حقيقة رينو لوجان أتوماتك 2016

**Elsanady** · 28-01-2016 09:58 PM

السلام عليكم

من زمان و أنا بسمع أن الرينو عموما سوقة مش ماشى فمصر و صيانة صعبة و قطع غيار غالية و مش متوفرة و ضعيف على شوارع مصر ميستحملهاش و عشان كدة مش ماشى أوى فمصر.

و بعدين مرة وااااحدة هووووب بقيت أشوف الرينو لوجان الشكل الجديد ماشية فالشارع أكتر من الفيرنا ... هوا فى أية؟؟؟؟

لدرجة أنى فكرت أشتريها بس متخوف من المشاكل اللى كتبتها دى ... أرجو من اهل الخبرة أن ينصحونى مع سرد عيوب و مميزات اللوجان أتوماتيك 2016 و تصليح معلوماتى عن الرينو أذا كانت خاطئة لأنها واضح فعلا أنها مش مظبوطة أوى بعد بالأنتشار السريع اللى أنا شايفة للعربية دى فمصر.

و شكرا

**scientist9508** · 28-01-2016 11:18 PM

بسم الله الرحمن الرحيم

أخى الفاضل

ما ذكرته غير دقيق بالمره.

تتوافر اللوجان بمحركين

1 - مانيوال بقوة 90 حصان

2 - أوتوماتيك بقوة 110 حصان (محرك الفلوينس)

السياره ممتعه فى كل شىء و سعرها منافس جدآ. ربما تكون تكنولوجيا معقده بعض الشىء لكنها أبسط من كثير من السيارات المنافسه لها.

عيوب هذه السياره

1 - إستهلاك الوقود العالى

2 - (المانيوال) أقصى سرعه له 160 كم/ساعه

3 - (المانيوال و الأوتوماتيك) ثباتهم متواضع

4 - (المانيوال) صوت المحرك عالى

5 - (المانيوال و الأوتوماتيك) يكلفان ثروة عند تعرضهما لحادث

هداك الله لأرشد أمرك و أقومه

السلام عليكم و رحمة الله و بركاته

**Elsanady** · 28-01-2016 11:33 PM

حضرتك قصدك أية بتكنولوجيا معقدة؟؟ و ماذا عن سرعة و قوة موتور الأوتوماتك؟

**scientist9508** · 29-01-2016 03:12 PM

المشاركة الأصلية كتبت بواسطة elsanady

حضرتك قصدك أية بتكنولوجيا معقدة؟؟

أقصد أن تصليحها ليس متاح خارج الوكيل فلا يزال كثير من أسرار المحرك خفيه و عصيه على الميكانيكيه. ستجد من يخبرك بالعكس و من يخبرك بذلك ليس كاذب و لكن تأكد أنه يقصد الفك و التركيب (فك و تركيب العفشه مثلآ أو البوجيهات أو أى شىء لا يحتاج سوى فك مسامير و ربطها مره ثانيه) و لكن تشخيص الأعطال لا يقدر عليه سوى وكيلها فقط.

و ماذا عن سرعة و قوة موتور الأوتوماتك؟

نفس سرعة و قوة محرك الفلوينس إلا أن بنية و وزن و عفشة الفلوينس تستطيع الثبات على الطريق عندما يدفعها محرك بهذه القوه. و لكن اللوجان ليست فى وزن الفلوينس و لا فى حجمها و لذلك أقل ثبات منها و من هنا كان وصف ثبات اللوجان بالمتواضع. كما أن إرتفاع اللوجان عن الأرض سبب رئيسى فى تواضع ثباتها.

بصفه عامه فإن الأوتوماتيك أفضل بكثير من المانيوال. و سيارات الرينو سيارات ممتعه جدآ و لكن إبعدها عن:

1 - الصدمات (لإرتفاع أرقام التصليح بشكل يصيبك بصدمه)

2 - قطع الغيار غير الأصليه (لأنك لن تحصل على آداء رينو بل تحصل على آداء أى سياره أخرى)

3 - الصيانات أو التصليح فى الورش الخارجيه ( لأن السياره مليئه بالأسرار . . و عمومآ كل السيارات الفرنسيه كذلك)

أرحب بكل إستفساراتك و فى أى وقت

السلام عليكم و رحمة الله و بركاته

**tameem2010** · 29-01-2016 03:39 PM

رينو نفسها طوال تاريخها كثيرا ما تعرضت للاخفاقات والفشل ده في اوربا مش هنا
اما هنا مفيش غير رينو 9 ورينو ميجان ولوجان وفلوانس هما اللى باعوا في مصر
مشاكل الرينو كتير جدا ومقرفة لابعد مدى
عربيات غير ملائمة لمصر ابدا
سوقنا هواه ياباني او كوري
غير كده انسى
عموما اللى غاوى مرازية يشتري عربية فرنسيه

