الموضوع: هل تستحق السيراتو الجديده كل هذا الاهتمام وهل تستحق 126 الف ؟

تستاهل للى بيحبها

وربنا يبارك لملاكها واللى ناوى يشتريها

المشاركة الأصلية كتبت بواسطة Ahmed Samy

كلامك منطقى علشان انت عارف فوايد ESC و هاتستعمل البيدال شيفت ...
بس غيرك (كتير) لو خيروه بين دول و الفرش الجلد او حتى مراية ضم يختار المراية الضم ...

ويمكن في الموديل اللي جاي تلاقي الحاجات دي نزلت في العربية

ياريت بقى لأن كدة بجد استهبااااااااال أخر حاجة بصراحة

و ده ان دل على شيئ فانه يدل على ان المستهلك المصرى مستهلك غير رشيد و غير واعى و بيدور على المناظر

عندك حق

]طبعا معظم المستهلكين المصريين بيدوروا على المناظر

انا فاكر التويوتا الكورلا 2001 لما نزلت ...هي و الانسر المكوة ...كان ناس كتيرة بتفاضل بين العربيتين بان التويوتا فيها مرايات ضم و الانسر لأ .

مع ان التويوتا كان فيها ايرباج و الانسر لأ مثلا ...

و ماتنساش ان في ناس ما تعرفش ايه فرق الABS من EBD من traction control ن اي حاجة

و للأسف ده سوء تثقيف و سوء في انشاء و تطبيق مواصفات أمان تشيل المهمة دي من على عاتق المشتري

يعنى لو في مواصفات أساسية للأمان ان أي عربية ما تدخلش الا لو فيها حد أدنى من أنظمة الأمان هايمون كل مهمة المستهلك انه ينقى الماركة و اللون و الكماليات (زي اللي بيحصل دلوقتي برضه) بس يكون مطمئن ان اختياره في safe

مش لاقى كلام ققولة بعد اللى قلتوة بصراحة بس بجد حاجة تحرق الدم فعلا اللى بيحصل ده !!! والمشكلة ان فعلا سعر 10 تلاف زايد على حاجات فعلا متستاهلش ( وجهة نظرى انها حاجات مش عملية خالص)
مثلا :-1- الفرش بتاع العربية كدة كدة اولاحد بيحاول يحافظ علية ويحط فوقية فرش تانى
2- فتحة سقف :- انا واحد من الناس كنت هموت على حاجة اسمها فتحة سقف بس الصدمة انها لما تكون قدامك فعلا نادر جدااااا لو فكرت تفتحها أصلا

3- سمارت كى :- طبعا حاجة جميلة والواحد بيفضل انها تكون موجودة بس مش مقابل 10 تلاف هههههه لأن ديه الحاجة الوحيدة اللى كان نفسى تكون موجودة مع ال ESC و البيدال شيف ويارب يعدلوا الكلام ده فى الموديل الجاى

طبعا العربية جميلة جدااا بغض النظر عن كل الكلام اللى انا بتكلم فيه بس ديه فعلا حاجات تحرق الدم وانا بحب العربية وشايف انها كويسة ومش غالية ولا مبالغ فى سعرها غير كلام فاضى يعنى بس بصراحة هحترمها جدااا لو عدلوا الكلام ده

المشاركة الأصلية كتبت بواسطة Ahmed Anwer

مبرووووك ،،

ربنا يديلك خيرها و يكفيك شرها و تكون وش الخير عليك

معلهشي مكنتش اعرف ان حضرتك اشترتها

لما كتبت الرد التاني بتاع ان مش من الحكمة تغيير السيارات حاليا

بس علي فكرة قريب هتفقد ميزة التميز

في مدينة نصر كل معارض العربيات حاطه منها كتيير جدا

و بقيت اشوفها كتير جدا بعد ما كنت بادور عليها بملقاط رغم انها مبقلهاش اسابيع

اكيد طبعا اي حد بيفكر يشتري عربية في رينج اوائل المائة الف هيا افضل اختيار علي الساحة حاليا

يا باشمهندس حضرتك تكتب اللي تحبه
و كل كلمة قلتها سليمة 100 100
بس انا محتاج عربية جديدة اليومين دول و الانسر كان كفاية عليها كده
و حتى انا ما نفع استنى الحجز من الوكيل و اشتريت بسعر أغلى


انا عارف ان التميز هايفقد (تماما) خلال شهور ... بس انا مش جايب العربية دي بهدف التميز ....

