اتمسكت الناهردى و انا ماشى عكس الاتجاه

**ahmad5997** · 04-04-2009 06:39 PM

المشاركة الأصلية كتبت بواسطة justs

أنا حصل معايا موقف عكس الأتجاه ده .
كنت طالع من شارع عند شارع عبد العزيز وماشي في اتجاه صحيح عادي ، وكنت عاوز اركن ومش لاقي مكان فكملت لآخر الشارع ولقيت ركنة على الشمال على ناصية الشارع المتقاطع مع الشارع اللي انا طالع منه ، المهم كسرت شمال ومحضن عشان اركن ، وهب لقيت واحد امين طلعلي من ورا عربية راكنة وقالي رخصك ، قلتله فيه يا عم انا بركن ، قالي رخصك ، طب ليه بس انا بركن عادي ، قالي بس رخصك وهنخليك تركن ، المهم اديتله رخصتي قاللي رخصة العربية قلتله مش معايا ، المهم راح مدي الرخصة لظابط وقاله عكس التجاه ، الظابط قاله فين رخصة العربية ؟ قاله مش معاه ، راح الظابط قايله احسن ، كل ده وانا لسه قاعد في العربية ، وشايف كوالين الظابط بتاع تمنيه تسعه واقفين وكله عمال يكلمه والظابط في منتهى الرخامه ، ولقيته بيقول للأمين يروح يجيب الونش والبوكس ، وطبعا كل ده وانا مش مستوعب اللي حصل وشايف بقه الصورة كامله ( حجز اربع ايام ، وغرامة 1000 جنيه وبهدله وعبط ) ورغم ان عمي رئيس محكمة استئناف وابنه رئيس نيابه ، بس عقبال ميجولي من الفيوم تكون الدنيا باظت ، المهم انا كل ده لسه منزلتش من العربية ، وفجأه جه في بالقي اني اسيبلهم الرخصة وامثل فيلم الهروب :) ، ونقلت بالعغربية سنه سنه وانا محضن كأني هركن وعيني في المرايه اللي جنبي ، وشايف الظابط واقف ملخوم مع الناس والأمين راح يجيب عدة الشغل ( الونش والبوكس ) وهب رحت طالع امريكاني ومحدش شافني كأني في فيلم اكشن آخر حاجه ، وبعد ما خلعت رحت متصل بعمي احسن يكون اللي حصل ده له توابع اسوأ ، قالي ولا اي حاجه احسن انك عملت كده ، قلتله طب وايه اللي هيحصل ، قالي مخالفة عادية لأن عكس السير شرط في ه التلبس وكده مفيش تلبس ( افتكرت ساعتها احمد زكي في فيلم ضد الحكومه لما رمى الحشيش من شباك القطار والظابط واقف :) ) ، وبعدها بأسبوع او عشر ايام رحت عملت بدل فاقد ب 60 جنيه ،
وشكراً على كده ، ومعلش لو كنت طولت عليكم .

يعني ايه
يعني لازم اتمسك ساعتها ولا ايه مش فاهم
وبعدين يعني هم كانو بيصورا عشان يبقي في تلبس
سوري بس والله مش فاهم
ياريت لو حد يفيدنا في الموضوع ده

**SAMEH_FOUAD** · 04-04-2009 11:44 PM

ان اللى اعرفة ان الواحد لما بيتحبس عشان مخالفة سير عكس الاتجاة بتبقى الغرامة الف جنية وحبس اربع ايام بس مش فى الحجز بتاع المجرمين لا دة بيبقى مكان كدة وبتقعد جوة انت وكل اللى مرتكبين نفس الخطأ او المخالفة لكن مش يحطوك مع المجرمين ودة اللى اتقال من الظابط

