عملت حادثة بالسيريون_(لما الطريق يقف اوعى تقف!!)_والحمد لله .

**د.محمد الشيخ** · 13-04-2009 01:39 AM

المشاركة الأصلية كتبت بواسطة أبو عبدالله

ايوه انا اسف نسيت خالص
لا يا راجل
العملية ابسط من كده ان شاء الله
الكلام ده كله بيترد على البارد كمان بدون تغيير او اي حاجه
وصدقني على البارد ارحم بكتير في الخسائر

يعني بصراحه انا لو مكانك هرد كل الكلام ده على البارد حتى لو في خدوش على البويه
دي بوية العربيه
ولو هتسمكر بره وتخش في دهان صدقني انك تعملها على البارد ارحم بكتير

نصيحة اخ خليها على البارد كله

وبعدين الكابوت مش محتاج غير انه يترد مكانه بس
والأكصدامات مش شايف اي مشكلة علشان يتغيروا بجد
ده انا بتاعي الخلفي مطحون خالص

انت الحاجه الوحيده اللي محتاجها هيا الزجاج الخلفي بس

الموضوع ده كله ميكلفشي بجد 1000 جنيه والله بجد

انا رايي الشنطة برضه ردها على البارد وانا شايف ان فيها حته الدهان متشال فيها
برضه سيبها والله وبلاش تدهن الشنطة ولا اي حاجه بجد

واي مساعده انا موجود معاك والله

وبعدين هيا مشكلة الفوانيس الامامية ايه
اصل انا مش شايف حاجه موجوده من الصور
يعني مطلوب تغييرهم ليه ؟؟؟

ربنا يكرمك ابوعبدالله والف شكر على مشاعرك الطيبة ومعاك حق والله فى كل ما قلته بخصوص الرد على البارد وانا مقتنع جدا برايك ده وحيبقى هدفى الاول هو الحصول على افضل نتيجة على البارد باذن الله
ود.معاذ ربنا يكرمه كتب ارقام تليفونات اتنين سمكرية بيشتغلوا على البارد وباذن الله حعمل عند حد منهم .
وانا معاك انى ابدأ بالرد على البارد ولو لفترة مؤقتة على اساس ان الشارع المصرى الجميل بطبيعته بيبهدل العربيات خربشة وحك وخلافه وبعد فترة كده ممكن تتشد كلها شدة محترمة .
الفانوسين الاماميين واحد فيهم الشاسيه بتاعه مشروخ والتانى مكسور
لكن هم ثابتين كويس فى مكانهم
طبعا التوكيل بيغير ولو على شعرة بس الحق يتقال المهندس مصطفى قالى ان ده اختيارى حسب رغبتى وطبعا انا قررت مغيرهمش لانهم جداد والشاسيه انا حعالجه باذن الله بايدى .
الكبود كذلك المهندس مصطفى قالى انه فى العظم وهم بيغيروه فى الحالة دى وطبعا انا قررت سلفا انى مغيروش
دانا حتى دست عليه بايدى رجعته مكانه بنسبة 50% .
الاكصدام الخلفى نفس الحكاية متنى حاجة بسيطة وفى مكان مش باين وبرده قررت سلفا عدم تغييره

شاكر افضالك وربنا ييسر الحال

**أبو عبدالله** · 13-04-2009 01:44 AM

بس الفوانيس دي بتتعمل عند اي واحد بتاع فيبر وبلاستيك
بيقفلك الشروخ دي علشان الميه ويبقى كده مفيش تغيير ان شاء الله

اما بخصوص الكابوت انا كان عندي في التويوتا نفس الوضع وبتاع التويوتا اعرض واكبر كمان
والله اترد على البارد ولا الهوا ولا اكن كان فيه حاجه اساسه خالص

فان شاء الله كله يترد على البارد لأن بجد حرام البويه الفابريكة دي والحاجات بتاعت العربيه تتغير

**د.محمد الشيخ** · 13-04-2009 01:45 AM

المشاركة الأصلية كتبت بواسطة aif

على فكرة يا ابو عبد العزيز
انا حبيت اقولك ان المسألة لا تخرج عن كونها قدر ..... انا لما بصيت في العنوان تخيلت انك وقفت تتفرج على حادث او ما شابه ... لكن طالما الطريق وقف ... انت مجبر على انك تتوقف .....
يعني ما تحملش نفسك وزر او مسئولية .... ده قدر ربنا ... وقدرك انك كنت في طريق النقل اللي بدون فرامل دي ..... واي حد ممكن يكون في هذا الموقف ... والحمد لله اولا واخيرا

