الموضوع: كيفية التعامل مع الفتيس M-mt

ألف مبروك العربيه ربنا يبارك لك فيها ويكفيك شرها وتستخدمها فى الخير دائما إن شاء الله

المشاركة الأصلية كتبت بواسطة askassem

أولا السلام عليكم يا جماعة
الحمد لله أنا من المنضمين حديثا لنادى الكورولا الجنوب أفريقى
و الحقيقة إترددت كتير قبل ما أجيب العربية و فكرت إنى أجيبها مانيوال من كتر الشكاوى اللى لقيتها و الناس إتكلمت عنها بخصوص الفتيس ال Mmt
و فى النهاية قررت إنى أتابع فقط التعليقات من ملاك السيارة فقط
و ده اللى ساعدنى فعلا إنى أخد القرار بشراء السيارة و الحمد لله فعلا أنا شايف إنه كان إختيار صحيح
و مش حانكر إنى لقيت ناس مش عاجبها الفتيس لكن لقيت إن أغلب ملاك السيارة الفعليين فعلا بيدافعوا عن الفتيس و بيحاولوا يوصلوا فكرة عمله
و فعلا فيه أكتر من موضوع فى المنتدى إتكلم و شرح فكرة الفتيس و بالتالى أنا مش حاكرر اللى إتقال بالفعل
اللى أنا عايز أقوله هو كيفية التعامل مع الفتيس و بينقل إمتى فى المواقف المختلفة

فكرة الفتيس ال Mmt إنه زى ما كلنا عارفين إنه مبنى على فكرة المانيوال
ولكن كل الكلام كان إن لازم الواحد يرفع رجله من على دواسة البنزين ساعة النقلة و كان أبسط سؤال هو أنا حاعرف منين إن العربية عايزه تنقل و غيرها من الأسئلة

واقع الأمر

إن الواحد و هو سايق لما يعوز ينقل ببساطة كل اللى يعمله إنه يرفع رجله لحظة من على دواسة البنزين و بالتعود حتلاقى إنك مش لازم ترفع رجلك للأخر مجرد إن ال Rpm يهدى لحظة و العربية حتنقل لوحدها بمعنى إنك كأنك بتطلب النقلة مش بتستناها، النقلة دى بتبقى على Rpm قليل فى وضع ال E حوالى 1500-2000 بمعنى أنك لو رفعت رجلك قبل القيم دى بكتير الفتيس مش حينقل و لما تدوس تانى حتلاقى نفسك على نفس النقلة.
أما فى وضع ال Es فطريقة القيادة هى نفسها و لكن حدود النقل أعلى بمعنى إن العربية مش حتنقل لوحدها على أقل من حوالى 3000rpm
طيب لو الواحد فضل دايس بنزين و ما رفعش رجله إيه اللى حيحصل
العربية حتنقل لوحدها حسب ال Rpm ووضع ال E أو Es و هنا بتحس بالضبط كأن حد فصل البنزين و داس دبرياج و نقل و ساب دبرياج و رجع البنزين تانى و ده اللى الناس سمته النتشة، هى محسوسة أكتر فى وضع ال E عن ال Es علشان ال Rpm العالى بيلغى إحساس النقلة
علشان كده فعلا العربية فيها قوة المانيوال بالضبط دون أى نقص مع متعة و سهولة الأوتوماتيك
نيجى لشوية حالات خاصة
لو حتاخد مطب صناعى
لو داخل على المطب و إنت هادى مفيش أى مشكلة حتعدى المطب و تكمل و العربية تنقل معاك بدون أى مشاكل
لكن لو أخدت المطب على سرعة عالية نسبيا فإنت محتاج عزم النقلة اللى معاك بعد النقلة مباشرة علشان كدة الفتيس مش حينقل فى الحالة دى مهما رفعت ال Rpm علشان يفضل معاك عزم النقلة و لما تخلص من المطب و عايز تنقل إرفع رجلك و نزلها تانى و العربية حتنقل على طول
و لاحظت إن نفس الحركة بتحصل فى الملفات الحادة لو أخدتها على سرعة عالية

