الموضوع: بفضل الله استلمت الجراند تريوس 7 راكب. سؤال بخصوص تركيب الانذار

السلام عليكم و رحمة الله و بركاتة

الحمد لله استلمت الجراند تريوس وكيل الاثنين اللي فات ، و تاني يوم خلصت الرخصة بفضل الله.

في سؤال دائما يطرحه كل من يريد شراء هذه العربيه عن الفروق بين الوكيل و الخليجي و كنت قد ذكرت ذلك في مشاركه سابقه و لكن سوف اذكره مره اخرى للافاده


1- يوجد ABS+EBD.
2- يوجد Airbags 2 للراكب و السائق, أعتقد بالنسبه للخليجي يوجد للسائق فقط.
3- يوجد جنوط 16.
4- يوجد spoiler.
5- زجاج الابواب الخلفية فاميه.
6- يوجد hard cover للاستبن.
7- يوجد مساحه للزجاج الخلفي.
8- الكاسيت في الوكيل غير مدمج في التابلوه Sony CD mp3 wma, cassette tapes, and Video CD, لكنه جيد و شكله الصراحه شيك جدا في التابلوه.

و كما ذكرت البعض يعتبر هذه الفروق ثانويه و البعض الاخر يعتبرها أساسيه ، لولا أختلاف الاذواق لبارت السلع

بخصوص العربيه، الحمد لله انا شايفها مناسبه جدا لاحتياجاتي، السبعه راكب كان شرط أساسي في أختياري للعربيه و هي دي العربيه الوحيده - طبعا في حدود المبلغ اللي معايا- المقبوله بالنسبة الي ( شكل جميل جدا ، مساحه داخليه جيده، أرتفاع رائع عن الارض -أنسى المطبات- و كمان لما الطريق بيكون واقف بأقدر أشوف أيه اللي مخلي الطريق و اقف قدام ).

ملاحظاتي على العربيه:

أولا بالنسبه للسحب انا شايف انه مش جبار لكن معقول و بصراحه مكنتش متوقع انه يكون جامد قوي و بحس شويه بالنقلات و لكن دي اول مره مره اسوق اتوماتيك و يمكن ده يكون طبيعي.

ثانيا العفشه ناشفه شويه، انا مش فارقه معايا قوي، بس يا عيني اللي قاعد في الكنبه اللي ورا بحس انه بيتمرجح لما بنعدي على حته مكسره شويه. يارب الموضوع ده يخف بعدين ، الاخوه في المنتدى قالولي أن العفشه بتنعم شويه بعد التليين. يارب

ثالثا عربيه بالسعر ده 155 الف جنيه، ازاي المفتاح بتاعها يكون عادي قوي كده ، كنت الصراحه متوقع مفتاح بريموت على الاقل، ده في دلوقتي مفاتيح طي و كمان كروت ذكيه.

بصفه عامه العربيه جميله جدا و مناسبه لمن يبحث عن عربيه 7 راكب و في نفس الوقت شيك و برستيج و عمليه.

عندي سؤال جزاكم الله خيرا، بمناسبه المفتاح حد يعرف مكان ممتاز لعمل الانذار و وحدات الرفع و ايه افضل نوع في أجهزه الانذار و بكام. ولا أحسن الوكيل و برضوا ياريت اللي عمل الموضوع ده عند الوكيل ياريت يتفضل علينا و يفدنا بتفاصيل الموضوع ( نوع الجهاز و بكام و هل عندهم وحدات رفع و بكام).

معلش طولت عليكم شويه و منتظر مشاركتكم.

ماشاء الله
ربنا يعطيك خيرها ويكفي عنك شرها ان شاء الله
ماشاء الله كمالياتها جميلة جدا بصراحه

المشاركة الأصلية كتبت بواسطة أبو عبدالله

ماشاء الله
ربنا يعطيك خيرها ويكفي عنك شرها ان شاء الله
ماشاء الله كمالياتها جميلة جدا بصراحه

جزاك الله خيرا ، ربنا يكرمك و الف شكر على مرورك الكريم.

المشاركة الأصلية كتبت بواسطة compuland

ربنا يبارك فيها ويعطيك خيرها ويكفيك شرها ان شاء الله
بالنسبه لموضوع المفتاح انا فعلا استغربت قوى لما قلت انه عادى
حاجة مش تمام صراحة
بالنسبه لموضوع العفشه
يابشمهندس ابراهيم ممكن تقولى حضرتك كان معاك عربية ايه قبل كده
يعنى انت بتقارن عفشتها مع عربيه ايه.
وياريت لو تركب الجيب شيروكى وتقولى رايك
مبدأيا كل عربيات الدفع الرباعى هتلاقيها ناشفة فى العفشه
اقرب شويه لعربيات النص نقل
لانها عربيات خدمة شاقه
وشكرا
بالمناسبه لونها ايه
وجبتها كاش ولا قسط

جزاك الله خيرا ، ربنا يكرمك و الف شكر على مرورك الكريم.

