حضرتك بتحط مية من الحنفية في الرادياتير .. صح؟؟
غالبا كده عندك مشكلة في ثرموستات الكوعة.. وغالبا هو دلوقتي عطلان على الوضع المفتوح..
لو عايز معلومات أكتر عن ثرموستات الكوعة ودوره .. تقدر تدخل على الموضوع ده:
http://www.nilemotors.net/Nile/328708-a.html
عموما.. حضرتك هتعمل التالي بنفس تسلسل الخطوات دي:
1- هتنزل تشتري ثرموستات جديد أصلي (سعره مش غالي.. مش هيزيد عن 200 جنيه)
2- تشتري جركن مياه تبريد مخصص للرادياتير الألومنيوم (مية خضرا أو حمرا أو زرقا.. بس اتأكد من موضوع الرادياتير الألومنيوم ضروري).
3- اتأكد إن مفيش تسريب مياه من دورة التبريد (يفضل تغير الخراطيم احتياطي لو عدى عليها 5 سنوات أو أكتر)
4- تعمل غسيل كامل لدورة التبريد (موتور ورادياتير) لإزالة الصدا الموجود في الدايرة
5- تطلع بعد الغسيل مباشرة وتروح على ميكانيكي يغيرلك الثرموستات.
6- حط مياه التبريد بنسبة 35% تقريبا من إجمالي كمية مية التبريد في الدايرة (حوالي 2-2.5 لتر من إجمالي 6-7 لتر) علشان تمنع الصدا.
نصيحة أخوية...
اوعى تقرب مية الحنفية من دورة التبريد بتاعت العربية... لو عايز تزود مية استخدم مياه مقطرة بالإضافة إلى مية التبريد الملونة.
مية الحنفية بتعمل صدا في الموتور وتآكل داخلي فيه .. بالإضافة للصدا في سربنتينة التكييف (الدفاية).. ولو استمريت كده.. أول أعراض الصدا الواضحة هي إن السربنتينة تتخرم ومية الرادياتير تطلع من التابلوه على صورة بخار..
...
المفضلات