حامل لواء التصدي لحملة خلوها تصدي

**ramyfawzy** · 12-01-2009 08:39 AM

اولا : باشمهندس مصراوي جدا
تحياتي ليك على الجرأة والشجاعة المتناهية في رفع لواء الحملة المضادة
ثانيا : اعضاء الحملة الكرام
وبعد موضوع الحملة والشعار (خلوها تصدي وموديلها يعدي)
شهر - اتنين - تلاتة - سنة ؟؟؟؟
التجار والوكلاء اللي مش عارفين يصرفوا المخزون بتاعهم من موديلات 2008 و 2009 هيفضلوا مخزنين البضاعة
وطبعا مفيش واحد فيهم عنده استعداد يتنازل عشان يرضي رغبات الجماهير العريضة بخفض الاسعار(وده هيحصل في الاجتماع اللي جاي)
تفتكروا كده لو الحال ماتغيرش في الكام شهر اللي جايين دوول ايه اللي هيحصل ؟؟؟؟؟
اللي عايز يشتري عربية جديدة من الموديلات اللي موجودة في السوق ساعتها هيشتري بإختصار شديد (المصدية اللي موديلها عدى)
وكأنك يا ابو زيد ما غزيت
وبعدين اصلا العربيات مش سلعة اساسية او ضرورية للبقاء على قيد الحياة (يعني مش اكل ولا شرب ولا حتى ملبس) فمش هتأثر قوي في حياتنا بالعكس لما الوكلاء يفلسوا عشان العند بتاعهم هتلاقي الحياة بقت 100 100 ونسبة العربيات هتقل ومش هيبقى فيه اعباء على الاسر او الشباب اللي بيكافح من اجل ركوب سيارة جديدة والمرور هيبقى فل الفل.
الوكيل بيكسب اضعاف تمن العربية - ماشي اهو برضه بيوزع المكسب ده على ناس بتشتغل عنده وبيوت مفتوحة وفلوس رايحة وجاية وموزعين ومعارض كتيرة ، دلوقت بنطلب منه يقلل مكسبه - اوكيه خلاص هنقلل المكسب بس بدل ماهنجيب 1000 عربية هنجيب 500 بس - وبدل ما يبقى عندي 100 موظف يبقى كفاية عليا 50 (طيب وال 50 التانيين يتولاهم ربنا بقى)
وبعدين اوعوا تكونوا فاكرين ان الوكلاء دافعين تمن العربيات اللي عندهم ديه كاش وعايزين يلموا فلوسهم - لا لا لا لا - بياخدوا العربيات بالآجل زي اي بضاعة في الدنيا (جزء كاش والباقي حين ميسرة وهكذا)
اول ما العملية تخرب - يالا يا حلوة انتي وهيا على بلدكوا تاني متشكرين فلسنا - المصيبة عند تجار الخليجي عشان بيشتروا من تجار زيهم مش من الشركات الام نفسها وهم دول اكتر فئة هتنضر الفترة اللي جاية
نفس اللي بيحصل بره في الشركات الكبيرة اللي على شفى الافلاس :
(انتاج قليل - ربح قليل - تسريح موظفين وعمال بالعبيط)
وهوه ده اسهل حل ممكن يعمله اي رجل اعمال عنده توكيل سيارات
وخليها تصدي
ملحوظة اخيرة :
انا مش ناوي اشتري عربية جديدة لإني معيش تمنها اصلا وكمان انا مش وكيل سيارات ولا عندي معرض ولا دياولو
انا مقضيها مستعمل و ساعات كتير ميكروباظات وشعبطة على ما تفرج
تحياتي ،،،،

**sherifahmed** · 12-01-2009 09:13 AM

الكباب الكباب ! لانخلي عيشتكوا هباب !

