الموضوع: استفسارات عن مواتير المياه

المشاركة الأصلية كتبت بواسطة sab3aawy

من واقع خبرتى مع مواتير المياه فان كل شقة يلزم لها نصف حصان من قدرة موتور المياه مع مراعاه عامل التشتت، يعنى لو شقة واحدة هات موتور نص حصان، لو شقتين هات موتور حصان، لو تلات شقق هات 1.5 حصان، لكن لو اربع او خمس شقق ممكن برضه تجيب 1.5 حصان لان مش كل الشقق هتفتح المية فى وقت واحد، الحسبة تكون فى حدود عدد الشقق مضروبا فى 60% عامل تشتت مضوربا فى نصف حصان،
الحاجة التانية اوعى اوعى اوعى تركب موتور من غير اوتوماتيك وبالونة، يبقى كدة انت مستغنى عنه لأن عاجلا او آجلا ستأتى تلك اللحظة التى يشغله فيها احدهم وينساه شغال وهى ديتها ساعتين تلاتة وتلاقى الحاكم الميكانيكى بتاعه mechanical seal باظ والمتور جاب مية ، ما نسميه شعبيا باسم اوتوماتيك هو ببساطة وحدة بسيطة اسمها (pressure switch) او مفتاح ضغط، يشبه فى وظيفته حساس الزيت اللى فى موتور اى عربية اللى بيخلى لمبة الزيت تطفى لما ضغط الزيت يوصل للقدر المناسب، وظيفة مفتاح الضغط ده ان الموتور يشتغل لوحده لما الضغط فى الخط ينزل الى حد معين ويفصل لوحده لما الضغط يعلا الى حد معين ، وفيه جواه صامولتين واحدة بيتظبط منها ضغط الفصل والتانية بيتظبط منها ضغط التشغيل، اما البالونة فوظيفتها انها تحافظ على الضغط المرتفع لفترة علشان الموتور لما يفصل ما يشتغلش تانى غير بعد فترة زمنية كافية لانه يبرد ويريح، وكذلك لما يقوم ميفصلش بسرعة، يعنى اللى بيحصل لو البالونة اتخرمت والمتور شغال على الاتوماتيك انك بتلاقىالمتور بيشتغل ويفصل بمعدل 100 مرة فى الدقيقة الواحدة(الرقم واقعى وليس فيه اى مبالغة) لحد ما الموتور يتحرق ،والبالونة مكونة من وعاء معدنى بداخله بالونة مطاط، البالونة المطاط هى اللى بتتملى مية من الموتور، اما المسافة الفاصلة بينها وبنين الوعاءس المعدنى فيتم نفخها بالهواء على ضغط 2 بار(28 رطل على البوصة المربعة-مثل كاتش السيارات تماما) وذلك من خلال بلف نفخ موجود فى اعلى الوعاء المعدنى يشبه تماما بلف نفخ كاوتش السيارات ويتم نفخها اما عند بتاع الكاوتش او بمنفاخ يدوى او كهربى،وطبعا لتركيب اوتوماتيك وبالونة على الموتور لازم يركب معاهم عداد ضغط pressure gauge علشان تضبط عليه الأوتوماتيك، والبالونة والعداد والأتوماتيك جميعهم بيركبوا على وصلة واحدة تباع خصيصا لهذا الغرض، من المعلومات الخاطئة الشائعة ان البالونة والعداد والأوتوماتيك لابد من تركيبهم على الموتور مباشرة، هذة معلومة غير حقيقية لان البالونة والأوتوماتيك والعداد يمكن تركيبهم على اى مكان فى الخط بعد مخرج الموتور، انا شخصيا مركب الموتور فى الدور الأرضى فى منور العمارة ولكن مجموعة الأتوماتيك والبالونة والعداد مركبها عندى فى مدخل المياه فى حمام البيت فى الدور الخامس، وذلك لسهولة الصيانة ولسهولة تعديل وضع الأوتوماتيك ليناسب سحب المياه فى الأيام المختلفة(يعنى مثلا ظبطة طول الأسبوع ممكن تخلى الموتور يفضل ينحر ومايفصلش يوم الجمعة قبل الصلاه لأن كل شعب مصر بيكون فاتح الحنفيات فى تلك اللحظة وبالتالى سحب المياه ضعيف جدا ولذلك ممكن اقلل ضغط الفصل شوية يوم الجمعة وارجع اعدله بعد كدة فى دقيقة واحدة لأن الاوتوماتيك امام عينى) كما ان وجود الأتوماتيك فى البيت بيتيح ليا تشغيل الموتور مانيوال او اوتوماتيك(يعنى بشكل متصل او مع تغير ضغط المياه)، كل الفكرة انك لما تظبط ضغط الفصل والتشغيل فى الأوتوماتيك لازم تقللهم بمقدار 1 بار لكل ثلاثة ادوار ارتفاع بين النقطة اللى فيها الموتور والنقطة اللى فيها الأوتوماتيك، يعنى مثلا انا ظابط ضغط التشغيل عندى على 1 بار وضغط الفصل على 2.5 بار فى النقطة اللى الأوتوماتيك راكب فيها فى الدور الخامس، ده معناه ان الموتور بيشتغل فعليا عند 2.5 بار و يفصل عند 4 بار فى نقطة تركيبه فى الدور الأرضى لأن المية بيقل ضغطها 1 بار كل ما تطلع 10 أمتار ارتفاع (البار هو وحدة قياس الضغط وتساوى واحد ضغط جوى او وزن عمود من الزئبق ارتفاعه 76 سم او وزن عمود من الماء ارتفاعه 10متر و 30 سم)