**Elsanady** · 29-01-2016 03:50 PM

شكرا للمعلومات القيمة أستاذ scientist <
أنا معاك أن صيانتها برة التوكيل صعبة عشان كدة حتى كنت بقول فى عيوبها صعوبة الصيانة و دة فعلا عيب فرنساوى عموما.
لاكن دة يجرنا لنقطة أهم ... حيث أن صيانتها يعنى التوكيل فقط طب أية أخبار التوكيل بقا من حيث التعامل و الجودة فى الصيانة؟؟
كمان هل قطع غيرها متوفرة فى التوكيل؟؟ و هل لا يوجد لها خارج التوكيل قطع غيار أصلى؟

شكرااا

**Elsanady** · 29-01-2016 03:54 PM

ههههههه شكرا أستاذ Tameem

طب ممكن حضرتك تقولى رأيك فى اللوجان الجديد خصوصا أنة منتشر أوووى ... و ممكن توضيح أكتر للعيوب للعربية دى بذات من وجهة نظرك؟

نفسى فجديد بس كلة ألا المرازية :D

**tameem2010** · 29-01-2016 04:10 PM

رايي الشخصي ان الناس زهقت من الفيرنا والافيو
الرينو اشيك وامكانيات وحركات اكتر من الفيرنا والافيو
وبيقولوا انها عربية فرنسيه يعني اقوى واشيك وحمالة اسية
خاصة ان الفيرنا والافيو من العربيات اللى بتتهان بسرعة وعاوزة استعمال شوكة وسكينة
مع ان لوجان مالهاش علاقة اساسا بفرنسا غير علامة رينو
لان اللوجان والسانديرو والستيب واي هما اصلا عربية داتشيا
رينو استحوذت على الداتشيا
وبقت تحط علاماتها على عربيات داتشيا وتسميها رينو
ده غير التاتش الفرنساوي اللى هو كله دوائر كهربائيه تطلع عينك
ولو سلك عمل قفلة او لمس في كشاف ممكن يطفي لك العربية كلها وتحلف ما تدور
زي الكهربائي اللى صمم الميجان مثلا
كان كهربائي حيوان والعربية كلها مشاكل
نفس الكلام ده في البيجو
فيها دوائر كهربائيه قمة في الغباوة والتناحه
ومشاكل الكهرباء عموما انهما ملموسه وغير محسوسة
يعني العفشجي بيبص ويشوف لو فيه جلب مهريه فيه مساعد مكسور كل حاجة بتبقى واضحه ادامه
زي الميكانيكي بيفتح الكبوت ويشوف بعينه
بعكس الكهربائي مش شايف حاجة
كلها حاجات تعتمد على الخبرة والابداع
وعندنا ابداعات الكهراباية في مصر لا حصر لها لان محدش فيهم متعلم او فاهم
كلهم ورثوا المهنة او اتعلموها بالفهلوة بدون علم حقيقي
واللى معاه عربية فرنسيه تحديدا بعد 10-15 سنة تلاقي معظم الكهرباء عنده كباري
الكهربائي لما بيغلب بياخد من الضفيرة دايركت ويعمل كوبري كهربي لمكان العطل ويريح نفسه
ده طبعا بعد ما يحرق كام دائرة كهربائيه سليمة بالاساس وبعد ما يخليك تغير قطع كتير سليمة اصلا

عشان كده ابعد عن المرازيه
خليك في الياباني
هين لين
سهل مفيهوش تعقيدات
وعربيات اعتماديه لاعلى درجة
بس فقيرة داخليا ومفيهاش الحركات بتاع الفرنساوي
بس عمرها ما تقل معاك ابدا
اصيلة وبنت ناس
انما الفرنساوي يبيعك في اي لحظة صحراوي دائري محور في اي مكان ولا يفرق معاه

يلا كفايه كده

**tameem2010** · 29-01-2016 04:15 PM

يعني مثلا ميكانيكيه الرينو عندهم فتوى غريبه
اي عربية رينو تروح لهم بسبب مشاكل شخونة او حرارة
اول حاجة يعملها يقول لك افصل السخن بتاع التكييف
ويغير شجرة التكييف ويخلي التكييف بارد بس
ده كثيرا ما بيحل المشكلة
بس ده مش حل
ماهو اما ده عيب تصميم في تكييف الرينو او غباء صنايعي مش عارف يحل او بيفتي
قيس على كده حاجات كتير

طبعا في الاجواء شديدة الحرارة بتلاقي الفرنساوي يهنج ويطفي ويركن على جنب
عربيات مش مصممة للاجواء الحارة
عشان كده عمرك ما تلاقيها في الخليج

**Elsanady** · 29-01-2016 04:20 PM

ههههههه يانهار أسود ... طب ما اليابانى غالى أوى عن الrange اللى بتكلم فية.
رأيك اصرف نظر عن اللوجان 2016 زيرو و أفكر فاليابانى مستعمل؟؟ ولا أية

الموضوع: حقيقة رينو لوجان أتوماتك 2016

LinkBack

أدوات الموضوع

عرض

-

-

المواضيع المتشابهه

استفسار بخصوص رينو لوجان 2016

دواسات رينو لوجان 2016

فيديو عن السياره رينو لوجان 2016

استلمت رينو لوجان 2016

إنطباعي عن رينو لوجان 2016 هاي لاين

الكلمات الدلالية لهذا الموضوع

المفضلات

المفضلات

ضوابط المشاركة