الموضوع: بجد مكتئب من العربية جدا

متابع وزعلان

المشاركة الأصلية كتبت بواسطة inspiron

أنا جربت العربية في السفر و تقييمي ليها الآتي :

1- الحمولة كانت 6 أ شخاص و الشنطة مليانة علي أخرها و التكييف شغال.
2- التسارع بتاعها مش مرضي بالنسبة لي + إن ساعات قليلة بسمع تسقيفة.
3- والعربية علي سرعة 100 كم عداد الـrbm بيكون علي 3 (أعتقد المفروض يكون علي 2.5)

1 & 2 - يا راجل !! 6 أشخاص و الشنطة مليانة و التكييف شغال و التسارع مش كويس !! أنا كان معايا لومينا 3800 سي سي و لو عملت فيها كده عمرها ما كانت هاتبقى بنفس تسارعها .. أي عربية هاتحملها كده لازم هايبقة تسارعها بطيء .. امال بقى لو مركب 4 بس و التسارع مكنش كويس كنت هاتقول عليها إيه

لما بتسمع تسقيفة يبقى إنت غالبا جبت غيار أعلى قبل ما توصل للعزم الكافي لتسارع مريح للعربية

أكبر دليل على الحمل الزائد هي إن العربية على سرعة 100 كان ال rpm على 3000

أعذرني حضرتك متوقع كتير من العربية

المشاركة الأصلية كتبت بواسطة inspiron

7- في وضع الثبات الrbm بيرقص...يعلي و يوطي.بس مش بيعلي عن ال1

حصلتلي نفس المشكلة في الفيليشيا و كان حلها بسيط و هو تغيير المشط الإلكتروني بتاع توزيع الكهرباء على البوجيهات و الحمد لله .. ممكن المناظر له في عربيتك هو اللي مسبب البرجلة دي مشكلة المشط ده لما بتزيد المشكلة ممكن العربية تفضل منك .. إهتزاز ال rpm مجرد إنذار للعارض الأكبر و دي ميزة العربيات دي .. إنها دايما بتديك إنذار.

ربنا يكرمك فيها إن شاء و تقدر تظبطها .. فيه 2 ميكانيكية متخصصين في الاسكودا في مدينة نصر و هايظبطولك العربية ظبطة كويسة إن شاء الله من غير ما تروح التوكيل .. كان في موضوع هنا ميكانيكة الاسكودا.

ممكن يكون في مشكلة الله اعلم
بس طبيعي ان السحب علي الغيار الخامس يكون بطئ السرعة بتزيد ببطئ
متنساش حمولة العربية هتأثر علي السحب
كل قيمة للrpmليها سرعة معينة علي غيار معين يعني مينفعش وانت علي الخامس تكون سرعتك 100كم 2500 دورة\دقيقة و في مرة تانية 3000دورة\دقيقة عند سرعة 100كم مستحيل(الا اذا كان في مشكلة في المؤشر) اللي ممكن يختلف مقدار دوسة رجلك علي دواسة البنزين في حالة الحمولة الزايدة عند نفس السرعة و rpm
ممكن الفرقعة والله اعلم عشان بتدوس بنزين كتير قوي ومبيحصلش حرق للكمية كلها (العادم فيه بنزين) يعني مبتسحبش وبالرغم من كدة بتدوس بنزين اكتر
لازم تكون معجب بيها عشان هيا احسن من عربيات تانية كتيير ولا ايه؟ اكيد في حاجة تانية عجباك

هيا العربية إيه بالظبط وموديل كام وعاملة كام الف !!!

بص يا باشا انا عربيتى اوكتافيا ايه 4 مانيوال موديل 2009جبتها زيرو من 7 شهور و عامل بيها حوالى 10 الف كم و ديه ملاحظاتى على كلامك:

• و انا ماشى على سرعة 100 كم/ساعة الـRPM بيكون على 3000 او اقل حاجة بسيطة سواء مشغل التكيف او لا بس انا عادة بكون محمل 3 او اربع ركاب (بالسواق) و من غير حمولة فى الشنطة. كده انت معندكش مشكلة فى الجزئية دى لان عربيتك زى عربيتى اللى تعتبر جديدة. اعتقد الـRPM بيكون على 2500 لو العربية اتوماتيك.
• الخامس فى اي عربية بيكون اقل غيار فى العزم. لو انت ماشى على 80 على الخامس و دوست بنزين العربية مش هاتستجيب بنفس الطريقة لو انت ماشى 120 على الخامس برضة و دوست بنزين بنفس القوة ده غير ان الوزن الزيادة بياثر على سحب العربية بصفة عامة.
• التسارع فى العربيه دى مش قوى بس مش وحش برضه و بيتحسن كتير بعد 80 كم/ساعة و بيتحسن برضه لو حطيت بنزين 95. ماتحطش فى دماغك مقارنة فى التسارع بين الاوكتافيا من ناحية و بين النترا أو لانسر أو كورولا أو سيفيك من ناحية تانية لان العربيات دية دى وزنها اخف و الهورس باور بتاعها اكتر بس الاوكتافيا تتفوق عليهم فى حاجات تانية و الكمال لله وحدة.
• التسقيف بيحصل فى اى عربية مانيوال لو العربية واخدة غيار اعلى من سرعتها او لو بتحط بنزين اقل من الحد الادنى ليها. عموما متحطش اقل من بنزين 92 و خلى عينك على الRPM كل شوية لو لقيتة نزل عن 2000 انقل للغيار الاقل و ان شاء الله ماتسمعش تسقيفة.
• الفتيس بتاع العربية دى (المانيوال) تقيل شويا فى النقل (خصوصا الغيار التانى) بس مش لدرجة ان الغيارات مترضاش تيجى. مع الوقت هاتتعود عليه زى مانا اتعودت لانه واضح انه ده طبيعى فى العربية دى. فى ناس كتير اعرفهم معاهم ايه 4 و لاحظو الموضوع ده. المهم انك تكون دايس دبرياج على الاخر و ميكونش الموضوع واصل لدرجة ان الغيار مايرضاش يجيى غير كده انت عربيتك تمام.
• موضوع الفرقعة و موضوع اهتزارعداد الـRPM محصلوش معايا بس ماعتقدش انها حاجة فظيعة وان شاء الله هاتتحل بسهولة

فى نقطة اخيرة...هناك فى علم النفس ما يسمى باحسيس مابعد الشراء (Cognitive Dissonance) اللى بتقول ان الواحد لو اشترى حاجة بيقعد يفكر فى الاختيارات التانية اللى كانت قدامة و يلاقى نفسه حاسس انه اختار غلط. ديه طبيعة بشرية حدتها تختلف من شخص لاخر على حسب صفات الشخص نفسة وعلى حسب الظروف المحيطة بالقرار و اهمية القرار بالنسبة ليه. انا حاسس من كلامك انك بتفكر انها مش العربية المناسبة ليك او انك إتدبست في العربية على حد قولك. انا عايز اقولك انها عربية هايلة بشهادة ناس كتير. حتى بره مصر المواقع اللى بنقيم العربيات بتحط الاوكتافيا فى مراكز متقدمة بين عربيات الفئة دية.لو فى بعض المشاكل فى عربيتك فده وارد لانها مستعملة و ان شاء الله تطلع بسيطة و تتحل.