واضح ان نجاح الكورولا واجع ناس كتير .. بجد بسم الله ماشاء الله عربية في منتهى الروعة والقوة الجبارة للموتور خاصة في الجنوب افريقي, وتصنيفها ثالثاً بعد المازدا 3 ظلم كبير, يعني مثلا المازدا 3 احسن من اللانسر شارك ؟!!!!!!!!! ده لا قطع غيار ولا صيانة ولا اعادة بيع ولا توكيل اصلاً, ولا استهلاك بنزين ولا ارتفاع عن الأرض اللانسر تكسب المازدا 3 في كل شيء ماعدا الفخامة والتقفيل من الداخل فقط.
وأصحاب اللانسر شارك بانفسهم الي تكرمو بالمشاركة قالو ان الكورولا افضل من اللانسر يبقى اما نقول تلات نسميه ايه؟!!
اجمل شيء موضوع اول وتاني وتالت ورابع ده من غير اي اسباب الي شرحنا فيها كتير قوي
أنا هقول خلاصة الموضوع من وجهة نظري بعد شهور من المداولات على صفحات الموضوع ده, من وجهة نظري كالآتي:
الكورولا في المرتبة الأولى عشان:
1- الموتور:
أقوى موتور في الأربعة (الجنوب أفريقي) ومحدش والنبي يقولي بعد ال180 سحبها بيقل عشان محدش هيسوق اصلا 180 في شوارعنا الا لو عايز يقابل وجه الكريم ومافيش اصلا تجربة تثبت انها اقل من السيفيك بعد ال180.
2- التوكيل:
أفضل توكيل في الأربعة وفقاً لما اتفق عليه الجميع حتى معارضي الكورولا ان تويوتاايجبت يعتبر افضل توكيل في مصر.
3- النعومة:
أنعم سيارة في القيادة وعلى المطبات وده عن تجربة شخصية وبشهادة الكثيرين من الي شاركو في الموضوع, ولذلك فهي الأنسب لشوارعنا المدغدغه, وسلسة في القيادة والمناورة مع حفظ نفس الميزة لباقي العربيات لكن الكورولا الأنعم على الإطلاق, ورغم انها الأنعم الا انها حققت درجة عالية من الثبات ما اشتكاش منها ولا مالك واحد للكورولا حتى الآن وبإمكانكم تراجعو قسم تويوتا.
4- الإرتفاع عن الأرض:
الأكثر ارتفاعاً عن الأرض بين الأربعة بالأرقام, ودي ميزة قوية جدا عشان شوارع بلدنا المحروسة الي المطبات فيها بتتعمل صب زي الي بيبني برج.
5- قطع الغيار (أسعار وأنتشار) :
طبعا كل مالكي الكورولا بيحمدو ربنا على أسعار قطع الغيار مقارنة ببقيت الياباني خاصة المازدا الي قطع غيارها اغلى بكتير و الانسر غالية برضو, والسيفيك اقرب واحدة في الأسعار للكورولا لاكن لازالت مبالغ في بعض أسعار قطع غيارها بشكل مستفز (بتكلم عن التوكيل), فما بالكم لو اتكلمت عن بره التوكيل التويوتا عموما قطع غيارها زي الرز وفي اي حتة وبأرخص الأسعار ومتشرة اكتر بكتير من اي سيارة اخرى بين الأربعة.
6- سعر إعادة البيع:
أكتر مالك عربية بيبقى سعيد وقت ما بيبيع عربيتو عشان يغير هو مالك التويوتا بشكل عام والكورولا بشكل خاص وده طبعاً لأنها السيارة الأعلى في الحفاظ على سعرها في السوق المصري اذا مادخلناش ال128 في المقارنة, ودي نقطة من أهم النقط لان الناس مش لاقية فلوسها في الشارع وحرام اشتري عربية فوق ال150 الف ابيعها بعد سنتين ب90 ألف مثلاً, والحقيقة المازدا والسيفيك من العربيات السيئة جدا في سعر اعادة البيع, وياريت اخوانا الي مش فارق معاهم الفلوس في اعادة البيع مايحجروش على الناس التانية الي بتجيب زيرو بشق الأنفس, في الرأي, انت مش فارق معاك الفلوس غيرك كتير جدا وهم الأغلبية يفرق معاهم جدا وبيتوجعوا لما يخسرو في اعادة البيع وده الطبيعي على فكرة, اما الي يقولك مش فارق معايا الفلوس وعامل فيها مليونير ايه الي دخلك في الفئة دي اصلا روح هات بي ام او مرسيدس او برادو او اي حاجة من الفئات العالية.
7- الصيانة والتصليح:
الصيانة داخل الوكالة على أعلى مستوى شأنها شأن السيفيك والشارك, لكن الفرق ان الكورولا لو خدتها لاي ميكانيكي خبرتو مش كبيرة قوي هيقدر يعرف فين المشكلة ويعالجها بعكس السيفيك والمازدا مثلا الي اصحابها بيعانو من الفتو بتاع الميكانيكية وممكن تراجعو قسم الهوندا والمازدا, وده معناه ان العربية بعد الضمان ما يخلص مافيش خوف عليها بعكس الباقي الي بستثني منو الشارك نوعا ما لان هناك العديد من الميكانيكية الي حفظو الميتسوبيشي عموما.