لتركيب موتور لازم تركب صمام عدم رجوع قبل مدخل المتور وصمام عدم رجوع بعد مخرج المتور (اللى بيسموه شكبلف او سكس بلف) علشان يفضل الضغط بعد المتور ثابت لضبط تشغيل الأوتوماتيك ومحبس بلية قبل الموتور وآخر بعد المتور ، وكذلك خط بديل by passيتيح فك الموتور للصيانة فى اى وقت دون الحاجة لقطع المياه عن المكان ويكون الخط البديل به محبس عدم رجوع ومحبس بلية، يبقى لنا انه فى حالة شرائك لموتور غالى فلابد من شراء وحدة حماية ضد انقطاع المياه تمنع تشغيل الموتور بدون ماء حيث ان تشغيل الموتور والمياه مقطوعة كفيل بتدمير الحاكم الميكانيكى فى دقائق

جميع هذة المكونات وقطع غيارها موجودة فى شارع نجيب الريحانى المتفرع من شارع الجمهورية بجوار محطة مترو العتبة واسعارها بسيطة جدا، يعنى مثلا البالونة تمنها فى حدود 60 جنيه، غيار بالونة مطاطى 15 جنيه، اوتوماتيك متور ايطالى 25 جنيه، عداد ضغط 15 جنيه، وصلة اوتوماتيك موتور ايطالى 20 جنيه، بلف عدم رجوع 20 جنيه، محبس بلية 10 جنيه، حاكم ميكانيكى(ميكانيكال سيل) لموتور 1 حصان 15 جنيه ، موتور 1/2 حصان صينى 90 جنيه، موتور 1/2 حصان ايطالى 400 جنيه، موتور 1 حصان صينى من أول 180 جنيه ، موتور 1 حصان اتحاد اوروبى 300 جنيه، موتور 1 حصان ايطالى من أول 800 جنيه، وهكذا

حالة شرائك لموتور غالى فلابد من شراء وحدة حماية ضد انقطاع المياه

============================================
اولا اشكركم على المواضيع الجميلة .. اللي نفعتني جدا ف الشراء والتركيب وبعدتني عن صنايعية فتايين بلا اي علم !!!


ما هي وحدة الحماية ضد انقطاع الماء ومن أين شراؤها و كم سعرها وكيف يتم تركيبها ؟؟؟؟؟ ( سؤال هام جدا حيث ان الموتور الموجود غالي) .. ايه فكرتها وهل هي حماية 100 بالمائة ام لها ايضا نسبة خطأ؟

ما هو "الحاكم الميكانيكي" وكيف يتم تركيبه ومن اين شراؤه وسعره؟

قرأت في موضوع آخر عن "فلتر مصمت" يوضع قبل الموتور لتقليل الشوائب واطالة عمره .. هل من افادة؟

الموتور عندي واحد ونصف حصان والسباك ركبه لكنه ابدى امتعاضه ان مدخل اموتور بوصة او بوصة ونصف ( مش فاكر) بينما الماسورة من العداد ثلاث ارباع بوصة .. وان ده هايخنق الموتور ويخلي يشتغل اقل من طاقته ( كلام غير علمي كده ) وانا عايز اعرف مدى دقة الكلام ده علميا

===============
و الف شكر على الاهتمام

http://www.nilemotors.net/Nile/image...elloogreen.gif

اريد ان اسال عن وحدة الحماية للموتور فى حالة انقطاع المياة اشتريها منين وبكام وان كانت مفيدة ام لا