تحذيــر - عقوبــة السيـر عكس الإتجاه حبس

**karimone** · 28-01-2009 08:22 AM

بس تفتكروا سواقين الميكروباص عندهم علم بالموضوع ده

لازم نديهم خبر عشان هما طبعا مش فاضيين يقروا جرايد و الكلام الفاضي ده

**TOOLA** · 28-01-2009 09:37 AM

يا جماعة فعلا كل كلمة اتقالت هنا صح, انا انبارح وزنى الشيطان و بدل ملف ميدان قلت أغير طريقى و دخلت عكس, لقيت لجنة فى اخر الشارع, جيت أرجع لقيت أمين و معاه نقيب جايين يمدوا عليه روحت واقف و نزلت و قولتلهم أنا اسف انا غلطان, خدوا رخصى و كان فيه ضابط رتبة عالية واقف, اعتذرت الأول, راح قلى انتا شكلك طالب (الحمد لله رغم ان عندى 26 سنة) و انا مش هضرك, أنا مفروض اخذك اعمل محضر و تبات للصبح عشان تتعرض على النيابة (انا مكونتش مصدق بس ربنا الهمنى و مرضيتش اعترض على غير العادة), سحبوا الرخص و روحت مكلم ناس أصدقاء (شرطة و نيابة) قللولى الراجل كده عمل معاك واجب, وواحد صاحبى ضابط قلى انا عندى 4 مرميين فى الحجز عشان دخلو عكسى.

ربنا يلطف بأة فى المخالفة (من 1000 الى 3000 ج) :K_crying[1]::K_crying[1]::K_crying[1]::K_crying[1]:

**دينا أبوالعلا** · 28-01-2009 10:26 AM

حمد لله علي سلامتك ربنا ما يكتب علي حد لا الحبس ولا الغرامه
يا جماعه فعلا علي كل ده وفي ناس لسه مش مصدقه ان في حبس وكلام من ده ويقولو ما الطريق فاضي اهو واللي الواحد فهمو انهم بيطلعو من تحت الارض
ربنا يستر علينا وعلي اهالينا

**karimone** · 28-01-2009 11:25 AM

الحمد لله انها جت علي قد الغرامه بس و مروحتش التخشيبه

بس ماتعملهاش تاني....

**momo10000** · 28-01-2009 11:41 AM

السير المعاكس اكبر غلط ولا يختلف اثنين على كده ..لكن منتها الظلم تكون العقوبه الحبس و3 سنين كمان ..يعني يرضي ربنا ان واحد ماشي عكس يدخل السجن ويتساوى بالمغتصب والقاتل والسارق وبقية المجرمين....ده عقوبه السرقه بتبدي من 6 شهور وناس بتقتل وتاخد 5سنين ......فيه طرق ثانيه لعقاب السير المخالف مثل سحب الرخص لمدة سنه او 3سنين بدل من السجن....او دفع الغرامه ...او ايقاف الرخصه الى الابد ..لكن شيء لايصدقه عقل ان الواحد يتحبس علشان سير مخالف ...انا الحمد لله مش من هواة السير المخالف لكن الامر لايسلم والانسان مصيره بيخطيء وخطأ واحد ممكن يودي الواحد في داهيه.وربنا يحفظنا ويحمينا ويبعد عننا ولاد ال

الله يفتح عليك يا باشا ...

مش الاخ اللي بيقول اعدام ...

يبقي الكرنفالات اللي بيعملوها بتوع التاكاتك والميكروباصات يتقال عليها ايه ؟؟؟؟

يبقي اما نطبق القانون في مكان ... ونغمض عينينا علية في المكان اللي قصادة تماما..... يبقي اية ...

فوضي .... فوضي... فوضي ... ويقولك قانون ...

**MMamdouh** · 28-01-2009 12:54 PM

سبحان الله

تمشى عكس تتحبس و تدفع غرامة

تغرق اكتر من 1000 انسان تاخد براءة

MMamdouh

**karimone** · 28-01-2009 02:14 PM

المشاركة الأصلية كتبت بواسطة MMamdouh

سبحان الله

تمشى عكس تتحبس و تدفع غرامة

تغرق اكتر من 1000 انسان تاخد براءة

MMamdouh

علشان معاك حصانه و معاك مليارات في البنك

**M.Osman** · 28-01-2009 03:20 PM

المشاركة الأصلية كتبت بواسطة karimone

علشان معاك حصانه و معاك مليارات في البنك

لأ ... عشان انت فى مصر !!

**Anxs111** · 28-01-2009 04:03 PM

ربنا يلطف ببلدنا والله أنا مفاهم الناس عايزة إيه . عملو قانون سهل واضح وبيطبق في جميع أنحاء العالم لحماية الناس من إستهتار البعض و مافيهوش كوسة (الرجل كلم معارفه ومحدش عرف يسلكو ) برضه مش عجب و دخلنا في حوار غريب بتاع واحد موت ١٠٠٠ وو-....و.....

هما الناس بالكيلو يعني واحد موت ألف إذاً لو واحد بعمل حاجة ممكن تموت أو تعور واحد أو إثنين مش مشكلة . ده بدل مانفكر اللي بيمشي معاكس ده غلطان و بيعرض حياة الأبرياء للخطر عشان مبيعرفش يحترم الشارع اللي ليه حرمته (حتى لو من ناحية الدين ) .

طب أيه الحل ممكن حد يقول بدل ما يودينا في قصص لا تفيد في هذا الموضوع بالذات .

يا اصدقائي الشارع مكان عايز إلتزام وإحترام .