الموضوع: بفضل الله استلمت الجراند تريوس 7 راكب. سؤال بخصوص تركيب الانذار

المشاركة الأصلية كتبت بواسطة karimone

الف مبروك... ربنا يباركلك في العربيه و يديك خيرها و يكفييك شرها...

يا ريت برده تقولنا تقييمك للتوكيل بعد ما تعمل الصيانه... و تقولنا اتكلفت كام و ايه اللي تم فيها...

معلش هاتعبك...

ربنا يبارك فيك، جزاك الله خيرا و الف شكر على مرورك الكريم.

ان شاء الله هاروح بكره الصبح التوكيل ، بس دي صيانة الالف، معتقدش انهم هايعملوا حاجه غير مثلا تربيط العفشه .... و أعتقد انها مجانيه.

هي في مشكله بسيطه عندي في أن اللمبه بتاعت تحذير نقص الوقود مابتنورش على الرغم انها كانت بتنور أول يوم استلمت فيه العربيه و كمان الصوت اللي بيطلع أول مابتشغل العربيه و انت مش رابط الحزام برده ملوش اثر، ان شاء الله هابلغ المشكله دي للمهندس و أعتقد انها بسيطه، يمكن فيوز اتخلع أو اتحرك من مكانه.

في عندي حاجه كمان بس يمكن تكون طبيعيه، بعض الاحيان لما أفرمل بسمع سوط تخبيط !!! يمكن ده يكون ال ABS الله أعلم، ان شاء الله هاسألهم برده عليه.

و يا باشا مافيش تعب و لا حاجه، ان شاء الله أول مارجع من التوكيل هاقولوكوا كل التفاصيل و انطباعي عن كل حاجه سواء كانت ايجابيه أو سلبيه .... يارب مايكونش في سلبيات تذكر .

بسم الله الرحمن الرحيم ....

رحت امبارح للتوكيل على حسب الاتفاق المسبق معاهم...

ان شاء الله هاقولكم على التفاصيل بس معلش عندي استفسارين مهمين لاصحاب الجراند تريوس مش التريوس ال 5 راكب علشان واضح ان في اختلافات مكنتش واخد بالي منها و كنت عايز اتأكد.

1- هل يوجد لمبه صفراء تدل على نقص الوقود ام فقط علامة البنزينه و الشرطه الاخيره في مؤشر الوقود تظهر و تختفي تكرارا.

2- هل يوجد صوت تحذير عند عدم ارتداء حزام الامان عند تشغيل السيارة.

اللمبه و صوت عدم ارتداء الحزام موجودين في التريوس و لا اعلم سبب عدم و جودهم بالجراند !!!! بغض النظر عن أهميتهم.

بالنسبه لتفاصيل صيانه الالف و تركيب الانذار ووحدة الرفع كالتالي:

أنا اتصلت يوم الاربعاء اللي فات علشان احجز يوم الاحد و الحمد لله لم يخذلوني و سألوني أذا كان عندي أي استفسارات أو طلبات و قلتلهم على ملاحظاتي و اني عايز اركب انذار و وحدة رفع و اتفقت ان الميعاد يكون الساعه 11 الصبح، الصراحه ال call center بتاعهم جيد جدا.

كنت أول مره أروح العبور و كنت قلقان ان يكون في توهان علشان كده نزلت من البيت بدري شويه، المهم أول ما دخلت نفق مدينة العبور فوجئت بحاجه ظريفه جدا، في علامات ارشاديه لدايهاتسو من أول النفق لغاية مركز الصيانه

المهم وصلت المركز الساعه 10:45 صباحا وبلغتهم اني موجود بس ركنت العربيه بره علشان المركز كان زحمه جدا.

بعد نص ساعه لقيت الانسه اللي بلغتها اني متواجد بتعتذر جدا عن التأخير و انها أسفه جدا كأن حد كلمها ووصاها عليا بصراحه كنت متفاجئ لان ده مش سلوك المصريين احنا متعوديين عادي يعني ان لو حد اخد ميعاد في أي حته في البلد دي ان في هامش تاخير نص ساعه أو ساعه في احسن الحالات، المهم سلمت الورق لمهندس الاستقبال اللي كان محترم جدا في تعاملاته و خرج معايا بره المركز علشان يستلم العربيه علشان الزحمه و ده كان فيه مرونه منه انو لم ينتظر دخول العربيه للمركز و استلمها مني بره علشان نكسب وقت، وده كان الساعه 11:30 و قالي ان استلام العربيه الساعه 02:30.

