الموضوع: مشكلة فى الدوارة

أنا كان عندى العربية دى فى امريكا بس موديل ١٩٩٣ و ٦٥٠٠ سى سى - ومن أحلى العربيات اللى ركبتها فى حياتى - إعتمادية لأعلى درجة .
ده فى الغالب ريليه السخانات بايظ وعلشان يتاكد يفتح الكبوت ويدفس دماغه فى الموتور ويطرطق ودانه ويخلى أى حد يفتح الكونتاكت ويسمع لو سمع صوت تكتكة كتير يعنى مثلا كل ثانية يبقى الريلياى بايظ ولو مسمعش يبقى برضه الريليى بايظ أو الفيوز بتاع السخانات محروق ولو سمع تكة واحدة وسكت يبقى السخانات فيها كتير بايظين - مكان الريلياى ده على ما أتذكر فى صدر العربية فى النص بس ناحية السواق شوية .
ولو عاوز يدور عليهم فى الإيباى او اى موقع بيع تانى هما اسمهم Glow Plugs

المشاركة الأصلية كتبت بواسطة ahmed_eng2001

نفهم من كدة .... ان عطل السخانات مش بيخلى العربية تدور ؟؟؟ و هل حلها انى اشمم الموتور بنزين ؟؟

مش ممكن المشكلة دى تكون من الرشاشات مثلا ؟؟؟ او طرمبة الديزل ؟؟

ممكن حضرتك تشرح اكتر تقصد ايه باعتمادية عالية ؟؟

فعلا عطل السخانات مش بيخلى العربية تدور لان المحرك الديزل زى ماحضرتك عارف بيعتمد على رفع ضغط الهوا داخل غرفة الاحتراق علشان الحرارة تترفع والجاز يولع والمحرك يدور واللى بيحصل ان بيحصل فقد فى الحرارة بتاعة غرفة الاحتراق نتيجة الجو البارد فمبيحصلش ان الجاز يوصل لدرجة الاشتعال فالمحرك مابيدورش وهنا تأتى الحاجه الى استخدام وسيلة مساعدة لتعويض الفقد فى الحرارة داخل غرفة الاحتراق والوسيلة دى هى شمعات الاحتراق او السخانات - بس السخانات مش وظيفتها بس انها تدور المحرك لا دى بتفضل شغالة معاك لمدة دقيقتين او تلاتة ( بس على فترات متقطعة يعنى تشتغل وتفصل) بعد مالمحرك يدور علشان حاجتين اول حاجة لغاية ما المية تسخن لغاية ٧٠ درجة مئوية تقريبا وكمان علشان تقلل انبعاثات الكربون فى بداية عمل المحرك .
- ولو السخانات بايظة فعلا لازم تشمم الموتور بنزين علشان يدور .
- وممكن تكون حاجة تانية مانعة المحرك انه يدور زى الطلمبة او ساعات سلونويد الجاز اللى بيقولوا عليه بيك السلانسية . بس طالما بتدور لما بتشم بنزين عادى يبقى احتمال كبير السخانات او ان المكنة خفيفة .
- بالنسبة للاعتمادية بتاعة العربية دى انها تقريبا مابتعطلش والعربية اللى كانت معايا كان متركب فيها زرار باى باس للريلياى بتاع السخانات يعنى لما الاقى العربية مادارتش ادوس على الزرار لغاية اللمبة ماتطفى وبعدين ادور تدور على طول ( لما كان بيحصل كده كنت باعمل الموضوع ده يومين او تلاتة وبعدين الاقى الريلياى اتصلح لوحده ورجعت العربية بتدور عادى من غير باى باس ) :) - وكمان من ضمن الحاجات اللى كانت عاجبانى فى العربية ان لو الجاز عليه ميه ( وده نتيجة تكثيف بخار المية بيبقى كتير فى تنكات البنزينة علشان السقعة ) بيطلعلى لمبة تنور وانذار فى التابلوه وبالتجربة والدعبسة اكتشفت ان السينسور بتاع المية دة فى جسم الفلتر بتاع الجاز والفلتر ده بيتركب كبس ومافيش عليه اى خراطيم ولا لواكير ولا وصلات كله مجارى داخلية فكنت باخلعه بمنتهى السهولة واقعد اصفى اللى فيه وانفخه علشان ينزل المية المترسبة فيه وبعدين اركبه تانى الاقى اللمبة طفت والعربية دارت ومشت زى الفل والموضوع بيستغرق دقيقة واحدة - كمان صوت العربية لايمكن يدل على انها جاز صوتها ناعم جدا - قطع الغيار الاستهلاكية انسى بتعيش كتير جدا لغاية ماتنسى ان العربية دى ليها مثلا تيل فرامل ولا طنابير والا مساعدين ولا بيضات ولا مقصات - انسى الكلام ده - حاجات كتير قوى كانت عاجبانى قوى فى العربية دى والله ياهندسة - نسيت اقولك على نورها الامامى بيبقى كأنك ماشى الضهر - عربية محترمة لأقصى حد - بس انا كنت مبسوط جدا بموضوع فلتر الجاز ده :)

المشاركة الأصلية كتبت بواسطة ahmed_eng2001

الله ينور عليك .... معلومات قيمة جدا فى محركات الديزل ...
هل الاعتمادية دى فى كل محركات الديزل ؟ هل فيه محرك بيفرق عن التانى فى نقطة السخانات و فلتر الجاز ؟؟