**shady05** · 05-04-2009 10:52 AM

أولا الحمد الله على سلامتك , ثانيا : انا مختلف معاك تماما فى كل كلمة كتبتها , حضرتك و كل الناس عارفة كويس عقوبة السير عكس الأتجاة يعنى حضرتك متفاجئتش بالمخالفة , كمان حضرتك بقالك سنتين بتمشى عكس الأتجاة فى نفس الشارع و ولا همك اى شئ !! ودلوقتى لما اتمسكت زعلان اوى !!!! لو دة مكنش حصل و كان الأمين مشاك و خد الخمسين جنية كنت هتفضل تمشى معاكس , لكن دلوقتى لن تجرأ على تتكرار هذا , كل كلامك عبارة عن استياء من الحبس و الغرامة بدون الأعتراف بمدى الخطأ الذى ارتكبتة , وكمان الزحام اللى حضرتك بتشتكى منة سبب رئيسى فية هى سلوكيات الناس مثل السير عكس الأتجاة , عدم الألتزام بالأشارات , عدم الألتزام بالحارة المرورية يعنى كل ماتلاقى نص متر فاضى يمينك او شمالك تنط فية على طول , متزعلش منى انا مش معنى كدة انا غافل دور الأهمال و عدم النخطيط للشوارع من الحكومة بس مش معنى كدة انها تصبح فوضى مننا , ارجوك التزم بقوانين المرور.

**وائل عطية** · 05-04-2009 11:04 AM

أنا لما بلاقي واحد مقابلني بالعكس باغتت عليه وممكن أقف قدامه وش في وش
أنا بصراحة مع تشديد العقوبة أكتر من كده كمان مع اللي يمشي عكسي
لسه من أسبوعين في العبور مات 12 شخص (إسرائيل ماخسرتهمش في حربها على غزة) وأُصيب عدد كبير بسبب رعونة سواق نقل كان ماشي عكسي !! لو الأمر في إيدي كنت هاصلبه في ميدان عام

**Jato.33** · 05-04-2009 11:45 PM

أولاً حمد الله على سلامتك
ولا يهمك البهدلة في البلد دية واجب على كل مواطن شريف
وصدقني هو الموقف وحش بس هتتعلم كتير وهيقوي قلبك
بس إوعى تخش الحجز تاني

لو إستمر الوضع على ما هو عليه
شوارع مدغدغة وزبالة وزفت وطين على دماغهم
تيجي تخاف على عربيتك وتحاول ما تبهدلش نفسك تقوم تلبس في الحيط مخالفات وحبس
إن شاء الله الداخلية هتحولنا كلنا إلى رجالة رد سجون

حسبنا الله ونعم الوكيل

بعد كده يا جماعة أي حد يحصل معاه الموقف ده يتوكل على الله
أنا أعرف واحد عملها قبل كده برده
في ميدان أم كاثوم في الزمالك وعايز يطلع مطلع الكوبري وجي في الإتجاه المعاكس للمطلع قام داخل عكس طلع عليه الناس إلي قاعدين قدام سلينترو كده بشرية
راح واخدها U Turn وطالع الكوبري وفاكك

بس خد بالك لو محسبتهاش صح وبصيت كويس ممكن لا قدر الله يحصل مشكلة أكبر

ربنا يحميكوا جميعاً ويبعد عنكوا ولاد العادلي

**samcar** · 06-04-2009 12:30 AM

احسن حل لو كلب من دول طلع لك دوسه واهو حبس بحبس

**saidbakr** · 06-04-2009 02:27 AM

كفارة يا باشا، و على العموم انا بقدر النصيحة بتاعتك دي جدا و بعمل بيها حرفيا من زمان، لدرجة إني بشد الحزام لو كنت طالع بالعربية لغاية اول الشارع و راجع تاني ( بالرغم من اني من سكان الأقاليم يعني كل عساكر المرور بالظابط اللي في البلد 7 و لا تمانية و عارفهم و عارفني ) بس ده كله علشان اعود نفسي على العادات السليمة و الماشية مع القانون. بيني و بينك حتى و لو كان فيه واسطة و جامدة كمان، فيمكن انك تتفق معايا في انه مالهوش داعي اني اشغلها او اخليها جميلة على موضوع من أصله موش لازم يبقى فيه حاجة، يعني موش هيحصلي حاجة و لا هنقص لما اكون شادد الحزام و لا ماشي في الاتجاه السليم و لا موش متجاوز السرعات المقررة و خلافه، و يبقى الواحد يوفر الواسطة للأمور الكبيرة من اساسها.