حالة من اليأس تعم أعضاء المنتدى لعدم نزول الأسعار

**Demirell** · 11-02-2009 12:57 AM

المشاركة الأصلية كتبت بواسطة karaktar

المغذى ان انا استفز الاعضاء اللى نايمين وابتدو ينخو من الحمله من خلال عنوان الموضوع عشان يردو عليا بعكس الكلام ويقولو لأ طبعاً الحملة ناجحة

مين دول اللي نايمين وابتدوا ينخوا؟ يا راجل حرام عليك! وبعدين حضرتك مش محتاج ان حد يرد عليك بعكس الكلام...عشان (في رأيي) نتايج الحملة بفضل الله ابتدت تظهر بالفعل...وأحوال السوق دلوقتي بتتكلم عن نفسها
وبعدين ما تنساش ان حملة خلوها تصدي دي أكتر حملة شعبية في مصر بقى ليها تأييد واسع من عدد كبير جدا من المصريين..وهي تقريبا الحملة الوحيدة اللي كل الناس بقوا يتكلموا عنها في الجرايد والتليفزيون...يعني خرجت من اطارها الافتراضي (النت) ووصلت للواقع بالفعل...وده في حد ذاته انجاز كبير جدا
وأينعم الناس مش متوقعة نتايج خرافية من الحملة دي يعني...بس عالأقل الناس عاوزة الأسعار ترجع زي ما كانت من سنتين فاتوا مثلا...وده أقل واجب أصحاب التوكيلات ممكن يعملوه
واذا كان على النفس الطويل والصبر لغاية ما أهداف الحملة ونتايجها تظهر بوضوح....فا أحب أقوللك ان الشعب المصري أكتر شعب صبور في العالم كله وماحدش في الدنيا بيصبر قده :)
فا أنا عن نفسي متوقع خير ان شاء الله وحاسس ان مجهود الناس اللي مشاركة في الحملة مش هايروح عالفاضي

**hazem1979** · 11-02-2009 01:09 AM

يا جماعة مش الهدف من الحملة ان نيجى نلاقى مبيعات السيارات فى مصر صفر لان دة مش واقعى لأ الهدف من الحملة ان كمية المبيعات تقل 30 - 40 % لو دة حصل التجار مش هيقدرو يصرفو على معارضهم والتوكيلات كذلك و العمالة اللى عندها والورش والمصاريف هتبقى اكثر من اللى ممكن تغطية المبيعات الضعيفة
واعتقد ان الحملة محققة نجاح فى الاتجاة دة

**Demirell** · 11-02-2009 01:23 AM

المشاركة الأصلية كتبت بواسطة hazem1979

والمصاريف هتبقى اكثر من اللى ممكن تغطية المبيعات الضعيفة

بالضبط كده....هي دي النقطة

**itsonlyme** · 11-02-2009 02:01 AM

المشاركة الأصلية كتبت بواسطة karaktar

بصراحة ردك كان قلتو احسن
فدتنا بإيه بأه بردك ده!!!

فدتك بايه؟ ركز وانت بتقرأ وانت حتعرف ان اللي قولته ده ردّي (من وجهة نظري) على اسألتك.

سيادتك بتقول نظيف والحكومة وأنا بقول لك الحكومة ملهاش دعوة، مش هي المستهدفه بالحملة

سيادتك بتقول العروض دي سنوية ومش مهمة وأنا بقول لأ دي مؤشر كويس

سيادتك بتقول الناس يأست وأنا قلت لأ

يبقى قلت رأيي في تساؤلاتك (حتى ولو كان رأيي غلط) ولا لأ؟
لازم يعني أشرح رأيي كلمة كلمة؟

ابقى ركز شوية. حاجة غريبة قوي ...

**itsonlyme** · 11-02-2009 02:17 AM

المشاركة الأصلية كتبت بواسطة karaktar

أولاً ردى على كلامهم جاى من سياق ردهم المستفز
ومتهايألى ان همه ردو عليا بطريقه غير لائقه فحبيت ارد عليهم بإسلوبهم

وردك المستفز عليا كان في سياق ايه؟

**AshTurbo** · 11-02-2009 02:30 AM

يا جماعة انا شايف ان الحملة فاشلة اصلا من الاول لاسباب عديدة وهو ان كل حاجة فى البلد غليت فجأة فى الكام شهر الى فاتوا دول

ياريت العضو الفاضل يذكرلنا الحاجات اللي أسعارها غلت في آخر 3 شهور وفي المقابل نقدر كلنا نقولك أسعار حاجات كتير رخصت ومن الرد نقدر نحكم مين صح ومين غلط .