كان الها cryptonx فى موضوع "لا هيونداى بعد اليوم ..............(قد تكون فترة محدودة)"

وكلنا فاكرين الفيلم لما اجبروا الحكومه انها تجيب كباب للبشر دى كولها
و على رأى الراجل اللى فى الفيلم "فى اوربا و الدول المتقدمه اسعار العربيات نزلت"
فا يالا اولو معايا "الكباب الكباب ! لانخلي عيشتكوا هباب !" و يبأه شعار تانى للحمله

**Jato.33** · 12-01-2009 09:57 AM

أنا قرأت موضوع حضرتك
وأنا شايف إن حضرتك تراجع نفسك في الموضوع ده
إحنا لينا أقارب وأصدقاء ومعارف كتير شغالين أو كانوا شغالين عند وكلاء السيارات
وحساباتنا مش غلط
الوكلاء فعلاً هما إلي دفعوا الناس لمعادتهم
ويستحقوا العداوة
والممارسات والأسعار إلي بيستخدمها الوكلاء مع العملاء ممكن تشبيهها بإني بمد إيدي للوكيل عشان أشتري عربية محتاجها يقوم ياكل دراعي وبعدين عايزني أرحمه
لا والله ميحصل

خليها تصدي وموديلها يعدي

أنا عارف إن الموضوع ده وقتي ومش هيستمر للأبد
ومش هيثمر مع الوكلاء ولكن هيزيدهم كبر وطغيان في المستقبل ولكن عايزين ندوقهم المر زي ما دوقونا ولو ساعة حتى مش يوم ولا شهر ولا سنة
وحسبنا الله ونعم الوكيل

**mohamed_karara** · 12-01-2009 10:05 AM

المشاركة الأصلية كتبت بواسطة 3mr Farrag

و الله انا شايف كمان....نبطل نتعامل مع التوكيلات
و لا صيانه و لا قطع غيار....
ما هما بيستغلونا في اسعار قطع الغيار و المصنعيه بالتوكيل....
غير القعده بالساعات في التوكيل....

ياريت الناس تعمل صيانتها بره و مايجبوش قطع غيار من التوكيلات...

ما هي خربانه خربانه يبقي عليهم كمان

اكيد عندك حق مصنعية تربيط عفشة و نفخ فلتر هواء ب 200 ج يا بلاش انا شايف انى الى بيروح الصيانات و خصوصا كل 5 الف كم دول بيرموا فلوسهم فى الارض

**Sharky** · 12-01-2009 10:22 AM

م/ طارق إنت من الشخصيات المحترمة و إللى بعزها فى المنتدى

لكن إسمح لى أختلف معاك
و مش حقولك غير كلمة واحدة

لما التوكيلات تهتم بالعميل و تححق رغباته و تحترم تعاقدتها معاه و ماتعلش عليه السعر بعد الحجز و لما العملات تقل يقللوا الأسعار و لما العملات تزيد يزودا لأسعار على الشحنات الجديدة مش القديمة
ييبقى العميل ساعها يهتم بالتوكيل و مايوصولوش للخسارة

لكن من الاخر دى فرصة المستهلك يعوض كل الإستفزازات و التحكم من وكلاء للمستهلكين و إستغلال طلباتهم دون الإهتمام بالحفاظ عليهم فى الأوقات دى

**zizirokka** · 12-01-2009 10:41 AM

انا بصراحة و بعد قراءة كل الموضوع من اوله لأخره شايف حاجة مختلفة خالص

ميتهيأليش ان لو حد معاه قرشين حلوين و في قدرته انه يجيب عربية في الوقت الحالي انه هيسمع كلام خليها تصدي او خلليها تخلل ... هوة الدنيا ايه غير عربية جديدة و خاصة ان احنا شعب محدث نعمة و العربية دي بالنسبة للغالبية العظمة من شعبنا العزيز ترف قد لا يحلم به و رحمة كبيرة من عناء المواصلات الغير آدمية
و حتى و لو عندك عربية متواضعة تسعينية مثلا و بدأت تفتح بقها تبعا لقانون الاهلاك و الاستهلاك و عندك القدرة على تغييرها فمش هتعمل ده علشان تعند في التوكيلات او التجار ولا علشان موضوع في نايل موتورز بجلالة قدره

