ايه اكتر شىء يعكنن عليك وانت سايق!!

**BUNSH** · 27-02-2009 05:28 PM

لما حيوان اسمو ميكروباص يكسر عليا عشان يفادى حد
مهو اصلو لو بيسوق زى الناس مكنش حيحتاج يفادى حد ويدخل فيا انا.

ايوة هوة دة اللى انا كنت عايز اقولة ، مشكور يااسلام باشا ..يارب ارحمنا من بتوع ميكروباصات

**NoRmAl** · 27-02-2009 05:37 PM

طيب ان كان فى حد لسه متابع الموضوع زى ما بيقولو ان اشتكى كل الناس فاعلم ان الشاكى ايضا مشكو والسؤالهل تملك من الشجاعه انك تقول على شىء بتعمله و عارف انه غلط حتى لو كان عضو هنا قال انه بيحصل معاه و بيكرهه وانا هابدا بنفسى اتا من الناس الى بتعمل غرز من غير ماتدى اشاره خالص خصوصا لو كنت ضامن انها سهله بس

**PoweRPassioN** · 27-02-2009 06:00 PM

الزحمه
الزحمه
الزحمه

**Samir Elshahawy** · 27-02-2009 06:32 PM

اقصد يعنى تصرف السائقين المجاورين ليك او سفلته الطريق او المرور او الزحمه..

طبعا كل اللي سيادتك ذكرته ده مايخليش فيه مزاج رايق أصلا و يخلي السواقة كلها عكننة في عكننة

لكن أكتر حاجة بقي تحرق الدم , أن ألاقي واحد راح قافل عليا الطريق و أنا بأعدي من جنبه حتي لو أديتله كلاكسات و نور برضه و لا كأنه شايفني لانه مش فاضي يبص في المرايات

**tutankhamoun** · 27-02-2009 06:53 PM

الشارع المصري كله يجيب الضغط
من أول الميكروباظ للتاكسي
لسواقين النقل
لسواقين الملاكي اللي بيستعبطوه ( و دول كتير قوي )

مشكلتنا الأساسية يا سادة أن الشعب المصري شعب فهلوي و غير مُحب للنظام و القواعد .
و دي مصيبة في حد ذاتها
لأن كل واحد عامل فيها الفلحوص الناصح اللي هايعدي من كل العربيات بطريق الغرز و قاعدة البوز و اللصق في شنطة السيارة التي أمامك

ربنا يهدي الناس ........ أو يريحنا منهم ( و أحنا معاهم )

المصيبة الأكبر أن مفيش رقابة على أستخراج الرخص و رقابة على الطرق فعلشان كدا الموضوع متوقف على أخلاق الناس !! و موضوع أخلاق الناس اليومين دول عايز وقفة كبيرة قوي .

الدليل أن الشعب المصري يخاف ما يختشيش......... و لازم العصايا على طول
أنزلوا المحور
يا سلام ... 10 كم من الأحترام المتناهي ....... بس ليه ؟؟ علشان عارفين أنهم هايترعوا على قفاهم لو مشيوا سريع

فللآسف أحنا كدا
نعرف أن أحنا هانترزع على القفا ............ نمشي مظبوط و ياريت الطرق كلها زي المحور ( رادرات في كل مكان علشان الشبيحة بتوع السرعة ... الله يهديهم )

على العموم .......... مفيش حاجة في الطريق متخلنيش أرجع البيت مبسوط
الأخوة قليلي الأدب و الأخلاق بتوع الغرز
الأخوة اللي بيبقوا لاصقين في شنطة العربية و ناقص يلحم معاك أحسن
الأخوة اللي بيبقوا ماشيين على خط تقسيم الحارة و كأن الطريق أصبح ملكيته الخاصة
الأخوة اللي بتركن زي العميان و يسيب العربية في نص الشارع و يمشي
الأخوة اللي بتسيب أماكن الركن فاضية و يركن في الشارع و يسد الطريق
الأخوة اللي بتمشي على سرعة 50 كم في طريق سريع في الحارة الشمال
الاخوة اللي في اليو ترن و بدل ما يقف في الطابور وراك يدخل من جنبك و يقفل عليك الطريق
الأخوة بتوع الميكروباظ اللي فاكرين نفسهم في حلبة سباق
الأخوة بتوع الميكروباظ مرة أخرى اللي بيطلع من الوقفة و هو مش باصص على الطريق أساسا
الأخوة بتوع الميكروباظ و التاكسي اللي بيقفوا فجأة و يحدف عليك علشان يلقط زبون

من الأخر مفيش حاجة مظبوطة في طرق مصر
سواقين مش فاهمين حاجة غير بدال السرعة و شوية غرز و قلة أدب و خلاص
حسبي الله ونعم الوكيل

**KHALED AYMAN** · 27-02-2009 10:54 PM

المشاركة الأصلية كتبت بواسطة NoRmAl

طيب ان كان فى حد لسه متابع الموضوع زى ما بيقولو ان اشتكى كل الناس فاعلم ان الشاكى ايضا مشكو والسؤالهل تملك من الشجاعه انك تقول على شىء بتعمله و عارف انه غلط حتى لو كان عضو هنا قال انه بيحصل معاه و بيكرهه وانا هابدا بنفسى اتا من الناس الى بتعمل غرز من غير ماتدى اشاره خالص خصوصا لو كنت ضامن انها سهله بس

انا بحييك على شجاعتك و على اعترافك بالخطأ و انا بعدك :
1-انا برده بعمل غرز خطيره جدا و الى بدخل عليه بكون مديله اشاره بس مش بيكون متوقع انى هدخلها لانها ضيقه مووت (دى اول غلطه والحمد لله بدات اقلل منها ).
2-انا مش بحب الى بيركبلى على الشنطه بس انا بعمل كده (لكن لو لقيت مفيش نتيجه من الى ادامى بخلع منه على طول مش بفضل لازق فيه)....(دى تانى غلطه).
3-السرعه السرعه السرعه .........
طبعا زمانكو بتقولو عليا حمار سواقه ههههه

بس انا بصراحه اعجبت بكره NORMAL فى ان كل واحد فينا عمال يشتكى من الغير و مش معقول هو مبيغلطش .....

