الموضوع: شيل الترا هيلكس هل من مجرب ؟

المشاركة الأصلية كتبت بواسطة borio1704

حضرتك محتاج الأول تعرف بعض الأساسيات عن زيوت العربيات علشان ولا تلبخ مع عربيتك ولا تخلي حد يتوهك أو يشتغلك أو يفتيلك بغير علم...

أول حاجة أعتقد إن حضرتك محتاجها هي إن كل ماركات الزيوت بتعمل كذا نوع من الزيوت.. وكل نوع بمواصفات مختلفة عن التانية..

تاني حاجة ... مواصفات الزيوت مهياش مجرد لزوجة وبس.. يعني مش مجرد إني أوصف الزيت بلزوجة 20w-50 مثلا يبقى أنا كده قلت كل حاجة.. بالعكس.. ده المهم لسه ما اتقالش... اللي بيسموه "مستوى الأداء" أو "مستوى الجودة".. وده هو الحاجة الحقيقية اللي يتحدد إذا كان الزيت ده يناسب عربيتك ولا لأ..

ثالث حاجة.. مفيش نوع زيت معين ينفع كل العربيات.. ونوع الزيت هنا ماهواش الماركة.. لإن زي ما قلنا قبل كده .. كل ماركة بتعمل كذا نوع زيت


رابع حاجة... الزيت المناسب هو اللي مواصفاته زي الكتالوج بتاع عربيتك.. لإن صانع الموتور هو الوحيد اللي يعرف إيه الحاجة الصح لموتوره علشان تحافظ عليه بكفاءة عالية لأطول فترة ممكنة...

الحاجة الحلوة إن المواصفات الموجودة في الكتالوج ممكن تلاقيها عند كذا شركة زيوت .. وممكن كمان تلاقي عند شركة الزيوت الواحدة أكتر من زيت ينفع معاك.


بعد الكلام ده.. نشوف بقى كتالوج عربيتك بيقول إيه...


مستوى الأداء:
Api sm على الأقل.. وفي اللزوجات الخفيفة لازم يكون ilsac gf-4 على الأقل.

اللزوجة:
5w-20 أو 5w-30 أو 10w-30 أو 15w-40 أو 20w-50
ولزوجة 5w-30 هي الأفضل لتوفير البنزين.


أي زيت يوافق المكتوب في مستوى الأداء واللزوجة مع بعض يبقى هو ده أحسن زيت لعربيتك..

نعرف إزاي؟؟؟


ببساطة نمسك علبة الزيت ونشوف المواصفات المكتوبة على ظهرها ونقارنها بالمطلوب في الكتالوج... ولو ما حققتش كل المطلوب يبقى مش نشتريهوش.




في رأيي... الزيت د مناسب جدا جدا

موبل1 x1... بلزوجة 5w-30


الزيت ده مواصفاته زي طلبات الكتالوج وأحسن..

بس اتأكد إن اسمه x1.. علشان موبل1 عندها زيت تاني بنفس اللزوجة.. بس مش هيبقى حلو مع عربيتك زي ده.


...

أشكرك على النصائح الرائعة الجميلة جزاك الله كل خير .. فيه ناس كتير نصحتني باستخدام شيل هيلكس ايه رأيك أنا متحمس مع حضرتك لموبيل ؟ بس لو كده هو بقى بكام دلوقت ؟ وأغيره على كام كيلو ؟