الموضوع ببساطة ان كل واحد عنده قرشين و عايز ينام عليهم علشان حالة الخوف اللي عند الناس من الازمة الحالية و ده حال العالم كله مش مصر بس و عايز يلاقي لنفسه حجة علشان ميجددش او يجيب اصلا و كل واحد حر و من حكم في ماله فما ظلم

لكن اللي يضحك بصراحة موضوع حملة خلليها تصدي اللي عامل زي الحملات العشوائية بتاعت ال"فيس بوك" لدرجة ان كل ما واحد يتنفس يعملوا له حملة و مرة واحد من زهقه عمل "حملة كفاية حملات على الفيس بوك!!" من خنقته يا عيني

و بعدين همة عملوا حساب موضوع انخفاض الطلب و بالتالي قللوا العرض و فيه بعض التوكيلات عاملة عروض و تخفيضات

لكن ان حد يفتكر ان شوية كلام مكتوب على النت هيخليهم يعملوا تخفيضات 40 او 50 % اسمحولي اقول ان ده تهريج بصراحة...آه بيكسبوا لكن مش بالهبل ده يعني و قوانين الجمارك مش موجودة مثلا ولا حاجة!!

و لو الاسعار انخفضت و اليارس مثلا بقت ب70 الف و الفيرنا ب 40 تفتكر الحكوة هتسكت طبعا لأ....هتخللي الترخيص ب10% او 20% من تمن العربية
ليه؟؟لأن شوارع البلد في الحالة دي هتتسد في ظرف اسبوع من الزحمة الخرافية اللي هتحصل و هتتحول البلد لجراج مفتوح بسبب رخص الاسعار الغير مسبوق ده

و الاستاذ صاحب الموضوع انا هرشت انك شغال في توكيل متسوبيشي متأخدش الموضوع على صدرك قوي كده و خللي قلبك ابيض ده احنا شعب غاوي ظيطة و خلاص...تهشه بعصاية و تلمه بصفارة

و بكرة يجي الصيف و كله بيقى عايز يصيف بعربية جديدة و المصرين العائدين من الخارج و يرجعوا بفلوسهم دراهم و دنانير و الشراء يبقى على ودنه عربيات و عقارات و الذي منه و بكرة تفتكر الكلام ده و تطلع الاسعار و ترجع ريما لعادتها القديمة

**bassem.naguib** · 12-01-2009 10:42 AM

والله انا بحترم كاتب المقال لأقصى درجة بالرغم من أني مليش تعامل معاه في الأساس لا من قريب ولا من بعيد .. وذلك للخدمات التي يقدمها لأعضاء المنتدى والمشاكل التي يذللها في التوكيل .

وبالرغم من ذلك انا مش متعاطف معاه بالمرة في الكلام اللي بيقوله ده خالص .. ولا أكني سمعته من الأساس .. هي حتخرب على دماغ التوكيلات في مصر بس .. ولا على الناس كلها مستهلكين وتجار .. وكمان عاوزين لو حد معاه قرشين أنه يضحي بيهم علشان التجار يقدروا يعيشوا ويصمدوا .. وكمان التجار مين اللي ياما دوقوا الناس مرارة الأسعار الغالية .

انا ردي على حضرتك بالمثل الشعبي القائل "أن جه الطوفان خد ابنك تحت رجليك وأجري" .. والمثل ده مش بقوله بالمحمل السيء .. ولكن بقوله علشان لو التجار كانوا رحموا الناس كان الناس رحموهم .