:) ربنا يكرمك والحمد لله طبعا على كل شىء وعلى فكرة انا كاتب فى العنوان (لما
الطريق يقف اوعى تقف!) طبعا اقصد السخرية تخفيفا على نفسى
لاننا معندناش اختيار لما الطريق يقف سوى اننا نقف .
والف شكر على مشاعرك الطيبة

**د.محمد الشيخ** · 13-04-2009 01:59 AM

المشاركة الأصلية كتبت بواسطة aif

معلوماتي عن الزجاج ... سواء كان اصلي او مصري ( جريش - امان - سيكوريه )
فيه نوعين
الاول دوبليكس عبارة عن طبقتين زجاج .... وده ارخص واكثر أمنا وده لما بيتكسر بيبقى حبات صغيرة ( سرطان ) ودائما بييجي مع العربيات من الفابريكة .... وهو وان كان اقصر عمرا واكثر عرضة للكسر والسرطان بسبب الحرارة او اسباب اخرى لكنة عند الحوادث الكبيرة لا قدر الله بيبقى آمن اكتر علشان بيتحول الي حبات صغيرة ... واضرارة بتبقى محدودة
النوع التاني تريبلكس وهو طبقتان من الزجاج وبينهما طبقة ثالثة من السيليكون الشفاف جدا ....ده اغلى واطول عمرا و اكتر مقاومة لكن .... عند الحوادث الكبيرة بيتحول الى شظايا كبير زي السكاكين والعياذ بالله .... وبيكون اضرارة على الركاب اكتر بكتير من النوع الاول
يعني لو فرامل جامدة وحد خبط في الزجاج الامامي
في النوع الاول ح ينكسر الزجاج بفعل الصدمة برأس الراكب و يتفتت الى بلورات صغيرة تصيبه بجروح سطحية نوعا ما
اما في النوع الثاني .... الجروح ح تكون قطعية وعميقة وخطيرة جدا لأن الزجاج لن يتفتت بسبب طبقة السيليكون الوسطى .... والنتيجة كارثية
ربنا يحفظنا جميعا
دي معلوماتي الشخصية لو حد عنده اضافة او تحفظ يا ريت يقول للفائدة

الف شكر على المعلومة القيمة وده معناه ان الدوبلكس طبعا افضل

**د.محمد الشيخ** · 13-04-2009 02:06 AM

المشاركة الأصلية كتبت بواسطة أبو عبدالله

بس الفوانيس دي بتتعمل عند اي واحد بتاع فيبر وبلاستيك
بيقفلك الشروخ دي علشان الميه ويبقى كده مفيش تغيير ان شاء الله

اما بخصوص الكابوت انا كان عندي في التويوتا نفس الوضع وبتاع التويوتا اعرض واكبر كمان
والله اترد على البارد ولا الهوا ولا اكن كان فيه حاجه اساسه خالص

فان شاء الله كله يترد على البارد لأن بجد حرام البويه الفابريكة دي والحاجات بتاعت العربيه تتغير

طيب ربنا يطمنك وباذن الله الشغل على البارد هو الهدف الان وباذن الله يتحقق
وبعدين اى حاجة بعد كده ملحوقة لان الشغل على البارد مش حيمنع اى شغل بعدين

وانا معاك لانى لو بدات ودخلت فى قصة دهان او تغيير يبقى ضيعت على نفسى فرصة الشغل على البارد اللى ممكن يجيب نتيجة كويسة باذن الله .
وده التسلسل المنطقى فعلا اللى لازم نبدأ بيه .

بالنسبة لشاسيه الفوانيس فالواحد يقدر حتى يسد الشروخ بنفسه وفى مواد لاصقة كتير فى السوق ممكن الواحد يسد بيها الشروخ او يلحم الجزء المكسور .

**aif** · 13-04-2009 02:11 AM

المشاركة الأصلية كتبت بواسطة dr_druggist

الف شكر على المعلومة القيمة وده معناه ان الدوبلكس طبعا افضل

اكيد الدوبلكس اكثر امنا
لكن للأسف الناس بتحب التريبلكس اكتر في مصر لمجرد ان عمره اطول ومش بيسرطن ....
لكن الامان الشخصي .... مش مهم .... وجميع العربيات تقريبا بيبقى راكب فيهم دوبلكس من الفابريكة .... ده دليل آخر على انه اكثر امنا
وده احد الامور اللي بتفسر ارتفاع الضحايا في مصر نتيجة الحوادث ... لأن عوامل الامان مهملة ولا يتم تفعيلها
ده فيه ناس بيفصلو الاير باج عشان لو فتحت ح يتكلفو كتير ... تخيل .... الفلوس اهم من حياة البشر