طلعت بعد كده لمكان انتظار العملاء فوق و هي حجرة مساحتها معقوله تطل على الورش علشان اللي عايز يطمئن على عربيته،و يوجد تليفزيون جيد جدا و WiFi في المركز (موبيلي بيدعم هذه الخاصيه) لكن في تأمين يعني لازم اعرف كلمه سر للدخول على شبكة الانترنت الصراحه لم أسأل عن كيفيه الحصول على كلمة السر بس أعتقد أنهم مش هايعترضوا على أستخدام الانترنت، ان شاء الله المره الجايه هاسئلهم، كمان في مشروبات سخنه و بارده و شيبسي مجانا، ايضا في مكان مخصص للتدخين علشان محدش يتضايق و مكان للعب الاطفال.

المهم أنا كنت مراقب دخول العربيات علشان اعرف عربيتي هاتدخل امتى و لاقتهم دخلوها حوالي الساعه 12:10، يعني بعد حوالي 40 دقيقه من استلامهم للعربيه و في حوالي 15 دقيقه كانو خلصوا الصيانه ( تربيط العفشه و ذودوا مياه وبس ... ده اللي انا لاحظتوا).

المهم ركنوا العربيه علشان في استراحه من 12:30 الى 01:30 ظهرا علشان صلاة الظهر، نزلت الحمد لله علشان أصلي الظهر في الورش ... أعتقد ان من الافضل تخصيص مكان محدد للصلاه بره الورش - في مكان أيضا للصلاه و هو ركن الاطفال و لكنه صغير و أعتقد ان صوت التلفزيون هايكون واضح جدا بالداخل.

المهم بدأوا مره ثانيه يشتغلوا في العربيه (تركيب الانذار و وحدة الرفع) بعد الساعه 02:00 !! طبعا الصراحه علشان كانت سعادتي تكتمل كنت بفضل انهم يبدأو فيها على طول بعد الاستراحه يعني 01:30 علشان يخلصوها قريب من الميعاد اللي أخدتوا من مهندس الاستقبال خاصة ان في 40 دقيقه تأخير في الاول من ساعة ماسلمت العربيه.

المهم أنا شفت العربيه بتخرج من الورش الساعه 03:30 فانزلت من فوق علشان استلم و اروح بس واضح ان بسبب الزحمه المهندس اتأخر شويه و جالي 03:40 دقيقه، سألتوا على الملاحظات (لمبة الوقود , صوت تحزير عدم ارتداء الحزام) علشان انا خرجت بره و قعدت في العربيه و لاحظت ان لا جديد، علشان كده المهندس دخلها الورش عاملوا فحص تاني و قالي ان العربيه مفهاش مشكله و شاف عربيه تانيه جراند تيريوس و قالي انها ذي عربيتي بالظبط ... انا الصراحه حسيت اني تهت و قلت يمكن اكون غلطان و ان الجراند مفهاش الحجات دي، علشان كده دول كانو أول حاجه أسأل عنها في بداية الموضوع.

المهم المهندس جربلي الانذار و و حدة الرفع و شغالين تمام، و اعتذر المهندس على التاخير و الانسه التي استقبلتني اعتذرت مره اخرى جدا على التأخير و خرجت من المركز في تمام الساعه الرابعه عصرا

تقييمي العام أن المركز جيد و الاستقبال رائع لكن المشكله الوحيده في التأخير المفروض أستلم العربيه الساعه 02:30 و لكني أستلمتها الساعه 03:40 (هو أن استلمتها الساعه 04:00 بس هافترض ان غلطتي انها دخلت مره تانيه علشان التاكيد على ملاحظاتي بخصوص لمبة الوقود و صوت تحزير عدم ارتداء الحزام )، أعتقد ان مشكلة التأخير البسيطه هاتتحل ان شاء الله لما مركز ابو رواش يفتتح.

ملحوظه: ثمن الانذار 395 و وحدة الرفع 335 أعتقد ان السعر مبالغ فيه و لكن علشان أتجنب حدوث أي مشاكل في العربيه و ايضا علشان الكهربا متخرجش من الضمان.

أسف على الاطاله و يارب أكون وفقت في عرض تفاصيل هذه التجربه.

مبروك يا باشا على الانذار ووحدات الرفع ويا ترى هل اخدت الانذار اللي بريموت ولا بمفتاح

المشاركة الأصلية كتبت بواسطة Mohammed Moustafa

مبروك يا باشا على الانذار ووحدات الرفع ويا ترى هل اخدت الانذار اللي بريموت ولا بمفتاح

ربنا يبارك فيك يا باشا، أخدت الانذار اللي بريموت، مهندس الاستقبال قالي مش هاينفع اركبلك اللي بمفتاح علشان الامبليزر هو الصراحه شكل اللي بمفتاح أفضل و علامة الدايهاتسو أوضح و أشيك، الريموت اللي معايا عليه برضوا العلامه بس من الخلف و شكلها هتتمسح قريب علشان مطبوعه على الريموت.