انا مع الرأي اللي بيقول إن الأولوية لأصحاب العمارة يركنوا .
ماهو مش معقول يعني أبقي راجع بيتي و تعبان و عايز أنام و مالاقيش ركنة عشان واحد جي يقعد ساعتين علي قهوة ولا عيل بيلعب بلاي ستيشن في المحل اللي في الشارع ولا حتي لو بيعمل حاجة مهمة، و بصراحة منظر مستفز طبعاَ (بالنسبة لي) إن ألاقي حد راكن تحت بيتنا و تحت الشجرة اللي إحنا زارعنها و مغطي العربية كمان
و لكن المشكلة ليها كذا محور
أول حاجة المصريين بيحبوا يركنوا قدام المكان اللي رايحينوا بالضبط .. ولا بديل عن ذلك .. يعني لو هتشتري حاجة من محل تركن صف تالت قدامه مفيش مشاكل .. لو رايح تمضي ورقة من مكان تركن قدامه تماماَ و لو ينفع تركن جوه المكتب و تديهم الورقة من جوة العربية و إنت قاعد يكون جميل .
تاني حاجة الشارع دائماَ هو الإختيار الأول لأغلبية الناس .. رغم إن معظم الأماكن اللي الواحد بيروحها (معظمها) بيكون فيها أماكن و ساحات باركنج .. و الدليل علي ذلك شارع سوريا في المهندسين .. لفترة من حياتي شغلي كان في ذلك الشارع و هو طبعاَ معروف للجميع .. شارع واسع و لكن الركن فيه أربع صفوف (أيوا ! أربعة و متفهمش الحياة ماشية إزاي و تمام!) .. و الشارع ماشي في حارة واحدة .. يعني لو حد حب ينزل حد راكب معاه ولا حد نازل من تاكسي الشارع كله يقف .. و متقدرش تقوله أقف علي جنب لأن أصلاَ مفيش جنب، و في المقابل .. في ضهر الشارع و عند التوحيد و النور فيه ساحة جراج بركن فيها تقريباَ انا و 4 أو 5 عربيات تانيين ! و برضه فيه جراجات مكدسة بصراحة بس يبقي الشارع هو الخيار الأول دائماَ ! عشان محدش عايز يدفع جوز الجنيهات .. و علي فكرة في الدول المحترمة مفيش ركنة ببلاش حتي في الشارع .. عشان محدش يقول إنه إفترا إنه يدفع كل ما يركن .
المفضلات