المشاركة الأصلية كتبت بواسطة adelmagdy
سؤال يا جماعة اني عندي مهبط العربية فطبعا المساعد مكبوس يعني مشوار المساعد بقي قصير هل ينفع اركب مساعد يبقي مشواره قصير اصلا لو حد يعرف انواع في السوق يقوللي انا سئلت عمرو قاللي ركب كوني وطبعا كوني المساعد الواحد ب1000 وانت طالع فهل فيه انواع تانية مونرو مثلا او اي حاجة؟؟؟
السلام عليكم و رحمة الله و بركاته
بص يا أستاذ/ عادل
بعد التجارب طبعاً و السؤال إكتشفت الأتى :
1- أفضل جنوط للبيتل هى جنوطها الأصلية اللى بتنزل مع الفابريكة , و بالرغم من إن الجنوط الإسبور بتخلى منظر العربية تحفة لكن للأسف بتكون أتقل وزناً بكثير عن الجنوط الأصلية بتاعت الفابريكة و بالتالى حمل أكبر على العفشة مما يؤدى إلى إستهلاكها بسرعة مقارنة بالثبات الكبير.
2- كذلك الكاوتش العريض بيساعد كتير جداً على الثبات و لكن بيؤدى إلى زيادة تلامس الكاوتش بالأرض و بالتالى مجهود أكبر على الماتور بما يؤدى مع الوقت إلى قلة العزم و عمر الماتورو بالتالى بيكون الكاوتش الأصلى للعربية أفضل و أريح للعفشة و المساعدين و كذلك كسرة الدركسيون بتكون أكبر طبعاً مما بتكون مركب كاوتش عريض ( للأسف أنا كمان مركب كاوتش عريض و بفكر قريب إن شاء الله أجيب نفس مقاس كاوتش الفابريكة ).
3- تهبيط السيارة عن الوضع الطبيعى بيقصر مشوار المساعدين و السوست و بالتالى بتصبح العفشة ناشفة جداً و بالتالى أيضاً عدم الراحة داخل السيارة و إستهلاك أكبر للعفشة و سريع و أيضاً بيصبح الدركسيون ثقيل جداً بالإضافة إلى إن الخبط الكتير و الجامد فى المطبات بيأثر على العربية ككل و على علبة الدركسيون كمان ( و أنا عربيتى كانت واطية من قدام و أنا من الناس اللى بتحب تجرى بالعربية لو سمحت الظروف طبعاً ) و لكن دا أثر كتير على عمر المساعدين عندى و على علبة الدركسيون عشان كدا عليتها شوية من قدام من كام شهر و غيرت المساعد الأمامى يمين بواحد ألمانى أصلى نظيف عند الحاج/ محمد على الميكانيكى من كام يوم و صدقنى ماحستش بفرق كبير فى الثبات لغاية 120 كم فى الساعة و الثبات و الحمد لله زى الفل و تمام .
* الخلاصة و دا مش إلزامى أو فرض على الناس اللى معاها بيتل , كل لما بتكون الأساسيات بتاعة العربية زى الفابريكة اللى نزلت بيها بتحس بطعم و حلاوة الفولكس و بأدائها و متانتها و بتحملها و بتقلل المصاريف و بتعيش بالتالى أكتر بكتير عن أى تعديل.
و كمان إحنا فى مصر المحروسة أم المطبات و الحفر و المدقات و خلافه ...
كل دا فى رأيى الشخصى و بناءأ على التجربة و الخبرة و السؤالو القراءة و البحث , و مش عارف رأى باقى الأعضاء الكرام إيه ؟؟؟
و شكراً
المفضلات