8- استهلاك البنزين:
مافيش طبعا كلام يتقال ولا مناقش لان كل الناس بما فيهم اعداء الكورولا عارفين انها الأكثر اقتصادية في استهلاك البنزين, والي مش فارق معاه يجيب 2000 سي سي بس مايقوليش مش مهم لان البنزين يعتبر قسط فوق قسط العربية للناس الي بتقسط, ويعتبر ميزانية لوحده للناس عموماً.
9-الإعتمادية:
مش هقول ولا كلمة غير : الكورولا الأكثر اعتمادية بدون مناقشة او تفكير او حتى لفت نظر.
10- الأمان:
باختصار 8 ايرباج و abs وepd وخمس نجوم في الأمان والباقي مخدش التقييم ده.
11- الكماليات:
الكورولا متوفرة بكماليات أكثر من جميع السيارات في المقارنة ومع ان الكماليات دي كلها ممكن تتركب خارج التوكيل في اي عربية تانية الا ان لما تكون نازلة كده من التوكيل له طابع وشعور خاص, ومهم للكثير من المستهلكين.
12-حتة فرفشة:
لو راكب كورولا فا ارفع راسك قوي قوي وافرح بعربيتك جداً لانك راكب العربية الأكثر مبيعا في العالم والدركسيون الي قدامك عليه علامة أكبر شركة لتصنيع السيارات في العالم العملاق الياباني تويوتا صاحبة الدائرتين البيضاويتين المتقاطعتين, بجد انا بحب احط ايدي كل شوية على الشعار قدامي في الدركسيون وببقى سعيد بيه جدا.
السيفيك في المرتبة الثانية عشان:
1- الشكل والتصميم:
السيفيك تتمتع بشكل رياضي جميل جدا ومبهر لكل من يشاهد تلك السيارة في اي مكان, هتخليك تبص عليها غصب عنك من التصميم الرياضي المبدع, ده غير بقى التابلوه الي بجد يحسسك انك راكب عربية تختلف عن جميع السيارات في فئتها وهي الأفضل بين الأربعة في الشكل والتصميم الداخلي والخارجي.
2- الثبات:
أثبتت لي السيفيك عن تجربة شخصة في سواقتها انها الأكثر ثباتاً بين العربيات الأربعة في معظم الطرق وده عامل مهم جدا بيخلي ناس تبعد عن عربيات وتختار عربيات تانية مخصوص عشانه, ورغم ان الفرق مش هيظهر للراكب غير بعد ال120 الا انو مهم جدا ومؤثر خاصة باحساس السائق بالقيادة الرياضية.
3- السعر والبرستيج:
ناس كتير بتحس طالما انها راكبة عربية اغلى انها راكبة عربية برستيجها اعلى ومافيش مانع بالفعل فهي بالتأكيد برستيجها اعلى خصوصا في ثقافة شعب بلدنا المحروسة, والسيفيك تستحق السعر المدفوع فيها لانها فعلا عربية محترمة من كل الجهات.
4- التميز:
السيفيك عربية مش منتشرة قوي فمصر وده بيخلي مالك السيفيك مميز جداً في الشارع بعكس الكورولا والشارك الي منتشرين بشكل كبير, ومع ان في ناس شايفة ان ده عيب مش ميزة, الا ان هناك مستهلكين بيختارو عربية غير منتشرة بهدف التميز رغم الصعوبات.
5- التوكيل:
الفطيم توكيل محترم جداً وهو اصلا توكيل اماراتي الجنسية لمالكه الفطيم الي ليه شهره وباع طويل في مجال السيارات في الإمارات, ومع شكوى الناس من ارتفاع تكاليف الصيانة وقطع الغيار الا ان الفطيم يظل أحد أفضل التوكيلات في مصر.
6- حتة فرفشة:
بيتهيقلي الشكل الرياضي والفخم للعربية ممكن يخدع الكمين في بعض الأحيان لان الأمين ممكن مايعرفش نوع العربية فايفتكر ان الي راكبها وزير ومايدلوش مخالفه ويقولو اتفضل يا باشا.
المركز الثالث الشارك والرابع المازدا عشان:
- الشارك شكلها من بره احلى لكن المازدا من جوه اجمل واشيك.
-الشارك سعر إعادة بيعها اعلى.
- الشارك استهلاك البنزين بتاعها اقل.
- الشارك اسهل في التصليح.
- المازدا رغم كمالياتها الأكتر لكن مالهاش توكيل بعكس الشارك.
-الشارك قطع غيارها ارخص ومتوفرة اكتر.
-المازدا افضل في التسارع والثبات على الطريق.
وكل سنة وانتم طيبين وعيد سعيد عليكم انشاء الله
و .... و ..... و عجبي
المفضلات