الموضوع: لا تثق فى بائع المستعمل ولو كان دكتور جامعه

للأسف البائع مستعد يقول اى حاجه تخليك تتمسك بالعربيه ويحلف ميت يمين ان العربيه دى هاتدعيلى بس ابقى قول ربنا يباركلك .....وكلام من ده على اعتبار انه راجل محترم بتشترى وبعدين المفاجئه انه يطلع سمسار لتاجر بيستغل شكله واسلوبه ودى الحكايه بالتفصيل:-
بعد لف ودوخه وصلت لحد الزهق وكل عربيه ندفع عليها مبلغ محترم فحص وتاكسى وشاى للسمكرى والراجل اللى بيفحص الشاسيه فى البنزينه وصلت لدرجه انى مابقتش اصدق اى حد
لقيت اعلان عن عربيه سعرها كويس قمت اتصلت بالمعلن اللى عرفنى بنفسه على انه بيدرس فى الجامعه للطلبه الاجانب لغه عربيه
ورحت قابلته لقيته لابس بدله وشكله محترم ولسه جى من السعوديه طاظه يعنى عمره ما يكون تاجر ممكن بس العربيه محتاجه شويه شغل
مش مشكله يلا نخلص
رحت فحصت فى البنزينه قالولى خبطه بسيطه ومستعدله فى الشنطه والموتور 65%
ماشى
اولنا طلب فلوس زياده عشان انا موثقتش فيه وفحصت فى البنزينه يعنى عربيته تستاهل اكتر من اللى اتفقنا عليه
طبعا مديتوش حاجه
تانى حاجه لقيت الناس تعرفه فى الشهر العقارى وكده اتأكدت انى اتضحك عليا
تالت حاجه اول ما غيرت الزيت ظهر عيب الموتور اللى مكنش ظاهر ورحت اعمل طقم شمبر لاقيت الموتور 1500 مش 1300زى ماهو مثبوت فى الرخصه يعنى مش ده الموتور اللى فى الرخصه
فعلا الرقم اللى فى الرخصه مختلف عن البصمه اللى فى الموتور
اتصلت بالبائع وعمل عبيط ورحتله المكان اللى قابلته فيه اول مره لاقيته جايب واحد شكله لبط وقاللى ده صاحب العربيه وانا كنت بابيعهاله!!!!!!!!!!!!
قام اللبط قاللى انا كنت مدخلها فى عربه تانيه ومعرفش حاجه عن الموضوع ده العربيه ما قعدتش معايا اكتر من مشوارين استنى لما اشوف اللى اشتريتها منه
واللى اشتراها منه قال انا معرفش حاجه عن الموضوع ده انا اشتريتها من واحد على كده وبعد ما وصلت لاساس السلسله اللى غير الموتور قاللى انا اشتريته من واحد فى الحرفيين اسمه كذا ومخدتش منه الافراج والورق بتاع الموتور !!!
رحت الحرفيين والحرفيين دى اول مره كنت اروحها وفى رأيى عباره عن مستنقع فيه خلاصه حراميه تجار الاستيراد

الراجل بعد ما شرحتلوا الموضوع والبيه اللى اشترى منه الموتور اتكرم عليا واتصل بيه
ماهو طلع برضه شغال فى العربيات ومعروف فى الحرفيين!!!!
الراجل قاللى بمنتهى الادب طب الكلام ده من فتره وانا معرفش فين الورق دلوقتى ادينى يومين ادورلك عليه
طبعا كل واحد فى السلسله دى كان بيمطوحنى كام يوم على ما يوصل للى قبله فى السلسله ويسلمنى له وعلى بال ما يعمل عبيط شويه وبلطجى شويه ويسيبنى لغايه ما ابدأ اهدد واعرفه انا ممكن اعمل معاه ايه يعنى اقلب على الوش التانى يقوم يتعدل ويسلمنى للى قبله ....كل ده والعربيه عفنت عند الميكانيكى مش عارف اعمر ولا اشترى موتور تانى عشان ارخص بيه؟!
المهم التاجر بعد شويه تهديد ووعيد ادانى بلوك فاضى محتاج خرط بالافراج بتاعه وقاللى طالما كده كده هاتعمر خلاص ركب ده واخرطه وربنا يعوض عليك

رجعت للميكانيكى ووريته البلوك رمى فى وشى قنبله
فين كراسى الكرنك؟
ايه؟
كراسى الكرنك لازم تبقى مطبعه معاه ارجعله خليه يديك بتوع البلوك ده
طبعا فهمتم
الافندى حاجزهم عنده وعايز يبيعهملى ب 200جنيه
طب خد بدلهم البلوك والكراسى اللى ملهمش ورق دول حالتهم احسن من اللى انا اخدتهم!
لأ
يهديك يرضيك
لأ
طب لا هاتاخد الجديد ولا القديم انا هاشترى موتور جديد واحرق قلبك على البلوك بتاعك وابيعه خرده وخلى الكراسى ابقى............
فى الاخر استعوضت ربنا واشتريت موتور استيراد وعشت مع افتاءات الميكانيكى والكهربائى لأختلاف الضفيره عن الاستيراد
وطبعا نزلت اشتريت الموتور مع نفسى لان الميكانيكى كان هايبعنى للتاجر وجبت موتور محلول من نص عربيه قدامى وبحالته!!

بعد القرف ده جتلى نفس من العربيه يعنى كل ما اركبها افتكر القرف اللى شفته فيها فقررت ابيعها !!

والبيع ده كان قصه تانيه!!!!!!

انا ليا عتاب على حضرتك ...المفروض انك قبل لما تشتري عربيه مستعمله تطابق رقم الماتور مع الرقم اللي في الرخصه ولو حضرتك مش عارف ممكن تخلي عامل البنزينه او اي ميكانيكي يشوفهالك ...وبعدين دائما لا تثق في اي حد بيبع مستعمل ودائما تاخد الكلام اللي بيقوله من ناحيه وتطلعه من الناحيه التانيه ...والواحد مش بيتعلم ببلاش