في واحدة تانية بتاعة التميز بس ربنا ما أمرش ....بس ملحوقة ان شاء الله


الله يبارك فيك و أول ما توصل ان شاء الله حضرتك تجربها و تقوللي رأيك

المشاركة الأصلية كتبت بواسطة Dr.Mohamed

انا كتبت رد طويل بس النت علق حابب اعلق على كلامك يا باشا انه امبارح فى اخبار السيارات المازدا 3 الايرو فتحه سقف و بصمه وزينون و 6 سى دى و حساسات و فرامل ابى بى اس و 8 ايرباج ب 130 بس

مش عارف الرد ده معناه ايه ، هوه ده يعني حاجه وحشة، أنا فعلا شوفت الأعلان ده وعلى فكره سعر المازدا اللي بالكماليات اللي مكتوبة مش 130 الف زي ما هم كاتبين ولكن لو اتصلت وروحت هيقولك كلام تاني ، وده مش جديد ، بس هوه فعلا فيه تخفيضات حلوه اليومين دول عليها ، وعلى فكره الشكل الجديد مش هينزل مصر قبل اخر 2010 وهيفرق في حدود 20000 جنيه عن السعر الأصلي ، وملحوظة الشكل الجديد نازل على نفس الشاسيه وقاعدة العجلات ونفس معظم الكماليات ، ومختلف علية عند الناس اللي نزلت عندهم العربية وكتير بيفضل الشكل احالي وانا بردو شايف الشكل الحالي اكثر شياكة وتحفة في حد ذاته وده اللي مخليني شايف انها صفقه ممتازة في الوقت الحالي،
المازدا3 عليها تخفيضات اليومين دول عشان اصلا كلها خليجي والخليج فيه تخفيضات على كل العربيات بس التوكيلات هنا هما اللي بيستعبطو والتجار اللي بيستوردو المازدا3 عملو تخفيضات بناءا على كده وكمان عشان السوق اللي واقف ده ،
طب لما تكون فيه تخفيضات والسعر يكون اقل من اللي كان موجود بحوالي 7000 جنيه او اكتر ، وتقل الفجوة بين سعرها وسعر النيو سيراتو ، يبقى مش عندي حق اقول ان النيو سيراتو خسارة فيها جدا السعر ده ، هوه انتو يعني متخيلين ان فيه عداء بيني وبين السيراتو، طب بمناسبة ايه ، اذا كنت انا اصلا كنت بفكر فيها اول ما شوفت صورها وده فعلا اللي خلاني اهتميت بيها ونزلت شوفتها اول ما نزلت ، بس لما نزلت بالسعر ده وشوفت كمان خاماتها ومعروف كمان ان الكوري عمره الأفتراضي اقل من الياباني والألماني ، فوصلت للرؤية اللي بحاول اوصلهالكم ، وهي ان العربية دي رفعين سعرها ومتستاهلش السعر ده خالص ، واللي يدفعني كده فيها اكمل شوية واجيب حاجه ياباني 100% ومشهود لها بالكفائه ومتجربه وبردو شكلها تحفه، وهيه اصلا السيراتو دي شهرين وسعرها هينزل كتير وهتتحط في وضعها الطبيعي وهفكركم ان شاء الله بالكلام ده،
عموما أنا لا هيفدني ان حد يشتري ياباني او مازدا3 بالذات عشان عجباني ولا هيضرني ان حد يشتري سيراتو ، وبردو اعتقد ان الأستطلاع 40% رايهم زي رايي واكتر من 30% شايفين ان سعرها كتير عليها ، يعني انا مقولتش حاجه غريبة عشان تزعلو اوي كده ، عموما اللي عجباه وشايف انه منطقي يدفع فيها السعر ده ، ربنا يباركلو فيها ويسعدو بيها ، واسف لو زعلت حد فيكم ولو ان كل غرضي كان نصيحة الزملاء مش أكتر

المشاركة الأصلية كتبت بواسطة Ahmed Samy

ياراجل ....يعني انا جايب السيراتو بـ 133 الف جنيه علشان باوفر ؟

ملحوظه صغيرة بس ...
أنا قصدي ان الناس لما بتفكر في الكوري عموما ، بيكون احد عوامل القرار انها توفر ، لكن بالنسبة للنيو سيراتو حتى الميزة دي مش موجودة ، يبقى الواحد اشترى كوري وبردو موفرش فرق يستاهل ..
ده بس كان قصدي .. يا ريت يكون وضحت الصورة ،
- بس انت ليه دافع فيها 133 الف ، مش اعلى فئة ب 126000 ،