يا راجل حديك مثلين خلوني انا شخصياً لو عندي نيه للشراء في الفترة الحالية حأجلها وأقعد اتفرج واضحك كمان بدم بارد على التجار والتوكيلات الجشعة في مصر (مش حقد والله ولا بشفي غليلي لا سمح الله) ولكن المسألة عناد في عناد مش اكتر ولا اقل ..

المثل الأول من التوكيل المصري لصانع السيارات الأول في العالم .. يقولك ان الأسعار غليت علشان الين غلي .. ولما الين ينزل .. يقولك علشان الدولار غلي (العلاقة عكسية بين الين والدولار) ..طب يا توكيل يا مجترم (وهو فعلاً محترم في تعامله مع العملاء بغض النظر عن الأسعار) انت بتتعامل بالين ولا بالدولار .. ولا انت مع الرايجه وخلاص .. وبعدين انا المفروض بتعاقد على شراء عربية النهاردة في الساعة الفلانية وبالسعر الفلاني .. المفروض فيه اوردر بالتعاقد مع الشركة الأم بيتم في نفس اللحظة بالمواصفات وبالسعر وبسعر الشحن .. يبقى انا مليش دعوة أن سعر العملة غلي ولا رخص (عليا وعليك) .. تفتكر لو انا اتعاقدت النهاردة والسعر نزل بكرة .. كان التوكيل حيفكر انه يرد ليا الفرق .. هيهات .. ابقى بحلم .. إنما لو العربية اتشحنت وفي البحر خلاص أو في المينا والسعر غلي .. حيقولك السعر غلي عاوزين الفرق .

المثل الثاني من التوكيل المصري لصانع ماركة كورية شهيرة الناس كلها بتقول على عربياته "تغور من وش ...... " .. طلع من فترة في الجرنال عامل لقاء مع صحفي مشهور .. وبيقول بالفم المليان ان العربيات طبقاً لحسابات السوق في ظل الأزمة المالية الحالية المفروض تغلى مش ترخص .. علشان مش عارف ايه وايه ..إلخ . والله العظيم الدم فار في نفوخي من طريقة كلامه اللي فيها قدر كبير من الاستهزاء بعقول الناس .. وكنت عاوز تييييييييييت .. وساعتها قررت لو الماركة دي اتعرضت عليا ببلاش مش واخدها خالص .. مش علشان من وشه وبس .. لا علشان كمان خدمة ما بعد البيع اللي زي الزفت اللي بيقدمها للعملاء بتوعه .. وآل ايه عقليه اقتصادية فذه .. طيب حنشوف إذا كانت السيولة اللي معاه واللي حققها في السنين اللي فاتت على قفا العملاء بالأسعار المغالى فيها في الماركات اللي بيبيعها حتخليه يصمد قد ايه 6 شهور او سنة .. انا على استعداد استنى 5 سنين كمان واشوفه بيغرق بعقليته الفذه دي ..

وانا في الأخر يا جماعة ليا وجه نظر الوكلاء مظلومين فيها .. انا ارتفاع الأسعار لمنتجاتهم مش ناتج عن الجمارك واسعار العملات بس .. ده ناتج برضه عن حاجات تانية المفروض يتفاوضوا عليها علشان يخفضوا الفيزيته بتاعتها علشان الأسعار تنزل شوية .. ومش حقدر افسر اكتر من كده .

وكلمه اخيره لكاتب المقال .. انا المفروض فعلاً يكون قلبي على التاجر المصري واقف جنبه في الأزمة دي .. بس لما يكون هو كمان قلبه عليا وواقف جنبي .. مش كل همه يطلع من جيبي اي فلوس وخلاص .. ومش مهم انا وضعي بالنسبة ليه ايه