هو اعتمادية محركات الديزل فى العربيات بقت زي البنزين واحسن بس مشكلتها ان لو حصل حاجة بتكلفك اكتر من محركات البنزين خصوصا مع الجاز الجميل اللى عندنا :)
واعتتقد ان كل محركات العربيات فيها سخانات والسخانات اتطورت كتير يعنى زمان كانت السخانات بتشتغل دقيقتين او تلاتة ويمكن اكتر بس دلوقتى السخانات بقت بتشتغل ثانيتين او تلاتة كمان زودوا وظيفة ان السخانات تشتغل بصفة متقطعة بعد العربية ماتدور لغاية المية ماتسخن وقريت انهم ابتدوا يزودوا وظيفة للسخانات انها بيبقى فيها سينسور ضغط علشان الضغط لو مش مظبوط جوة الاسطوانة يبقى الحريق مش مظبوط فالسخان بيبعت اشارة للكمبيوتر يزود او يقلل الجاز علشان العملية تتظبط.
وفعلا زى ماقال الباشمهندس ميكا ان فيه عربيات كتير فيها سينسور وجود المية فى الجاز وفى الغالب بيبقى فيها طبة تصفية للمية فى الفلتر بس اللى كان عاجبنى فى العربية دى برغم وجود طبة التصفية انه خلعه سهل بدل مافك طبة واغرق الدنيا جاز وادخل كمان فى مشكلة وردة وحاجات تاخد وقت فكنت بافك الفلتر واصفيه وخلاص بدون وجع دماغ - وكمان زى الباشمهندس ماقال فيه عربيات بيبقى فيها نظام حرق مبدئى لتشغيل المحرك بدون سخانات ودة اعتقد فى العربيات النقل . بس اعتقد ان اعتمادية محركات الديزل فى عربيات الركوب المرسيدس احسن شوية من الامريكانى والتطوير فيها اعلى وكنت ركبت لفترة صغيرة مرسيدس ٣٠٠ تى ديزل اللى هى هاتشباك وكانت هايلة فى كل حاجة يعنى ماتحسش انها ديزل ولا صوت ولامشاكل خالص بس الصيانة بتاعتها على الستوب ووتش متاخرهاش ثانية وبتدفع مبلغ محترم .
بالنسبة لمشكلة الجاز فى مصر حصلت مشكلة هنا فى بعض معدات الديزل لشركة اجنبية كانت شغالة فى مصر وحللنا الجاز اتضح ان المشكلة مش فى الشوائب - المشكلة كانت فى نسبة البرافين اللى موجودة فى الجاز المفروض تكون من ١٪‏الى ٢٪‏ حسب المواصفات العالمية بس لما حللنا لقيناها ٧٪‏ وده ادى ان الجاز كان بيعمل حاجه زى الجيل كده تسد الخطوط والفلاتر وتبوظ الدنيا . نسبة البرافين مش مظبوطة فى الجاز عندنا ودى مشكلة اكبر من مشكلة الشوائب والمية لان الشوائب مقدور عليها بالفلاتر والمية لما بنمون كميات كبيرة بتاخد عينه ونحللها فورى بمادة عاملة زى المعجون او شرايط ورق عباد الشمس بيغير لونها لما يكون فيه مية فى الجاز وبناخد عينة كل شوية وكمان بنصفى التانكات كل فترة - لكن مشكلة البرافين دى هى المشكلة الكبيرة واللى محدش عامل حسابه عليها .

المشاركة الأصلية كتبت بواسطة mecha

هي مصر حاليا بتستخدم او تخلط bio diesel
او زيت. انا فاكر ديما المشكله كانت شواءب وكنت بطلع زي تراب اسود من الكاركات ومن خراطيم التنك والجاز اخضر غامق.
اعرف واحد بيستخدم زيت نباتي في مكن هايلكس عشان رخيص وبيخلطو بديزل المحطه لتقليل انسداد الفلاتر . وفي مانيوال كاتربيلر للزءرده اللودر قعدوا يلفوا ويدوروا حوالين السماح بالبيو ديزل.
شمع البرافين كارثه في الخطوط . افتكر سواق كان بيحط كوباية بنزين ع التنك لتحسين السحب.
طب شمع البرافين يطلع ازاي خصوصا مع ٣ ميكرون فلتر

والله ياهندسة المشكلة بتاعة البرافين دى تعبتنا قوى -
موضوع البيوجاز ولا السولار اللى بيستخرجوه من القمح زى الصين والبرازيل مش شغال فى مصر واى حد بيعمل كده بتبقى اجتهادات شخصية على معدة واحدة او عربية مثلا لكن على المقياس الكبير مش متوفر - بالنسبة للى بيحط كباية بنزين ده انا باسمع ان العربيات النص النقل بتاعة اللبن بيحطوا بنزين كتير على الجاز علشان يجروا فى الطريق واللبن مايقطعش :) - بس تقريبا بيسقطوا الموتور كل ٦ شهور ولا سنة - وفيه ناس بتقول انهم بيحطوا كباية زيت على تانك الجاز علشان يزيتوا الرشاشات والطلمبات :)
بس البرافين ده مالهوش اى حل وانت وبختك بقى ساعات النسبة بتبقى معقولة وساعات بتبقى عالية ومش كل ماتمون حاتقعد تستنى يومين تلاتة على مانتيجة التحليل تطلع :) زى الاشعة المقطعية والرنين والحاجات دى :)