الموضوع: ليه دايما الحاره اليمين هيه اللي فاضيه ؟!!

بس هو في نقطه برده...دلوقتي لا الحاره اليمين فاضيه ولا الشمال فاضيه
ساعات الرصيف بيكون فاضي بس ده برده مش دايماً ساعات بيكون زحمه

اليمين ساعات بيبقى فيه عربيات واقفة او طوب مكان العربية اللي كانت واقفة او ناس عايزة تركب اتوبيس او ميكروباص واخدين حارة وييجي صفين تلاتة وقفوا يركبوا الزباين
ساعات بيبقى الحارة دي مكسرة وفيها بلاعات صرف مياه الأمطار ( )
وبعدين سؤال ؟ انت بتبقى ماشي على كام وقدامك واحد ماشي على الشمال ابطأ منك؟ على سرعة الطريق ولا أزيد منها؟

و اية المشكلة يعني لما تكون الحارة اليمين فاضية فى السيرك اللى إحنا فيه دا .... ؟؟؟؟؟

اصل همشي يمين ازاي و البشاوات جايين عكس اتجاه + كاررو + توكتوك ..+ شوية ممكن نلاقى باقى السيرك يعنى ..

هو انا زماااااااااان زمان يعني اول ماتعملت سواقة اللي علمني قاللي امسكي يمين عشان محدش يقرفك :k48::k48:.

انا بقي مطيعة وبسمع الكلام طبعا عملت بالنصيحة دي ومسكت يمين فعلا وسوقت لوحدي اول مرة تخيلوا روحت مشوار مسافته كلها لا تتعدي ال 12 كيلو في قد ايه؟
.
.
.
.
.
.
وصلت في اكتر من ساعتين ونص (هو طبعا الطريق اصلا زحمة بس ممكن يتاخد في ساعة مثلا بالزحمة) بس الاسباب الاخري هاقولهالكوا حالا

اولاً: كل شوية الاقي ميكروباص ركن قدامي ونقل سرعته من 60 الي صفر فجأة وبدون سابق انذار عشان ينزل ناس أويطلع ناس
او تاكسي وقف لواحد يدوب شافه بيهرش في دماغه افتكره بيشاورله

وبرده انا فضلت مؤدبة وماسكة يمين ومكنش عندي مبدأ اعدي العربية اللي قدامي ده خالص عييييب جدا اعمل كده (زمااااااان زمان يعني )
وكنت بقول مهما العربية اللي قدامي وقفت افضل مستنياها مستجريش حتى اديها كلكس .
ثانياً: تلاقي إذ فجاة عربية عطلانة قدامك أو اتوبيس قرر يعطل فجأة برده قدامك وهوووووووب مارشدير لورا عشان اعرف اعديه طبعا.
ثالثاً بقي ودي النكتة بجد: لاقيت ميكروباص وقف قدامي استنيت شوية قلت هاينزل الناس ويتحرك وبرده فضلت مؤدبة وساكتة
طول اكتر برده انا واقفة زي مانا واقول ان شاء الله هايتحرك دلوقتي
وهنا كانت الصدمة لاقيت عربية معدية شمالي بيقولي عديه ياانسة دي وواقف مش هايتحرك ليه بقي اصله ده موقفهم هنا ابص الاقي قدامه كام ميكروباص وواقفين هما كمان سعاتها ادركت الحقيقة المرة وطبعا الموقف ده من اختراع السادة سائقي الميكروباص مش موقف رسمي يعني .

ومن ساعتها وانا على طول بمسك شمال بسرعتي بقي مش بسرعتي مش مهم
بس مكنتش بتمختر يعني في الشمال كنت بحاول امشي بسرعة بعد كده ولو حد عاوز يعديني لو الطريق يسمح بدي اشارة يمين وأعديه (بس مرة عملتها مع واحد ومرضيش يعدي بعد ماوسعتله ) رجعت مسكت شمال تاني وقلتله اخبط دماغك في الحيط (في سري طبعا ) .
في صلاح سالم كنت بمشي في النص الا لو هاخد يوتيرن شمال مثلا أو مش هاحتاج ادخل اي يمين خالص لفترة طويلة.
اللي بستغربله بقي ان الاتوبييييييييييييس بيحاول جاهدا يمسك شمال رغم انه بعد نص كيلو بالضبط هايقف في محطته عشان ينزل ناس ويركب ناس تانية بس تقول ايه بقي في قلة العقل ومرض الالتصاق بالحارة اليسري يعني هي جت عليه هو يعني مالنقل والميكروباظ بيمسكوا شمال اشمعني هو

هي فعلا الحالة في مصر سمك لبن تمر هندي .