**mohamed_karara** · 12-01-2009 11:04 AM

المشاركة الأصلية كتبت بواسطة karim_monir

معلش يا جماعة يمكن تدخلي مايعجبش ناس كتير منكم
لكني معترض
مش معترض على حملتكم او حملة مهندس طارق
لكن على اسلوب الحوار
مفيش مانع اننا نختلف لان اساس المنتديات الحوار والخلاف
لكن بدون الخروج عن الخطوط الاساسية للحوار الراقي
مهندس طارق له وجهة نظر ممكن يكون شايفها بحكم كونة شغال في توكيل من اكبر التوكيلات من مصر
لكن مهندس طارق مالوش علاقة بالمبيعات ولا غيرة
لانه مدير الحاسب الالي يعني جهة فنية خدمية وليس جهة تصنيع او تسويق
عشان كدة مالوش لازمة نتكلم او نجرح في بعض ونذكر اشغال بعض او نذكر بعضنا البعض بما نكره
ارجو الاستمرار ولكن مع زوال حدة الحوار

مش معنى كدا انوا مش هيتاثر التوكيل كلة هياثر بالركود يعنى فى بونس هيقل و ممكن يتلغى

**Samir Elshahawy** · 12-01-2009 11:42 AM

أستاذ طارق ..
أقرأ معي هذا الخبر المنشور علي الفيس بوك منذ 3 أيام لتعرف حقيقة التوكيلات ..

خبر طازه

كلام موظف سابق في وكالة تويوتا بجدة تم تسريحة

وكشف اللعبة كاملة والآن هو في جلسات محاكم مع ممثل عبداللطيف

يقول الجيب الشاص (الاند كروزر) 2009 يكلف الشركة الأم 40 ألف ريال

ويباع على البو جميل بــ 60 ألف ريال وابو جميل يبيعه على الشعب بــ 125 ألف ريال في السعودية ياعني حوالي 200 الف جنية مصري اما العربية دي بتتباع في عندنا في مصر بحوالي 1300000جنية مصري
----------------------------

وأقام ابو جميل عليه شكوى في محاكم جدة وأثناء المحاكمة أثبت فعلاً كلامه

بالفواتير والأدلة وأوراق التخليص الجمركي أن كلامه صحيح

وتم صرف النظر عن القضية والآن ابو جميل مقيم عليه دعوى بأنه

خان الأمانة وأفشى معلومات سرية أثناء عمله في الوكالة تضر المبيعات

يعني حتى وإن نزلت الأسعار 40 % تعتبر كسبانه الشركة وكسبان الوكيل

الجيب يكلف تصنيعه 40 ألف ريال صح يوم كان البترول بــ 60 دولار

والحديد كان سعره أكثر منه الآن صح

الآن خليينا نقول أنه يكلف تصنيعه 40 ألف ريال مع أن البترول بــ 40 دولار

والحديد نازل سعره عالمياً أكثر من 80 %

طيب خلي شركة تويوتا تبيعه بــ 50 ألف ريال على ابو جميل مكسبها يصير 10 آلآف

وأبو جميل خليه يبيعه على الشعب بــ 70 ألف ريال مكسبه 20 ألف ريال
-------------------------------
الآن هل عرفتوا اللعبة الشركات كسبانه والوكلاء كسبانين حتى وأن أنخفضت الأسعار
70 %

والمستهلكين هم من يدفعون المكاسب للأثنين

أصحوا وواصلوا المقاطعة وصدقني ليتنازلولون عن هامشهم الربحي

المرتفع لماذا لأن المستهلك أصبح واعي ومطلع على كل شئ

-

الموضوع: حامل لواء التصدي لحملة خلوها تصدي

LinkBack

أدوات الموضوع

عرض

-

-

-

المواضيع المتشابهه

نكت خلوها تصدي 2009

النتائج الإيجابية لحملة "خلوها تصدي"

خش وقول رايك000اقتراح بعمل لوجو و شعار لحملة خلوها تصدى

خلوها تصدي من أجل غزة و الفلسطينيين

شعارات حمله خلوها تصدي --- -------

الكلمات الدلالية لهذا الموضوع

المفضلات

المفضلات

ضوابط المشاركة