الموضوع: رشيد: الحكومة تدرس وضع نظام جديد لإحلال السيارات الملاكي القديمة على غرار التاكسي

أنا شايف الناس كلها معترضة على الموضوع من غير ما نعرف عنه اي تفاصيل مش فاهم ليه؟؟ الموضوع لسة مجرد فكرة وممكن قوي انها تتنفذ بشكل كويس ودي وجهة نظري في الموضوع:

• طبعاً الموضوع هايبقى إختياري وليس إجبارياً لأن القانون أصلاً لم يحدد مدة لتكهين السيارات الخاصة وحدد ذلك فقط للأجرة وليس من المتصور أن يتم تغيير القانون لتحديد فترة لتكهين السيارات الخاصة، لأن ذلك سوف يكون متعدياً على الملكية الخاصة والحرية الشخصية والدليل على كده انه القانون الحالي لما منع ترخيص الأجرة اللي عمرها أكبر من 20 سنة سمح بترخيصها ملاكي مع الحق في استخام رخصة "لوحات" الأجرة في سيارة أخرى حديثة،،، يعني كل اللي ليهم ان العربية تكون سليمة 100% في الفحص الفني
• الفكرة كلها هاتبقى باختصار في إتاحة استبدال السيارة القديمة لمن يرغب بأخرى جديدة من السيارات المجمعة محلياً، مع إعفاء الجديدة من الجمارك وضريبة المبيعات "وهو ده اللي حصل مع مشروع التاكسي"
• في مشروع التاكسي حصل حاجتين كمان عشان يساعدوا اصحاب السيارات أولاً اتفقوا مع البنوك على تمويل تمن السيارات الجديدة بفايدة أقل من سعر السوق وثانياً اتفقوا مع شركات دعاية انها تحط اعلانات على العربية مقابل مبلغ شهري يُخصم من القسط "طبعاً لمن يوافق من أصحاب التاكسيات على استغلال سيارته إعلانياً"
• لما تحسب فرق الجمارك وضريبة المبيعات وسعر تكهين العربية القديمة هاتلاقي ان ده ممكن يعمل رقم أعلى من سعر بعض السيارات القديمة في السوق "نقول متوسط من 15 إلى 20 ألف جنيه حسب ما شوفنا في مشروع التاكسي"
• من المتوقع ان الفكرة دي لو اتنفذت هاتكون للعربيات اللي عمرها أكتر من 30 سنة على أقل تقدير يعني بنتكلم على موديلات ماقبل 80 وبيتهيألي إن غالبية السيارات اللي ليها العمر ده هاتكون فعلاً محتاجة تتكهن
• طيب لو صاحب العربية القديمة شايف ان عربيته تساوي أكتر من كده أو إن حالتها تصلح لاستمرارها على قيد الحياة "زي مابنشوف كتير عربيات قديمة وحالتعا زي الزيرو وأحسن" يبقى ببساطة هو مش مضطر يشترك في المشروع ده
• لو الحكومة عايزة تنجح مشروع زي ده يبقى ياريت تعمل ميزة كمان هي تقسيط المبلغ المتبقي بدون فوائد ولو على سنتين أو 3 سنوات
• صحيح ان الهدف الرئيسي للمشروع هو ان الحكومة عاوزة تساعد أصحاب المصانع إنهم يتجاوزوا الأزمة ويتخطوا مرحلة الركود،، أعتقد ان ده نجاح للحكومة في دعم المصانع اللي موجودة في مصر وفيها ناس بتشتغل،، ومافيش مانع نساند الحكومة في الهدف ده خصوصاً ان إحنا كمان هانستفيد في صورة إلغاء ضريبة المبيعات والجمارك
  

ياريت ياجماعة نحاول نشوف أيه الاقتراحات اللي ممكن نقدمها عشان فكرة زي دي تتنفذ بشكل كويس