الموضوع: فى الصيف فقط وعند نهاية المشوار تبتدي تقطع وما تسحبش وممكن تطفي - ليجانزا

انا مع الرأى السائد وهو البوبينا

شكرا للجميع ، وآسف في التأخير ، وإليكم الآتي بعد الأخذ بنصائح السادة الأعضاء :

1) غيرت فلتر الهواء بواحد جديد .
2) غيرت فلتر البنزين .
3) بقالها فترة ما عملتش الموضوع ده قلت الحمد لله المشكلة اتحلت ، ولكن !
4) النهارده كنت بأوصل قريبي إلى إنبي في آخر عباس العقاد وانا راجع وأيضاً وفي نفس ذات المكان في شارع التسعين وانا راجع التجمع عملت نفس التقطيع لما آجي أكبس بنزين قمت بعمل الآتي :

أ) جبت فوطة مبلولة علشان أحطها على البوبينة أبردها أخذا بنصيخة الأستاذ أيمن وكانت المفاجأة لم أجد البوبينة ، أو بالأصح لم أعرف مكانها ، أنا أعرف إن الاسبراتير بيبقى واصل له 5 كبلات (أسلاك) 4 رايحين للبوجيهات والخامس بيبقي واصل بالبوبينة ، لقيت الاسبراتير ( وهو الكتروني ) واصل له 4 كابلات فقط ومافيش سلك خامس ، أدور على البوبينة يمين شمال مش لاقيها ؟؟!!

ب) لاحظت حاجة وهي في هذه الحالة أولا الحرارة عند النصف مافيش سخونة ، لما آجي أشغل ألاقي أمبير RPM بيعلى قوي وصوت الموتور كذلك ثم ينزل ويبقى عادي بعد كده ، يعني تحس إن في كبس بنزين زيادة لوحدها ، أطفي وأشغل تاني تعمل نفس الحكاية بس الصةت بيكون أهدى شوية من المرة الأولى ، ولما أمشي تسحب وتجري زه الفل الموضوع ده حصل النهارده .

5) للأسف ما فتحتش تنك البنزين للأخذ بنصيحة الأستاذ /عماد هارون ، لأني ما كنتش قريت نصيحته بعد ، بس اعتقد انها صحيحة لأني بأحس إن كبس البنزين عالي قوي فالعربية بتتخنق ، ولما أطفي وأشغل مرتين بدون الضغط على دواسة البنزين ضغط البنزين بيقل شوية والعربية بترتاح وبتمشي كويس جدا .

6) بالنسبة لنصيحة الأستاذ عصام فريد أعتقد حساس الشكمان لو فيه حاجة كانت لمبة الـ Check نورت علطول ، لكن اللمبة مت نورتش مع العلم إنها شغالة لما بافتح الكونتاكت .

7) بالنسبة لنصيحة الدكتور/ محمد مدكور ، لامفر يا دكتور من المشي في شارع التسعين لأن هو ده الطريق الوحيد إلى المنزل !!!

8) مع العلم إني كنت في أجازة شم النسيم في الاسكندرية رحت وجيت زي الفل حتى المحور كان يوم الاثنين واقف خالص في الرجوع 10كم خدناهم في 3 ساعات ولم تقطع السيارة وكانت شغالة كويس جدا ، طرمبة البنزين لو كان فيها حاجة كانت عملتها في مشوار اسكندرية رايح جاي السحب كويس ومافيش حاجة خالص.

9) الموضوع متعب شوية والكهربائية والميكانيكية إيدك منهم والأرض ولا الهوا ، لأن لما بأروحله بتكون العربية كويسة وبيقولولي العربية زي الفل ، غير اللي بيبقى عايز يشتغلنى طبعا زي ما انتم عارفين ، كشفت على العربية بالسكانر في التوكيل وخد 80 جنيه ، ومافيش نتيجة العربية كويسة .

10) الموضوع ده لما الجو بيكون حر فقط الصيف داخل وربنا يستر ، انا حاسس إن الموضوع بسيط بس نحط ايدينا على المشكلة ، إذا عرف السبب بطل العجب !!والله أعلم