_Monir** · 12-07-2015 08:44 PM

مش اول واحد يكتب عن سوق انه سئ الاسوء ان في عملا وصلهم بضاعه غير اللي اشتروها تماما
منساش ابدا اني من سنتين خليت ابو كمال يشتريلي ايسر ايكونيا تابلت ولما وصل مصر
طلع بيهنج ويهيس حاولت ادخله ايسر مصر صيانه بفلوس عملولي حوارات
بقول لابو كمال الحوار كذا بعتلهم
قالو يا تخليه ونردلك نص التمن يا تبعته وتسترد فلوسك
تاني يوم كان سافر من مصر والفلوس رجعت بعدها بايام
انه امازون يا ساده
علي فكره يا ابو اسر
بحكم تقدمنا في مواقع البحث والارشفه موضوعك ده هايوجعهم كتير ولفتره طويله

**أبو آسر** · 12-07-2015 08:57 PM

المشاركة الأصلية كتبت بواسطة karim_monir

علي فكره يا ابو اسر
بحكم تقدمنا في مواقع البحث والارشفه موضوعك ده هايوجعهم كتير ولفتره طويله

أحسن خليهم يتلموا شوية ويبطلوا استخفاف بعقول الناس

-

-

الموضوع: تجربة سيئة في شراء منتج من سوق دوت كوم

LinkBack

أدوات الموضوع

عرض

تجربة سيئة في شراء منتج من سوق دوت كوم - انشر الموضوع فى :

-

-

-

-

المواضيع المتشابهه

تجربة سيئة من علي اكسبريس

تجربة سيئة مع فلاشة نت فودافون

تجربة سيئة مع المتخصصون

تجربة شراء سيئة من اتو ايجيبت

الكلمات الدلالية لهذا الموضوع

المفضلات

المفضلات

ضوابط المشاركة