أنا الصراحه كان معايا عربيه لانوس عفشتها بردوا ناشفه ، بس انا بقارنها بعربيه والدي بيجو 307 ستيشن.

لون العربيه ذهبي (شامبين) و ربنا كرمني و خلصت كاش، انا كنت ناوي أقسط ، بس في اخر لحظه ، الحاج والدي سلفني الباقي و الحمد لله هاسدد له بدون فوائد

بالنسبة لموضوع الانذار او اي حاجة في الكهرباء حسب كلامهم انك لو ركبتها بره التوكيل ده هيطلع كهربة العربية بالكامل بره الضمان، وده في حد ذاته شيء استفزازي انا معايا سيريون طبعا شكل المفتاح كان وحش جدا كانه مفتاح موتوسيكل ركبت الانذار في التوكيل ب 400 جنيه وعندهم وحدات رفع الزجاج ب 350 جنيه بس للاسف اللي زعلني اني امبارح كنت في محل كماليات سيارات ولقيت نفس الانذار اللي ركبهولي واللي قالولي عليه انه دايهاتسو ومكوناته ياباني وكلام كتير جدا لقيته ب 200 جنيه ولسه ما اتكلمتش مع الراجل. للاسف انا شايف ان ده نقطة استغلال كبيره قوي في التوكيل.

المشاركة الأصلية كتبت بواسطة Mohammed Moustafa

بالنسبة لموضوع الانذار او اي حاجة في الكهرباء حسب كلامهم انك لو ركبتها بره التوكيل ده هيطلع كهربة العربية بالكامل بره الضمان، وده في حد ذاته شيء استفزازي انا معايا سيريون طبعا شكل المفتاح كان وحش جدا كانه مفتاح موتوسيكل ركبت الانذار في التوكيل ب 400 جنيه وعندهم وحدات رفع الزجاج ب 350 جنيه بس للاسف اللي زعلني اني امبارح كنت في محل كماليات سيارات ولقيت نفس الانذار اللي ركبهولي واللي قالولي عليه انه دايهاتسو ومكوناته ياباني وكلام كتير جدا لقيته ب 200 جنيه ولسه ما اتكلمتش مع الراجل. للاسف انا شايف ان ده نقطة استغلال كبيره قوي في التوكيل.

محمد باشا، الصراحه دي حركه مش لطيفه من التوكيل، أنا كنت فاكر ان الانذار اللي هايتركب في التوكيل حاجه جامده و يكون عليه العلامه بتاعت دايهاتسو خاصه انه غالي، انما انت بتقول انك شفته عند محل كماليات ب 200 جنيه يعني حتى محصلش الانذار ماركه WOLF و بالنسبه لوحدات الرفع أنا لسه شايفها في محل في ميدان الجامع ب 60 جنيه !!!!!!، الصراحه فرق السعر مش منطقي خالص، يعني انا شايف بما ان الوكيل بيفرض علينا ان نركب الانذار ووحدات الرفع عنده ، يبقى المفروض يوفرها باسعار متناسبه مع الموجود في السوق. و الف شكر على مرورك الكريم.

المشاركة الأصلية كتبت بواسطة osama_alam

التوكيل بيغالي في سعر تركيب الكماليات اوي (انذار - فرش ...)

عندك حق يا أسامه باشا و المشكله ان يكون فعلا ذي ما محمد باشا افاد في مشاركته ان الوكيل بيخرج الكهربا كلها من الضمان اذا ركبنا الانذار من بره.

بصراحه بافكر اركب الانذار و وحدات الرفع في الوكيل علشان هما اكتر ناس بيفهموا في العربيه و الواحد مش عايز يعمل مشاكل في العربيه من اولها و ربنا يسترها. بس أسعار الوكيل مبالغ فيها مش عارف اعمل ايه

الف شكر على مرورك الكريم

الف مبروك وربنا يكفيك شرها
وبالنسبة للريموت هنا في دبي
التوكيل مش بيركب اصلا ريموت كنترول
لكن عندما اصرينا فيه واحد ركبه لنا بسعر مضاعف ثلاث مرات عن السعر بالخارج
واكتشفنا انه هو هو نفس الانذار اللي موجود في كل محلات زينة السيارات اللي هو صيني
بالنسبة لوحدات الرفع مش فاهم يعني ايه رفع قصدك رفع زجاج الشبابيك هو الزجاج بتاع السيارة يدوي ولا ايه
ياريت توضح لينا النقطة دي
بالنسبة للعفشة ده طبيعي وده مطمني انها بتاعة شغل وشقى لكن السحب هيتحسن جدا بعد ال 3000 كيلو الأولى ده اللي حصل معايا
بالنسبة للخليج يوجد بها ايضا اثنين اير باج