نيجى للكيك داون
إحنا إتفقنا إن فرق ال E عن ال Es هو مكان الحد الأدنى للنقل فقط و بالتالى الشرح بتاعى حينطبق على النقلتين و نبقى إحنا فاهمين إن كل نقلة بتتكلم فى ال Rpm بتاعها

فكرة الكيك داون إنك لما بتدوس بنزين على الآخر بتقول للعربية تنزل نقلة علشان تديك عزم أشد و تعرف تجرى بالعربية
و إنت سايق عادى لو فى أى لحظة دست بنزين على الآخر اللى حيحصل إن العربية حتاخد حوالى ثانية أو أقل علشان تنقل و تستجيب و بالتجربة أنا شايف إن ده معقول جدا "تقريبا نفس الوقت لو معاك عربية مانيوال بجد" بس فكرة الكيك داون إن العربية مش حتنقل النقلة الأعلى إلا لو رفعت رجلك أو إن ال Rpm قرب على الأحمر و لو رفعت رجلك و رجعت كيك داون تانى طبعا مش حتنزل نقلة و برضة مش حتنقل الأعلى إلا لو شلت رجلك تانى

طبعا فى كل الحالات اللى فاتت ممكن تنقل من المفاتيح اللى ورا الدركسيون + و -

وضع ال M هو المانيوال العادى مع ملاحظة إن لما ال Rpm بيهدى النقلة بتنزل لوحدها كأن المطلوب هو ال + فقط

ده كده تجربتى مع ال Mmt لغاية دلوقتى ، أنا لسة مكملتش أسبوع بالعربية
فلو إكتتشفت حاجة تانية حاجى أقولهالكم على طول
عذرا للإطالة و شكرا لصبركم و أرجو أن أكون أضفت حاجة و لو صغيرة

الف مبروك على السياره وربنا يديك خيرها ويكيفيك شرها
بالنسبه لموضوع ان حضرتك تشيل رجلك من البنزين والعربيه بتنقل هو بالتاكيد بيلغى الاحساس بالنقله نهائى ولكن اعتقد غير مهم استخدامه لانه هيشتت تفكيرك اثناء القياده والافضل استخدام الفتيس بوضع es وعدم استخدام e نهائيا وانا شخصيا بعمل كدا
وفى حاجه حصريه هقولها اهى عمر ما حد قال عليها خالص فى العربيه....لما العربيه تكون واقفه وسط الزحمه اقلب على وضع المانيوال وافضل ضاغط لمدة حوالى 3 ثوانى على + فى الدريكسيون هتلاقى الشاشه بتقولك انك على التانى مش الاول وهتطلع بالعربيه ومش هتحس باى نقلات او هتحتاج تغير النقله لانك ببساطه ماشى على التانى

سؤال اخير هو حضرتك جبتها استلام فورى ولا حجز وهى موديل 2008 ولا 2009 اصل التوكيل كان بيقول انها ب 160 الف للحجز والاستلام الفورى بره كان بيوصل 167 الف عند المعارض الكلام ده فى شهر 8 اللى فات
وتقبل تحياتى

المشاركة الأصلية كتبت بواسطة sharky

يا سيدى الفاضل أنا ليس بينى و بين الكرولا تار بايت كما تدعى
أنا ماقلتش إن الكرولا وحشة دا أصاحبها و ملاكها فى المنتدى هما إللى بيقولوا كده

يا جماعة ياريت الكل يفهم دا رأى ملاكها ماتروح تسألوهم ليه بيقولوا كده
بتسألونى أنا ليه !!!

حاجة غريبة فعلا

ملاكها ازاى حضرتك اللى قالوا كدا احنا قولنا قبل كدا دى كانت شكوى فى بداية ظهور السياره لعدم المعرفه بنظام الفتيس دلوقتى كل ملاكها قدام حضرتك وبيقولوا ما فيهاش مشاكل
احنا لحد دلوقتى 5 من ملاكها فى الموضوع فين ملاكها اللى حضرتك بتتكلم عنهم بيشتكوا منها
وتقبل تحياتى