الموضوع: اضافه تضاعف عمر الزيت 3 مرات

المشاركة الأصلية كتبت بواسطة abou_ruqi

انا كلمتهم الساعة خمسة علشان أعرف هما فين في سابا باشا علشان أروح لهم , ردت عليا أخت مهذبة وقالتلي إحنا بنقفل دلوقتي مواعدنا من 8 : 5 , فإن شاء الله حروحلهم بكرة الساعة تسعة واشوف عندهم إيه ينفعنا , وإن شاء الله انتظروا تقريري الساعة 10 أو 11 كده

على فكرة سألتهم إذا كان حد بيوزع منتجاتهم , قالتلي لا حاجاتنا مابتتبعش غير عندنا فقط

آنا لسه جاي من الشركة دلوقتي ، قعدت هناك فوق الساعة ، ثواني وآكتبلكم تقرير كامل

بص يا سيدي

رحت المكان عبارة عن شقة في عمارة (مش محل ولا منفـذ بيع) المكان اداري طحن مليان موظفين ومكاتب عليها دوسيهات ، ولا في اي آثر لزيوت ولا محسنات ولا اي حاجة

لاول وهلة حسيت اني دخلت مكان غلط !

دخلت علي اول موظفة وقلتلها عاوز اسآل عن الاضافات بتاعة المحركات

حسيت انها مستغرباني قوي وقالتلي ثانية وحدة
وبعدين دخلت مكتب تاني وبعدين خرج يقابلني مسئول المبيعات
شخصية مهذبة وعارف هو بيقول ايه

انما كان مستغربني شوية برضه وحاقولكم هما ليه مستغربين

علشان الشركة دي ما بتتعاملش مع الآفراد وما بتبعش للعربيات الملاكي !!!

الشركة دي شغلها جملة مع المصانع آو شركات النقل البري والشركات بتتعامل معاها جملة آو بالآطنان وما بيبيعوش لوحد جاي ياخد حاجة بستين جنية !!!!!!

فمعرفش ليه الاخ اشرف فتحي صاحب الموضوع ما جبش سيرة الموضوع ده ؟

المهم

قلت للراجل عاوزين نتعرف علي منتجاتكم واحنا منتدي كبير وممكن نتعامل معاكم جملة برضه (طبعا مش زي المصانع انما احنا مش مجرد افراد عددهم قليل)


فالراجل مشكورا شرح لي كل حاجة

١- فيما يختص بالكولير cooler بتاع التبريد ده مش حيفرق مع العربيات كتير ، ده بتاع مواتير المصانع فده مش حيفرق معانا اوي عن اي كولير في السوق

٢- محسنات الوقود دي للمواتير الديزل بس ومش حتفرق مع البنزين حاجة (خاصة ٩٠ او ٩٢ )

٣- ودي اهم حاجة المحسنات الخاصة بزيت الموتور عندهم عبوة شبه كان البيبسي اسمها Omega 909E وهي دي الشيئ الفعال قوي وحيفرق معانا

وده بيعمل حاجات كتير

١- بيحافظ علي لزوجة الزيت اطول علي الاقل ٣ مرات من الوقت المفترض انه يتكسر فيه فلو بتحط زيت ٣ الاف كيلو ممكن تغيره علي ١٠ الاف زيك زي اللي بيحط موبيل ون

٢- بيفرش فيلم زيت خفيف علي الاجزاء الداخلية للموتور فالزيت ما يرقدش ابدا تحت و يفضل علي المعدن حتي لو ركنت العربية سنة

٣- بينظف كل الترسبات الكربونية من علي الجزاء

٤- لو موتورك عجوز بييطلع دخان ، بيمنع الدخان نهائيا وبيخلي الموتور كآنه جديد

٥- مش حتحتاج تسخن العربية الصبح نهائياً

٦- حيحسن كفاة الموتور والتسارع فالسحب حيكون احسن بشكل ملحوظ

٧- صوت الموتور حيوطي بشكل ملحوظ

طريقة الاستخدام

بتتحط العبوة كلها (mm٣٥٠) علي غيار الزيت
بس اول مرة حتمشي الزيت عادي زي ما بيقعد
يعني اللي بيحط ٣٠٠٠ حيغيره علي ٣٠٠٠ واللي بيحط ٥ حيغيره علي ٥ بس اول مرة علشان المفترض حيكون الموتور اتغسل تماما وحيكون في شوائب كتير (وطبعا لما تغير تاني مرة حيكون زيت وفلتر)
وفي تاني مرة بقه ابقي اضرب عمر الزيت في تلاتة
وزيادة في التآكيد قيس الزيت كل شوية مقاس ولزوجة


يعني دي الخطوط العريضة
المهم انا اشتريت عبوة منه للبحث و التحليل والراجل مشكوراً كان معاه عينة في عربيته نزلنا جبناها

(لآن زي ما قلنا الشركة ما بتبعش للافراد ) ومخازنهم في برج العرب تقريبا وما فيش منافذ بيع


انا بالنسبة لي حتآكد من عدة حاجات قبل ما احطه في عربيتي :

-عندي مهنس ميكانيكا صاحبي
-وعند اخويا مهنس بترول
-وحدور علي النت (من خلال بيانات العبوة اللي معايا)

انا عملت حاجة واحد لغاية دلوقتي

سآلت صديق مهندس ميكانيكا في شركة كبير

قاللي لو حتنزل من زيت موبيل ون (تخليقي) لعضوي مافيش مشاكل انما حتفضل كده علي طول ومش حترجع عضوي تاني
وبالنسبة لاضافت الاوميجا ، قاللي كويسة بس لو حتحطها حطها علي طول ما ينفعش تستغني عنها بعد ما تعود الموتور عليها

ناقص دلوقتي استفسر من اخويا وحدور علي النت

المهم اني اتفقت مع مدير المبيعات ان لو في عدد كبير من المنتدي عاوز ممكن اتصل بيه ويسلمنا الكمية (بس لازم جملة ما ينفعش قطاعي)

اي اسئلة ؟؟؟

المشاركة الأصلية كتبت بواسطة ahmedcar

بارك الله فيك بجد فوقيت كل جوانب الموضوع

عاوزين نجيب منه بقه

اصبر بس لما اتاكد من سلامة استخدام المحسنات دي وانها مفيدة فعلا ومالهاش ضرر (اديني يومين بس )

وبعدين نبقي نشوف مين عاوز ونجيب مرة واحدة