الموضوع: حكايتي مع المنتدي من بروتون ويجا 2008الي مؤمن ميكانيكي المعادي

بسم الله الرحمن الرحيم
انا اخوكم عصام عضو جديد بالمنتدي و فعلا افتخر اني عضو في
انا بروتوني جديد من حوالي 20 يوم
حكايتي اني بعت عربيتي الاكسل و كنت عاوز اشتري كريستالة بس علي اد فلوسي بس كل ما ادور الاقي العربية بتكون متهانة و حالتهم مش كويسة مش هطول واحد صحبي نصحني اجيب بروتون
السيارة بالنسبة لي كانت عبارة عن ماركة اعرفها بس
لكن بصراحة انا عملت عليها بحث و فعلا انا مستفدش و ما تعلمت الا من هذا المنتدي العظيم و من الاعضاء المحترمين و فعلا حبيت العربيه من قبل ما اشتريها من كتر ما قريت عنها هنا في المنتدي من راي الاعضاء الصريح سواء ما لها و ما عليها
و ربنا اكرمني بسيارة ويجا موديل 2008 و فعلا اكتشفت انها عربية فعلا محترمة و مش واخدة حقها هنا في مصر
ثبات و سلاسة و قوة في الموتور و شكل جميل نسبيا و صالون واسع و تابلو ممتاز بصراحة العربية جميلة
الحمد لله
ناس كتير خوفتني منها ان قطع غيارها مش موجودة وده بعكس اللي حصل انا غيرت لها طقم سرفيس .... و من اول مرة جبت حاجتها من محل في حدائق المعادي جنبي البيت اسمة الامير
و سالتة علي كل حاجة فيها لاقيتها موجودة بعكس ما سمعت عنها
خوفوني من اسعار قطع غيارها و دة برضو لاقيتو عكس كدة يعني مثلا سير الكاتينة 150 ج و فلتر البنزين 40 و طقم البوجي 65 يعيني اسعارها بالنسبة للعربيات الحديثة جميلة
بصراحة يوم عن يوم بتعلق بالعربية اكتر و الفضل يرجع للمنتدي الجميل اللي انا استفدت من جدا لدرجة اني كنت عاوز ميكانيكي كمان في المعادي عندي
لاقيت برضو الاجابة في المنتدي اللي زي السكر ده

انا رحت لواحد اسمة مؤمن الالماني في صقر قريش رقمة تليفونة 01149445794 ناحية مرور البساتين كدة الواد زي السكر شاب صغير في السن محترم و امين و صنايعي و عاوز ياكل عيش مش متكبر و متعجرف بالعكس طموح
رحت له و اتعرفت علية و كنت لسة شاري العربية اول ما اخدها كشف عليها كشف كامل كاني رايح اشتري لسة من غير ما اقولة اعمل كدة و الحمد لله طمني عليها و قالي انها زي الفل
كنت عاوز اغير طقم السرفيس كامل
رحت جبتة له و ظبطلي الدنيا كلها و خالي لي العربية زي الفل و خد مصنعة بالنسبة للي عملة مش كتير انا عارف اني لو كنت رحت لمكان تاني كنت هتظبط في الدفع
و احلي ما في الموضوع انة بيشتغل بايدة هو مش صاحب ورشة و مشغل صنايعة عندة لاء هو صاحب الورشة و عاوز يحافظ علي اكل عيشة
بصراحة الواد محترم و امين و مش حراق و لو حصل لك حاجة في حتة يجيلك لحد عندك و ده محصلش معاي بس حصل قدامي

خلاص الكلام الكتير اللي انا رغيت في دلوقت

فخور بانضمامي الي المنتدي و اني عضو في
فخور اني بقيت بروتوني
فخور بالمعلومات اللي انا استفدها من المنتدي
اشكر القائمين علي ذلك من قلبي
اخوكم عصام امين