**merosss** · 27-02-2009 11:00 PM

المشاركة الأصلية كتبت بواسطة NoRmAl

طيب ان كان فى حد لسه متابع الموضوع زى ما بيقولو ان اشتكى كل الناس فاعلم ان الشاكى ايضا مشكو والسؤالهل تملك من الشجاعه انك تقول على شىء بتعمله و عارف انه غلط حتى لو كان عضو هنا قال انه بيحصل معاه و بيكرهه وانا هابدا بنفسى اتا من الناس الى بتعمل غرز من غير ماتدى اشاره خالص خصوصا لو كنت ضامن انها سهله بس

انا كمان بغلط انا ساكن فى حلوان وبخرج من المرصد الحتة من المرصد لحد مدخل حلوان بامشى فيها 160
تقريبا كل يوم انزل فية بالعربية ودة اكبر غلط رغم ان الحتة دة منزل والطريق واسع واى حد فى حلوان عارفها

**dr_timo** · 27-02-2009 11:45 PM

انا بقي اكتر حاجة بتعكنن عليا هية الكلاكسات كل ماسمع كلاكس بيركبني العصبي واحنا بقي في شوارعنا مانتوصاش طيب والله بلاقي ناس ماشية ديد ديد من غير اي سبب وان شالله يكون الطريق فاضي هههههه مرة اول مكنت بتعلم وماشي في طريق وواخد يمين وف عربية ورايا بمدة عمال يدوس كلاكس مع ان الطريق فاضي فانا قلت اهددي يمكن شاف الكاوتش عندي نايم او العربية بتنققط ولا بتولع ولا اي مصيبة وبعدين بهدي وابص اشوفه لقيته جري ولا اكني في حاجة ومن ساعتها عرفت ان في عالم غريبة كدة بتدوس عالكلاكس مع دواسة البنزين

**Demirell** · 28-02-2009 12:11 AM

أكتر حاجة بتغيظني لما واحد يزنق عليا أو يكسر عليا فجأة....زي ما أنا كاتب في توقيعي كده

ومرة كنت داخل على يوتيرن لقيت واحد راح جاي من ورايا وكاسر عليا وسابقني وأول ما دخل في اليوتيرن وهو بيلف راح مهدي ووقف خالص!!!! رغم إن ما كانش في حد جاي من الإتجاه التاني!!

وأنا طبعاً فرملت جامد لدرجة إن الحزام عمل lock ولولا كده كان زماني دخلت فيه...وكان هايتقال ساعتها إن أنا الغلطان....والحمد لله إن ما كانش في حد ورايا ساعتها وإلا كان دخل فيا أنا كمان

ومن كام يوم كنا في مشوار عند شارع مصدق وكنا ماشيين في شارع كده بس مش عارف إسمه....بيكمّل كملف ويدخل على شارع تاني...وطول ما إحنا ماشيين الشارع كان واقف خالص وبيمشي بالعافية لما إتخنقنا......في الآخر خااالص لما جينا داخلين عالملف عرفنا السبب وبطل العجب....سواق ميكروباص راكن المخروب بتاعه عند مدخل الملف بالضبط وواقف جنبه مستني زباين!!! :10D5C8~1107:

والمصيبة إنه كان مريح عليه بطريقة مستفزة كده وواقف بمنتهى البرود ولا على باله أي حاجة في الدنيا ولا كأنه موقف شارع بحاله!!!

بصراحة إحنا كنا مذهولين.....والأدهى إن الأشاوس بتوع المرور اللي بيتلككوا لبتوع الملاكي عالكلاكس وعلبة المناديل عالتابلوه مفيش ولا واحد منهم طل علينا بطلته البهية وجه يشوف أخينا اللذيذ ده

بصراحة الواحد مش عارف يقول إيه.....أكيد بتوع المرور عارفين كويس إن سواقين الميكروباصات
دول بلطجية وقلالات الأدب عشان كده مابيفتحوش بؤهم معاهم....إنما معانا إحنا يطلّعولنا القطط الفاطسة!

الموضوع: ايه اكتر شىء يعكنن عليك وانت سايق!!

LinkBack

أدوات الموضوع

عرض

-

-

-

-

-

-

المواضيع المتشابهه

اكتر موقف نرفزك وانت سايق وخلاك كنت ((هتفطر)) وانت ((صايم))؟؟

ايه اكتر موقف شيبك وانت سايق العربيه (يعنى) حد كسر عليك او كنت هتخبط فى عربيه او شخص

بتفكر فى ايه وانت سايق ....؟

تفاصيل اول او اكتر حادثة بالعربية "وانت اللى كنت سايق "ولسه فكرها لحد دلوقتى

ممكن تنام وانت سايق أو وانت مسافر

الكلمات الدلالية لهذا الموضوع

المفضلات

المفضلات

ضوابط المشاركة