كلام بسام مظبوط و انا كمان بفضل الزيرو لكن فى حالتك دى فى وجهة نظر ثانية
اولا الفرق بين الجيتز و اi10 مش فى فرق الماتور و بس - لأ فى فروق تانية زى :
1- جودة الخامات المستخدمة فى الصالون الداخلى للجيتز افضل بفرق ملحوظ لصالح الجيتز و دة راجع لكونها تصنيع و تقفيل كورى بالكامل اما الاخرى تجميع هندى .
2- الجيتز اوسع فى الصالون و شنطتها صغيرة بس معقولة انما الI10 انسى الشنطة خالص .
3- الجيتز طبعا ماتورها اقوى بكتير 105 حصان مقابل 66 حصان لi10
4- فرق استهلاك البنزين لصالح الi10 طبعا بس دة مش نقطة مؤثرة اوى و بالذات فى حالتك لان لو اشتريتى الجيتز هتوفرى 4000 جنية و دول يعملوا 2162 لتر بنزين 92 يعنى يمشوكى 21620 كم تقريبا سنتين من غير ما تدفعى بنزين خالص .
الكلام دة كلة ملوش اى لزمة الا لو اتاكدتى ان العربية مفيهاش غلطة و يا ريت تكشفى عليها فى التوكيل .
و متنسيش تصلى صلاة استخارة و ربنا يوفقك .