معلش يعنى يا باشا انت عارف الاجابة طبعا مين الى هيصدى الاول بس بردوة اصحاب الحملة الى بيوهموا على انفسهم يجربوا كدة يركنوا العربية و يركبوا مواصلات يوم واحد ونشوف رأيهم اية يا جماعة خلينا واقعيين انهاردة لو واحد من المتمرمطين فى المواصلات دول فى جيبة تمن العربية هيقول خليها تصدى و موديلها يعدى ولا هيجرى يشتريها علشان يرحم نفسة ووالله على رأى عادل امام(بلد شعارات) شهادات سابقا

أولاً الحملة ليس لها أصحاب ثانياً معظم أعضاء الحملة معاهم فلوس ويقدروا يشتروا وليهم قدرة شرائية مؤثرة وهتكلم عن نفسي أقرب مثال لأن أنا معايا 100 ألف جنيه فضل وكرم من ربي مخصصهم لشراء سيارة وبأركب مواصلات وبتبهدل جامد جدا ومع ذلك حأخليها تصدي ومش هشتري ومش هقولك لحد 2010 دة لو لحد ما أموت مش هأشتري بالسعر دة الا لما الأسعار ترخص وتبقى بحق ربنا لأن أنا لو أشتريت وأنا عارف أن أنا بتسرق وبيتنصب عليا أبقى حاجة من أتنين يا الفلوس دي سارقها أو لاقيها في الشارع يا أما أكون ساذج والحمد لله الفلوس جت بتعب وشقي وايضاً الحمد لله بكامل قواي العقلية خد على كدة كام مثال من أعضاء الحملة وشوف معاهم كام وهتعرف القدرة الشرائية هتأثر في السوق ولا لأ .

**ahmedkoko** · 11-02-2009 02:46 AM

المشاركة الأصلية كتبت بواسطة Demirell

هو حضرتك لما تعمل موضوع بعنوان "حالة من اليأس تعم أعضاء المنتدى" يبقى كده عاوز تعرف الناس جالها يأس وللا لأ؟ وللا تبقى بتفترض جدلا ان الناس بالفعل جالها يأس واحباط وعممت حالة اليأس دي على الأعضاء كمان بكلمة (تعم أعضاء المنتدى)؟! نرجو التوضيح!
وبعدين حضرتك مش واخد بالك ان في شركات كتير نزّلت أسعارعربياتها بالفعل وللا ايه؟! على سبيل المثال لا الحصر : فولكس فاجن - فيات - سكودا - بي ام - بيجو - أوبل....يا راجل ده حتى غبور الحرامي رخص بعض موديلات هيونداي! فا نرجو من حضرتك تحرّي الدقة في كلامك عشان غير كده يعتبر تضليل للناس

وبعدين على فكرة طريقة ردك على الأعضاء عنيفة شويتين...أنت مش ملاحظ كده؟!
يعني ده جزات الناس انها بتقرا موضوعك وبتتفاعل معاه؟!

علي فكره اسلوبك مستفز جدا و يا ريت لو تحترم آراء الناس شويه

**zeyad1810** · 11-02-2009 03:14 AM

مفيش حاجة بترخص هنا مرة واحدة لازم الموضوع ياخد شوية وقت واللى نفسة اطول هو اللى هيكسب
البلد كلها حالها زى الزفت واللى معاة قرشين هينام عليهم علشان مايعرفش بكرة ممكن يحصل اية
يبقى خلى عربياتهم عندهم لحد ماتيجى عليهم 2019 "بدء تنفيذ اتفاقية الجات " والغاء الجمارك وساعتها هيكونوا لسة يبيعوا فى عربيات من موديلات 2008 زيرو ومصدية من الركنة

**Demirell** · 11-02-2009 03:20 AM

المشاركة الأصلية كتبت بواسطة ahmedkoko

علي فكره اسلوبك مستفز جدا و يا ريت لو تحترم آراء الناس شويه

أنا أسلوبي مستفز؟!

ماشي ياعم...الله يسامحك
بس على فكرة صاحب الموضوع اللي كنت بوجّهله كلامي مش متضايق مني ولا من أسلوبي...ايه رأيك بقى
وعاوز ألفت نظرك اننا مش داخلين نقلب الموضوع خناقة

**itsonlyme** · 11-02-2009 03:27 AM

المشاركة الأصلية كتبت بواسطة Demirell

أنا أسلوبي مستفز؟!

ماشي ياعم...الله يسامحك
بس على فكرة صاحب الموضوع اللي كنت بوجّهله كلامي مش متضايق مني ولا من أسلوبي...ايه رأيك بقى
وعاوز ألفت نظرك اننا مش داخلين نقلب الموضوع خناقة

مش عارف ليه حاسس أن الأخ ahmedkoko ماكانش يقصد حضرتك.